2. пабхассаравима̄наваттху

697. ‘‘пабхассаравараван̣н̣анибхе, сураттаваттхавасане [ваттханива̄сане (сӣ. сйа̄.)];

махиддхике чанданаручирагатте, ка̄ твам̣ субхе девате вандасе мамам̣.

698. ‘‘паллан̇ко ча те махаггхо, на̄на̄ратаначиттито ручиро;

йаттха твам̣ нисинна̄ вирочаси, девара̄джа̄рива нандане ване.

699. ‘‘ким̣ твам̣ пуре сучаритама̄чарӣ бхадде, кисса каммасса випа̄кам̣;

анубхоси девалокасмим̣, девате пуччхита̄чиккха;

кисса каммассидам̣ пхала’’нти.

700. ‘‘пин̣д̣а̄йа те чарантасса, ма̄лам̣ пха̄н̣итан̃ча ададам̣ бханте;

тасса каммассидам̣ випа̄кам̣, анубхоми девалокасмим̣.

701. ‘‘хоти ча ме анута̄по, апараддхам̣ [апара̄дхам̣ (сйа̄.)] дуккхитан̃ча [дуккат̣ан̃ча (сӣ.)] ме бханте;

са̄хам̣ дхаммам̣ на̄ссосим̣, судеситам̣ дхаммара̄джена.

702. ‘‘там̣ там̣ вада̄ми бхадданте, ‘йасса ме анукампийо кочи;

дхаммесу там̣ сама̄дапетха’, судеситам̣ дхаммара̄джена.

703. ‘‘йесам̣ аттхи саддха̄ буддхе, дхамме ча сан̇гхаратане;

те мам̣ ативирочанти, а̄йуна̄ йасаса̄ сирийа̄.

704. ‘‘пата̄пена ван̣н̣ена уттаритара̄,

ан̃н̃е махиддхикатара̄ майа̄ дева̄’’ти;

пабхассаравима̄нам̣ дутийам̣.