19. екӯнавӣсатимо париччхедо

кан̇кха̄витаран̣ависуддхиниддесо

1227. етасса на̄марӯпасса, джа̄нитва̄ хетупаччайе;

кан̇кха̄ тӣсу панаддха̄су, витаритва̄ т̣хитам̣ пана.

1228. кан̇кха̄витаран̣ам̣ на̄ма, н̃а̄н̣ам̣ там̣ самудӣритам̣;

там̣ сампа̄детука̄мена, аттхака̄мена бхиккхуна̄.

1229. на̄марӯпасса ко хету, кону ва̄ паччайо бхаве;

а̄ваджджитва̄ тамиччевам̣, рӯпака̄йасса та̄ваде.

1230. кеса̄ лома̄ накха̄ данта̄, тачо мам̣сам̣ наха̄ру ча;

ат̣т̣химин̃джан̃ча ваккан̃ча, хадайам̣ йаканампи ча.

1231. иччевама̄диба̄ттим̣са-кот̣т̣ха̄сапаччайасса хи;

паригган̣хати ка̄йасса, манаса̄ хетупаччайе.

1232. авиджджа̄ тан̣хупа̄да̄нам̣, каммам̣ хету чатуббидхо;

етасса рӯпака̄йасса, а̄ха̄ро паччайо мато.

1233. джанако хету аккха̄то,

паччайо анупа̄лако;

хетван̇курасса бӣджам̣ ту,

паччайа̄ патхава̄дайо.

1234. итиме пан̃ча дхамма̄ хи, хетупаччайатам̣ гата̄;

авиджджа̄дайо тайо таттха, ма̄та̄ва упаниссайа̄.

1235. джанакам̣ пана каммам̣ ту, путтасса хи пита̄ вийа;

дха̄тӣ вийа кума̄расса, а̄ха̄ро дха̄рако бхаве.

1236. иччевам̣ рӯпака̄йасса, со паччайапариггахам̣;

катва̄ пунапи ‘‘чаккхун̃ча, рӯпама̄локамева ча.

1237. пат̣ичча чаккхувин̃н̃а̄н̣ам̣, хоти’’иччевама̄дина̄;

найена на̄мака̄йасса, паччайам̣ париган̣хати.

1238. со евам̣ на̄марӯпасса, вуттим̣ дисва̄на паччайа̄;

йатха̄ етарахидам̣ ту, атӣтепи татхевидам̣.

1239. паччайа̄ ча паваттиттха, татхева̄на̄гатепи ча;

паваттиссати аддха̄су, тӣсвевам̣ анупассати.

1240. тассевам̣ пассато йа̄ са̄, пуббанте пан̃чадха̄ татха̄;

апаранте сийа̄ кан̇кха̄, пан̃чадха̄ самудӣрита̄.

1241. паччуппаннепи аддха̄не, чхаббидха̄ парикиттита̄;

сабба̄ ча̄навасеса̄ва, йогино са̄ пахиййати.

1242. еко каммавипа̄ка̄нам̣, васена̄пи ча пан̣д̣ито;

етасса на̄марӯпасса, паччайам̣ париган̣хати.

1243. каммам̣ чатуббидхам̣ дит̣т̣ха-дхаммаведанийам̣ татха̄;

упападжджа̄пара̄парийа̄-хосикаммаваса̄ пана.

таттха екаджаванавӣтхийам̣ саттасу читтесу кусала̄ ва̄ акусала̄ ва̄ пат̣хамаджаваначетана̄ дит̣т̣хадхаммаведанӣйакаммам̣ на̄ма. там̣ имасмим̣йева аттабха̄ве випа̄кам̣ дети, татха̄ асакконтам̣ пана ‘‘ахосикаммам̣ на̄хоси каммавипа̄ко, на бхависсати каммавипа̄ко, наттхи каммавипа̄ко’’ти имасса тикасса васена ахосикаммам̣ на̄ма хоти. аттхаса̄дхика̄ пана саттамаджаваначетана̄ упападжджаведанӣйакаммам̣ на̄ма. таманантаре аттабха̄ве випа̄кам̣ дети, татха̄ асакконтам̣ вуттанайена ахосикаммам̣ на̄ма хоти. убхиннамантаре пан̃чаджаваначетана̄ апара̄парийаведанӣйакаммам̣ на̄ма. тамана̄гате йада̄ ока̄сам̣ лабхати, тада̄ випа̄кам̣ дети, сати сам̣са̄раппаваттийа̄ ахосикаммам̣ на̄ма на хоти.

1244. апарам̣ чатуббидхам̣ каммам̣, гарукам̣ бахулампи ча;

а̄саннан̃ча кат̣атта̄ ча, камманти самудӣритам̣.

1245. ан̃н̃ам̣ чатуббидхам̣ каммам̣, джанакам̣ упатхамбхакам̣;

татхӯпапӣл̣акам̣ камма-мупагха̄такамева ча.

