екӯнавӣсатимо париччхедо

19. пабхедакатха̄

706. ат̣т̣хавӣсавидхампетам̣, рӯпам̣ да̄ни йатха̄рахам̣;

бхӯтарӯпа̄дибхедехи, вибхаджеййа вичаккхан̣о.

707. патхава̄дикамиданти, бхӯтарӯпам̣ чатуббидхам̣;

упа̄да̄рӯпаман̃н̃ам̣ ту, чатувӣсативидхам̣ бхаве.

708. пан̃чавидхампи чаккха̄дирӯпамаджджхаттикам̣ матам̣;

тевӣсативидхам̣ сесам̣, ба̄хиранти павуччати.

709. рӯпасаддагандхарасапхот̣т̣хабба̄ сатта пан̃чадха̄;

пан̃чаппаса̄дависайа̄, пан̃ча̄рамман̣ана̄мака̄.

710. екавӣсативидхам̣ сесам̣, дхамма̄рамман̣асан̇гахам̣;

мановин̃н̃а̄н̣авин̃н̃еййам̣, манодва̄расса гочарам̣.

711. паса̄да̄ висайа̄ чева, пан̃чака̄ двепи самбхава̄;

два̄даса̄пи сарӯпена, даса̄йатанадха̄туйо.

712. йадедам̣ пана саббампи, рӯпам̣ саппат̣игхам̣ матам̣;

тадевол̣а̄рикам̣ на̄ма, сантикети павуччати.

713. сесамаппат̣игхам̣ на̄ма, дхамма̄йатанадха̄ту ча;

сукхуман̃чева рӯпан̃ча, рӯпам̣ сол̣асадха̄ т̣хитам̣.

714. чхаббидха̄ ваттхурӯпам̣ ту, паса̄дахадайампи ча;

аваттхурӯпам̣ сесам̣ ту, два̄вӣсативидхам̣ бхаве.

715. паса̄да̄ чева вин̃н̃атти, два̄рарӯпам̣ ту саттадха̄;

сесам̣ адва̄рарӯпам̣ ту, екавӣсавидхампи ча.

716. паса̄да̄ бха̄вайугал̣ам̣, джӣвитан̃чети ат̣т̣хадха̄;

индрийарӯпаман̃н̃ам̣ ту, вӣсадха̄ниндрийам̣ сийа̄.

717. ван̣н̣о гандхо расо оджа̄, бхӯтарӯпанти ат̣т̣хадха̄;

авиниббхогамитарам̣, виниббхогам̣ ту вӣсадха̄.

718. авиниббхогарӯпа̄ни, саддаваттхиндрийа̄ни ча;

ниппханнам̣ ат̣т̣ха̄расадха̄, рӯпарӯпанти ведитам̣.

719. париччхедо пана̄ка̄со, вин̃н̃аттилахута̄дайо;

вика̄ра̄ лаккхан̣а̄ чева, рӯпассупачайа̄дайо.

720. дасадха̄пи аниппханнам̣, наттхетам̣ параматтхато;

рӯпассетанти катва̄на, рӯпамиччева вуччати.

721. рӯпа̄йатанамевекам̣, санидассанамӣритам̣;

анидассанаман̃н̃ам̣ ту, саттавӣсативидхампи ча.

722. каммаджам̣ панупа̄диннам̣, анупа̄диннака̄парам̣;

тивидхам̣ читтаджан̃чева, утуджа̄ха̄раджанти ча.

723. чаккхусампхассаваттхӯти, чаккхудха̄ту пакиттита̄;

на ваттху тасса сесам̣ ту, саттавӣсативидхам̣ бхаве.

724. сотасампхассаваттха̄ди-васа̄ ча дувидха̄ татха̄;

тивидха̄ ча вибха̄веййа, йатха̄самбхавато катхам̣.

725. санидассанарӯпан̃ча, ван̣н̣о саппат̣игхампи ча;

анидассанаман̃н̃ам̣ ту, тхӯлам̣ саппат̣игхам̣ бхаве.

726. анидассанарӯпан̃ча, сесамаппат̣игхампи ча;

сол̣аса̄ти ча саббампи, рӯпам̣ тивидхамуддисе.

727. апаттага̄хакам̣ на̄ма, чаккхусотадвайам̣ пана;

сампаттага̄хакам̣ на̄ма, гха̄на̄диттайамӣритам̣.

728. ага̄хакамато сесам̣, тевӣсативидхам̣ бхаве;

кин̃чи са̄рамман̣ам̣ на̄ма, на гайхатӣти саббатха̄.

729. упа̄да̄ аджджхаттикам̣ рӯпам̣, упа̄да̄ ба̄хирам̣ татха̄;

нопа̄да̄ ба̄хиран̃чети, евампи тивидхам̣ бхаве.

