1. екӯпосатхика̄тхерӣапада̄нам̣

1. ‘‘нагаре бандхуматийа̄, бандхума̄ на̄ма кхаттийо;

дивасе пун̣н̣ама̄йа со, упаваси упосатхам̣.

2. ‘‘ахам̣ тена самайена, кумбхада̄сӣ ахам̣ тахим̣;

дисва̄ сара̄джакам̣ сенам̣, ева̄хам̣ чинтайим̣ тада̄.

3. ‘ра̄джа̄пи раджджам̣ чхад̣д̣етва̄, упаваси упосатхам̣;

сапхалам̣ нӯна там̣ каммам̣, джанака̄йо памодито’.

4. ‘‘йонисо паччавеккхитва̄, дуггаччан̃ча [дуггатин̃ча (сйа̄.)] далиддатам̣ [дал̣иддатам̣ (сӣ.)];

ма̄насам̣ сампахам̣ситва̄, упавасим̣ упосатхам̣.

5. ‘‘ахам̣ упосатхам̣ катва̄, самма̄самбуддхаса̄сане;

тена каммена сукатена, та̄ватим̣самагаччхахам̣.

6. ‘‘таттха ме сукатам̣ бйамхам̣, уббхайоджанамуггатам̣ [уддхам̣ йоджанамуггатам̣ (сӣ. сйа̄. пӣ.)];

кӯт̣а̄га̄раварӯпетам̣, маха̄санасубхӯситам̣.

7. ‘‘аччхара̄ сатасахасса̄, упатит̣т̣ханти мам̣ сада̄;

ан̃н̃е деве атиккамма, атироча̄ми саббада̄.

8. ‘‘чатусат̣т̣хи девара̄джӯнам̣, махеситтамака̄райим̣;

тесат̣т̣хи чаккаваттӣнам̣, махеситтамака̄райим̣.

9. ‘‘суван̣н̣аван̣н̣а̄ хутва̄на, бхавесу сам̣сара̄махам̣;

саббаттха павара̄ хоми, упосатхассидам̣ пхалам̣.

10. ‘‘хаттхийа̄нам̣ ассайа̄нам̣, ратхайа̄нан̃ча сӣвикам̣ [кевалам̣ (сӣ. сйа̄. пӣ.)];

лабха̄ми саббамеветам̣, упосатхассидам̣ пхалам̣.

11. ‘‘сон̣н̣амайам̣ рӯпимайам̣, атхопи пхалика̄майам̣;

лохитан̇гамайан̃чева, саббам̣ пат̣илабха̄махам̣.

12. ‘‘косеййакамбалийа̄ни, кхомакаппа̄сика̄ни ча;

махаггха̄ни ча ваттха̄ни, саббам̣ пат̣илабха̄махам̣.

13. ‘‘аннам̣ па̄нам̣ кха̄данӣйам̣, ваттхасена̄сана̄ни ча;

саббаметам̣ пат̣илабхе, упосатхассидам̣ пхалам̣.

14. ‘‘варагандхан̃ча ма̄лан̃ча, чун̣н̣акан̃ча вилепанам̣;

саббаметам̣ пат̣илабхе, упосатхассидам̣ пхалам̣.

15. ‘‘кӯт̣а̄га̄ран̃ча па̄са̄дам̣, ман̣д̣апам̣ хаммийам̣ гухам̣;

саббаметам̣ пат̣илабхе, упосатхассидам̣ пхалам̣.

16. ‘‘джа̄тийа̄ саттавасса̄хам̣, паббаджим̣ анага̄рийам̣;

ад̣д̣хама̄се асампатте, арахаттамапа̄пун̣им̣.

17. ‘‘килеса̄ джха̄пита̄ майхам̣, бхава̄ саббе самӯхата̄;

сабба̄савапариккхӣн̣а̄, наттхи да̄ни пунаббхаво.

18. ‘‘еканавутито каппе, йам̣ каммамакарим̣ тада̄;

дуггатим̣ на̄бхиджа̄на̄ми, упосатхассидам̣ пхалам̣.

19. ‘‘килеса̄ джха̄пита̄ майхам̣…пе… вихара̄ми ана̄сава̄.

20. ‘‘сва̄гатам̣ вата ме а̄си…пе… катам̣ буддхасса са̄санам̣.

21. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ екӯпосатхика̄ бхиккхунӣ има̄ га̄тха̄йо абха̄ситтха̄ти.

екӯпосатхика̄тхерийа̄пада̄нам̣ пат̣хамам̣.