7. сутасуттам̣

348. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йена мидхекаччо ка̄йасса бхеда̄ парам̣ маран̣а̄ ан̣д̣аджа̄нам̣ на̄га̄нам̣ сахабйатам̣ упападжджатӣ’’ти?

‘‘идха, бхиккху, екаччо ка̄йена двайака̄рӣ хоти, ва̄ча̄йа двайака̄рӣ хоти, манаса̄ двайака̄рӣ хоти. тасса сутам̣ хоти – ‘ан̣д̣аджа̄ на̄га̄ дӣгха̄йука̄ ван̣н̣аванто сукхабахула̄’ти. тасса евам̣ хоти – ‘ахо вата̄хам̣ ка̄йасса бхеда̄ парам̣ маран̣а̄ ан̣д̣аджа̄нам̣ на̄га̄нам̣ сахабйатам̣ упападжджеййа’нти. со ка̄йасса бхеда̄ парам̣ маран̣а̄ ан̣д̣аджа̄нам̣ на̄га̄нам̣ сахабйатам̣ упападжджати. айам̣ кхо, бхиккху, хету, айам̣ паччайо, йена мидхекаччо ка̄йасса бхеда̄ парам̣ маран̣а̄ ан̣д̣аджа̄нам̣ на̄га̄нам̣ сахабйатам̣ упападжджатӣ’’ти. саттамам̣.