9. наваканипа̄то

1. бхӯтаттхерага̄тха̄

518. ‘‘йада̄ дуккхам̣ джара̄маран̣анти пан̣д̣ито, авиддасӯ йаттха сита̄ путхуджджана̄;

дуккхам̣ парин̃н̃а̄йа сатова джха̄йати, тато ратим̣ параматарам̣ на виндати.

519. ‘‘йада̄ дуккхасса̄ваханим̣ висаттикам̣, папан̃часан̇гха̄тадукха̄дхива̄хиним̣;

тан̣хам̣ пахантва̄на сатова джха̄йати, тато ратим̣ параматарам̣ на виндати.

520. ‘‘йада̄ сивам̣ двечатуран̇гага̄минам̣, маггуттамам̣ саббакилесасодханам̣;

пан̃н̃а̄йа пасситва сатова джха̄йати, тато ратим̣ параматарам̣ на виндати.

521. ‘‘йада̄ асокам̣ вираджам̣ асан̇кхатам̣, сантам̣ падам̣ саббакилесасодханам̣;

бха̄вети сан̃н̃оджанабандханаччхидам̣, тато ратим̣ параматарам̣ на виндати.

522. ‘‘йада̄ набхе гаджджати мегхадундубхи, дха̄ра̄кула̄ вихагапатхе самантато;

бхиккхӯ ча паббха̄рагатова джха̄йати, тато ратим̣ параматарам̣ на виндати.

523. ‘‘йада̄ надӣнам̣ кусума̄кула̄нам̣, вичитта-ва̄неййа-ват̣ам̣сака̄нам̣;

тӣре нисинно суманова джха̄йати, тато ратим̣ параматарам̣ на виндати.

524. ‘‘йада̄ нисӣтхе рахитамхи ка̄нане, деве гал̣антамхи наданти да̄т̣хино;

бхиккхӯ ча паббха̄рагатова джха̄йати, тато ратим̣ параматарам̣ на виндати.

525. ‘‘йада̄ витакке упарундхийаттано, нагантаре нагавиварам̣ самассито;

вӣтаддаро вӣтакхилова джха̄йати, тато ратим̣ параматарам̣ на виндати.

526. ‘‘йада̄ сукхӣ малакхиласокана̄сано, нираггал̣о ниббанатхо висалло;

сабба̄саве бйантикатова джха̄йати, тато ратим̣ параматарам̣ на виндатӣ’’ти.

… бхӯто тхеро….

наваканипа̄то нит̣т̣хито.