11. вала̄хакасам̣йуттам̣

1. суддхикасуттам̣

550. са̄ваттхинида̄нам̣. ‘‘вала̄хакака̄йике во, бхиккхаве, деве десесса̄ми. там̣ сун̣а̄тха. катаме ча, бхиккхаве, вала̄хакака̄йика̄ дева̄? санти, бхиккхаве, сӣтавала̄хака̄ дева̄; санти ун̣хавала̄хака̄ дева̄; санти аббхавала̄хака̄ дева̄; санти ва̄тавала̄хака̄ дева̄; санти вассавала̄хака̄ дева̄ – име вуччанти, бхиккхаве, ‘вала̄хакака̄йика̄ дева̄’’’ти. пат̣хамам̣.

2. сучаритасуттам̣

551. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йена мидхекаччо ка̄йасса бхеда̄ парам̣ маран̣а̄ вала̄хакака̄йика̄нам̣ дева̄нам̣ сахабйатам̣ упападжджатӣ’’ти? ‘‘идха, бхиккху, екаччо ка̄йена сучаритам̣ чарати, ва̄ча̄йа сучаритам̣ чарати, манаса̄ сучаритам̣ чарати. тасса сутам̣ хоти – ‘вала̄хакака̄йика̄ дева̄ дӣгха̄йука̄ ван̣н̣аванто сукхабахула̄’ти. тасса евам̣ хоти – ‘ахо вата̄хам̣ ка̄йасса бхеда̄ парам̣ маран̣а̄ вала̄хакака̄йика̄нам̣ дева̄нам̣ сахабйатам̣ упападжджеййа’нти. со ка̄йасса бхеда̄ парам̣ маран̣а̄ вала̄хакака̄йика̄нам̣ дева̄нам̣ сахабйатам̣ упападжджати. айам̣ кхо, бхиккху, хету, айам̣ паччайо, йена мидхекаччо ка̄йасса бхеда̄ парам̣ маран̣а̄ вала̄хакака̄йика̄нам̣ дева̄нам̣ сахабйатам̣ упападжджатӣ’’ти. дутийам̣.

3-12. сӣтавала̄хакада̄нӯпака̄расуттадасакам̣

552-561. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йена мидхекаччо ка̄йасса бхеда̄ парам̣ маран̣а̄ сӣтавала̄хака̄нам̣ дева̄нам̣ сахабйатам̣ упападжджатӣ’’ти? ‘‘идха бхиккху, екаччо ка̄йена сучаритам̣ чарати, ва̄ча̄йа сучаритам̣ чарати, манаса̄ сучаритам̣ чарати. тасса сутам̣ хоти – ‘сӣтавала̄хака̄ дева̄ дӣгха̄йука̄ ван̣н̣аванто сукхабахула̄’ти. тасса евам̣ хоти – ‘ахо вата̄хам̣ ка̄йасса бхеда̄ парам̣ маран̣а̄ сӣтавала̄хака̄нам̣ дева̄нам̣ сахабйатам̣ упападжджеййа’нти. со аннам̣ дети…пе… падӣпеййам̣ дети. со ка̄йасса бхеда̄ парам̣ маран̣а̄ сӣтавала̄хака̄нам̣ дева̄нам̣ сахабйатам̣ упападжджати. айам̣ кхо, бхиккху, хету, айам̣ паччайо, йена мидхекаччо ка̄йасса бхеда̄ парам̣ маран̣а̄ сӣтавала̄хака̄нам̣ дева̄нам̣ сахабйатам̣ упападжджатӣ’’ти. два̄дасамам̣.

