2. субхӯтаттхерага̄тха̄

320. ‘‘айоге йун̃джаматта̄нам̣, пурисо киччамиччхако [киччамиччхато (сӣ.), киччамиччхайам̣ (каттхачи)];

чарам̣ че на̄дхигаччхеййа, ‘там̣ ме дуббхагалаккхан̣ам̣’.

321. ‘‘аббӯл̣хам̣ агхагатам̣ виджитам̣, екан̃че оссаджеййа калӣва сийа̄;

сабба̄нипи че оссаджеййа андхова сийа̄, самависамасса адассанато.

322. ‘‘йан̃хи кайира̄ тан̃хи ваде, йам̣ на кайира̄ на там̣ ваде;

акаронтам̣ бха̄сама̄нам̣, париджа̄нанти пан̣д̣ита̄.

323. [дха. па. 51 дхаммападепи] ‘‘йатха̄пи ручирам̣ пуппхам̣, ван̣н̣авантам̣ агандхакам̣;

евам̣ субха̄сита̄ ва̄ча̄, апхала̄ хоти акуббато.

324. [дха. па. 52] ‘‘йатха̄пи ручирам̣ пуппхам̣, ван̣н̣авантам̣ сугандхакам̣ [сагандхакам̣ (сӣ. сйа̄. пӣ.)];

евам̣ субха̄сита̄ ва̄ча̄, сапхала̄ хоти куббато’’ти [сакуббато (сӣ. пӣ.), сукуббато (сйа̄.)].

… субхӯто тхеро….