5. кан̃джикада̄йика̄вима̄наваттху

719. ‘‘абхиккантена ван̣н̣ена…пе… осадхӣ вийа та̄рака̄.

720. ‘‘кена тета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти.

722. са̄ девата̄ аттамана̄…пе… йасса каммассидам̣ пхалам̣.

723. ‘‘ахам̣ андхакавиндамхи, буддхасса̄диччабандхуно;

ада̄сим̣ коласампа̄кам̣, кан̃джикам̣ теладхӯпитам̣.

724. ‘‘пиппхалйа̄ ласун̣ена ча, миссам̣ ла̄ман̃джакена ча;

ада̄сим̣ уджубхӯтасмим̣ [уджубхӯтесу (ка.)], виппасаннена четаса̄.

725. ‘‘йа̄ махеситтам̣ ка̄реййа, чаккаваттисса ра̄джино;

на̄рӣ саббан̇гакалйа̄н̣ӣ, бхатту ча̄номадассика̄;

екасса кан̃джикада̄насса, калам̣ на̄ггхати сол̣асим̣.

726. ‘‘сатам̣ никкха̄ сатам̣ асса̄, сатам̣ ассатарӣратха̄;

сатам̣ кан̃н̃а̄сахасса̄ни, а̄муттаман̣икун̣д̣ала̄;

екасса кан̃джикада̄насса, калам̣ на̄ггханти сол̣асим̣.

727. ‘‘сатам̣ хемавата̄ на̄га̄, ӣса̄данта̄ урӯл̣хава̄;

суван̣н̣акаччха̄ ма̄тан̇га̄, хемакаппанава̄саса̄;

екасса кан̃джикада̄насса, калам̣ на̄ггханти сол̣асим̣.

728. ‘‘чатуннамапи дӣпа̄нам̣, иссарам̣ йодха ка̄райе;

екасса кан̃джикада̄насса, калам̣ на̄ггхати сол̣аси’’нти.

кан̃джикада̄йика̄вима̄нам̣ пан̃чамам̣.