730. аджджхаттикамупа̄диннам̣, ба̄хиран̃ча татха̄парам̣;

анупа̄диннакан̃чети, евама̄диваса̄пи ча.

731. дит̣т̣хам̣ рӯпам̣ сутам̣ саддо, гандха̄ди тивидхам̣ мутам̣;

вин̃н̃а̄таман̃н̃авин̃н̃еййам̣, манаса̄ти чатуббидхам̣.

732. рӯпарӯпам̣ париччхедо, вика̄ро лаккхан̣ам̣ кама̄;

ат̣т̣ха̄расекакам̣ пан̃ча, чатукканти ча там̣ татха̄.

733. два̄ран̃ча хоти ваттху ча, на ваттху два̄рамева ту;

на два̄рам̣ ваттхумева̄тха, нобхайанти ча ниддисе.

734. упа̄да̄ анупа̄диннам̣, анупа̄диннакам̣ татха̄;

нопа̄да̄ дувидхан̃чети, чатуддхевампи деситам̣.

735. саппат̣иггхамупа̄да̄ ча, рӯпамаппат̣игхам̣ татха̄;

нопа̄да̄ дувидхан̃чети, чатуддха̄ евама̄дито.

736. ека̄дасекаджарӯпам̣, хадайиндрийанавакам̣;

каммаджам̣ читтаджан̃чева, татха̄ вин̃н̃аттикам̣ двайам̣.

737. саддо читтотуджо тасма̄, рӯпамекам̣ двиджам̣ матам̣;

читтота̄ха̄расамбхӯтам̣, лахута̄диттайам̣ тиджам̣.

738. нава̄ка̄са̄виниббхога̄, камма̄дичатусамбхава̄;

атха лаккхан̣арӯпанти, рӯпамевам̣ ту пан̃чадха̄.

739. нава̄ка̄са̄виниббхога̄, нава ваттхиндрийа̄ни ча;

ат̣т̣ха̄расавидхам̣ рӯпам̣, каммаджам̣ хоти пин̣д̣итам̣.

740. садда̄ка̄са̄виниббхога̄, вин̃н̃аттилахута̄дайо;

пан̃чадасавидхам̣ рӯпам̣, читтасамбхавамуддисе.

741. садда̄ка̄са̄виниббхога̄, лахута̄диттайанти ча;

утусамбхавамӣренти, рӯпам̣ терасадха̄ т̣хитам̣.

742. париччхеда̄виниббхога̄, лахута̄диттайампи ча;

евама̄ха̄раджам̣ на̄ма, рӯпам̣ два̄дасадха̄ т̣хитам̣.

743. джа̄ти джара̄ ча маран̣ам̣, на куточипи джа̄йати;

евампи пан̃чадха̄ хоти, рӯпаджа̄тивибха̄гато.

744. пан̃чавӣсативидхам̣ каммам̣, ка̄марӯпававаттхитам̣;

джанети каммаджам̣ рӯпам̣, ка̄марӯпабхавадвайе.

745. пан̃чавин̃н̃а̄н̣ама̄руппа-випа̄ка̄ саббасандхийо;

чути кхӣн̣а̄савассети, сол̣асете виваджджайе.

746. пан̃часаттати сеса̄ни, читта̄нима̄ни самбхава̄;

джаненти читтаджам̣ рӯпам̣, пан̃чавока̄рабхӯмийам̣.

747. джанебхи утуджам̣ рӯпам̣, теджодха̄ту бхавадвайе;

ка̄мабхӯмийамоджа̄ ту, джанета̄ха̄раджам̣ татха̄.

748. каммам̣ джанети рӯпа̄ни, аттаджа̄ни кхан̣е кхан̣е;

читтамуппа̄дака̄ламхи, уппа̄да̄нантарам̣ парам̣.

749. утусамбхавамӣренти, рӯпам̣ терасадха̄ т̣хитам̣;

париччхеда̄виниббхога̄, лахута̄диттайампи ча.

750. сандхийампи каммаджам̣ ту, паваттепи ча самбхава̄;

джанети рӯпам̣ сеса̄ни, паватте, на ту сандхийам̣.

751. индрийабаддхасанта̄не, камма̄ди тивидхампи ча;

джанети рӯпам̣ матаке, ба̄хире ту йатха̄рахам̣.

752. ити камма̄дайо рӯпам̣, джаненти ча йатха̄сакам̣;

сеса̄нампи ча рӯпа̄нам̣, паччайа̄ хонти самбхава̄.

753. ити рӯпавибха̄ган̃ча, джа̄тибхедан̃ча самбхава̄;

джанака̄диппабхедан̃ча, рӯпа̄нам̣ таттха дӣпайети.

ити рӯпавибха̄ге пабхедакатха̄ нит̣т̣хита̄.

екӯнавӣсатимо париччхедо.