13-52. ун̣хавала̄хакада̄нӯпака̄расуттача̄лӣсакам̣

562-601. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йена мидхекаччо ка̄йасса бхеда̄ парам̣ маран̣а̄ ун̣хавала̄хака̄нам̣ дева̄нам̣…пе… аббхавала̄хака̄нам̣ дева̄нам̣…пе… ва̄тавала̄хака̄нам̣ дева̄нам̣…пе… вассавала̄хака̄нам̣ дева̄нам̣ сахабйатам̣ упападжджатӣ’’ти? ‘‘идха, бхиккху, екаччо ка̄йена сучаритам̣ чарати, ва̄ча̄йа сучаритам̣ чарати, манаса̄ сучаритам̣ чарати. тасса сутам̣ хоти – ‘вассавала̄хака̄ дева̄ дӣгха̄йука̄ ван̣н̣аванто сукхабахула̄’ти. тасса евам̣ хоти – ‘ахо вата̄хам̣ ка̄йасса бхеда̄ парам̣ маран̣а̄ вассавала̄хака̄нам̣ дева̄нам̣ сахабйатам̣ упападжджеййа’нти. со аннам̣ дети…пе… падӣпеййам̣ дети. со ка̄йасса бхеда̄ парам̣ маран̣а̄ вассавала̄хака̄нам̣ дева̄нам̣ сахабйатам̣ упападжджати. айам̣ кхо, бхиккху, хету, айам̣ паччайо, йена мидхекаччо ка̄йасса бхеда̄ парам̣ маран̣а̄ вассавала̄хака̄нам̣ дева̄нам̣ сахабйатам̣ упападжджатӣ’’ти. двепан̃н̃а̄самам̣.

53. сӣтавала̄хакасуттам̣

602. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йенекада̄ сӣтам̣ хотӣ’’ти? ‘‘санти, бхиккху, сӣтавала̄хака̄ на̄ма дева̄. тесам̣ йада̄ евам̣ хоти – ‘йам̣нӯна майам̣ сака̄йа ратийа̄ васеййа̄ма̄’ти [рамеййа̄ма̄ти (сӣ. сйа̄. кам̣. пӣ.) евамупарипи], тесам̣ там̣ четопан̣идхиманва̄йа сӣтам̣ хоти. айам̣ кхо, бхиккху, хету, айам̣ паччайо, йенекада̄ сӣтам̣ хотӣ’’ти. тепан̃н̃а̄самам̣.

54. ун̣хавала̄хакасуттам̣

603. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йенекада̄ ун̣хам̣ хотӣ’’ти? ‘‘санти, бхиккху, ун̣хавала̄хака̄ на̄ма дева̄. тесам̣ йада̄ евам̣ хоти – ‘йам̣нӯна майам̣ сака̄йа ратийа̄ васеййа̄ма̄’ти, тесам̣ там̣ четопан̣идхиманва̄йа ун̣хам̣ хоти. айам̣ кхо, бхиккху, хету, айам̣ паччайо, йенекада̄ ун̣хам̣ хотӣ’’ти. чатупан̃н̃а̄самам̣.

55. аббхавала̄хакасуттам̣

604. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йенекада̄ аббхам̣ хотӣ’’ти? ‘‘санти, бхиккху, аббхавала̄хака̄ на̄ма дева̄. тесам̣ йада̄ евам̣ хоти – ‘йам̣нӯна майам̣ сака̄йа ратийа̄ васеййа̄ма̄’ти, тесам̣ там̣ четопан̣идхиманва̄йа аббхам̣ хоти. айам̣ кхо, бхиккху, хету, айам̣ паччайо, йенекада̄ аббхам̣ хотӣ’’ти. пан̃чапан̃н̃а̄самам̣.

56. ва̄тавала̄хакасуттам̣

605. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йенекада̄ ва̄то хотӣ’’ти? ‘‘санти, бхиккху, ва̄тавала̄хака̄ на̄ма дева̄. тесам̣ йада̄ евам̣ хоти – ‘йам̣нӯна майам̣ сака̄йа ратийа̄ васеййа̄ма̄’ти, тесам̣ там̣ четопан̣идхиманва̄йа ва̄то хоти. айам̣ кхо, бхиккху, хету, айам̣ паччайо, йенекада̄ ва̄то хотӣ’’ти. чхаппан̃н̃а̄самам̣.

57. вассавала̄хакасуттам̣

606. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йенекада̄ дево вассатӣ’’ти? ‘‘санти, бхиккху, вассавала̄хака̄ на̄ма дева̄. тесам̣ йада̄ евам̣ хоти – ‘йам̣нӯна майам̣ сака̄йа ратийа̄ васеййа̄ма̄’ти, тесам̣ там̣ четопан̣идхиманва̄йа дево вассати. айам̣ кхо, бхиккху, хету, айам̣ паччайо, йенекада̄ дево вассатӣ’’ти. саттапан̃н̃а̄самам̣.

саттапан̃н̃а̄сасуттантам̣ нит̣т̣хитам̣.

вала̄хакасам̣йуттам̣ саматтам̣.