таттха джанакам̣ на̄ма кусалам̣ ва̄ акусалам̣ ва̄ каммам̣ пат̣исандхийампи паваттепи рӯпа̄рӯпавипа̄каккхандхе джанети. упаттхамбхакам̣ пана випа̄кам̣ джанетум̣ на саккоти, ан̃н̃ена каммена динна̄йа пат̣исандхийа̄ джаните випа̄ке уппаджджанакасукхадуккхам̣ упаттхамбхети, аддха̄нам̣ паваттети. упапӣл̣акам̣ пана ан̃н̃ена каммена динна̄йа пат̣исандхийа̄ джаните випа̄ке уппаджджанакасукхадуккхам̣ пӣл̣ети ба̄дхати, аддха̄нам̣ паваттитум̣ на дети. упагха̄такам̣ пана сайам̣ кусалампи акусалампи сама̄нам̣ ан̃н̃ам̣ дуббалакаммам̣ гха̄тетва̄ тасса випа̄кам̣ пат̣иба̄хитва̄ аттано випа̄касса ока̄сам̣ кароти. евам̣ пана каммена ока̄се кате там̣випа̄камуппаннам̣ на̄ма хоти. ити имам̣ два̄дасавидхам̣ каммам̣ каммават̣т̣е паккхипитва̄ евамеко каммавипа̄кавасена на̄марӯпасса паччайапариггахам̣ кароти.

ити евам̣ каммавипа̄кават̣т̣авасена на̄марӯпасса паваттим̣ дисва̄ ‘‘йатха̄ идам̣ етарахи, еваматӣтепи аддха̄не каммавипа̄кавасена паччайато паваттиттха, ана̄гатепи паваттиссатӣ’’ти ити камман̃чева випа̄ко ча̄ти каммавипа̄кавасена локо паваттатӣти там̣ саманупассати. тассевам̣ саманупассато сабба̄ сол̣асавидха̄ кан̇кха̄ пахиййати.

1246. хетупхаласса самбандхавасенева паваттати;

кевалам̣ на̄марӯпанти, самма̄ саманупассати.

1247. евам̣ ка̄ран̣ато уддхам̣, ка̄ран̣ам̣ на ча пассати;

па̄капаваттито уддхам̣, на па̄капат̣иведакам̣.

тена̄ху пора̄н̣а̄ –

1248. ‘‘каммасса ка̄рако наттхи, випа̄касса ча ведако;

суддхадхамма̄ паваттанти, еветам̣ саммадассанам̣.

1249. евам̣ камме випа̄ке ча, ваттама̄не сахетуке;

бӣджаруккха̄дика̄нам̣ва, пубба̄ кот̣и на на̄йати.

1250. ана̄гатепи сам̣са̄ре, аппаватти на диссати;

етаматтхаманан̃н̃а̄йа, титтхийа̄ асайам̣васӣ.

1251. саттасан̃н̃ам̣ гахетва̄на, сассатуччхедадассино;

два̄сат̣т̣хидит̣т̣хим̣ ган̣ханти, ан̃н̃аман̃н̃авиродхино.

1252. дит̣т̣хибандханабаддха̄ те, тан̣ха̄сотена вуйхаре;

тан̣ха̄сотена вуйханта̄, на те дуккха̄ памуччаре.

1253. еваметам̣ абхин̃н̃а̄йа, бхиккху буддхасса са̄вако;

гамбхӣрам̣ нипун̣ам̣ сун̃н̃ам̣, паччайам̣ пат̣ивиджджхати.

1254. каммам̣ наттхи випа̄камхи, па̄ко камме на виджджати;

ан̃н̃аман̃н̃ам̣ убхо сун̃н̃а̄, на ча каммам̣ вина̄ пхалам̣.

1255. йатха̄ на сӯрийе агги, на ман̣имхи на гомайе;

на тесам̣ бахи со аттхи, самбха̄рехи ча джа̄йати.

1256. татха̄ на анто каммасса, випа̄ко упалаббхати;

бахиддха̄пи на каммасса, на каммам̣ таттха виджджати.

1257. пхалена сун̃н̃ам̣ там̣ каммам̣, пхалам̣ камме на виджджати;

камман̃ча кхо упа̄да̄йа, тато ниббаттате пхалам̣.

1258. на хеттха дево брахма̄ ва̄,

сам̣са̄рассаттхи ка̄рако;

суддхадхамма̄ паваттанти,

хетусамбха̄рапаччайа̄’’ти.

1259. евам̣ на̄наппака̄рехи, на̄марӯпасса паччайам̣;

париггахетва̄ аддха̄су, таритва̄ кан̇кхамут̣т̣хитам̣.

1260. кан̇кха̄витаран̣ам̣ на̄ма, н̃а̄н̣ам̣ там̣ самудӣритам̣;

дхаммат̣т̣хити йатха̄бхӯтам̣, там̣ самма̄дассанантипи.

1261. имина̄ пана н̃а̄н̣ена,

сам̣йутто буддхаса̄сане;

хоти ладдхапатит̣т̣хова,

сота̄панно хи чӯл̣ако.

1262. тасма̄ сапан̃н̃о пана аттхака̄мо,

йо на̄марӯпасса хетупаччайа̄ни;

париггахам̣ са̄дху кароти дхӣро,

кхиппам̣ са нибба̄напурам̣ упети.

ити абхидхамма̄вата̄ре кан̇кха̄витаран̣ависуддхиниддесо на̄ма

екӯнавӣсатимо париччхедо.