12. косийаттхерага̄тха̄

370. ‘‘йо ве гарӯнам̣ вачанан̃н̃у дхӣро, васе ча тамхи джанайетха пемам̣;

со бхаттима̄ на̄ма ча хоти пан̣д̣ито, н̃атва̄ ча дхаммесу висеси асса.

371. ‘‘йам̣ а̄пада̄ уппатита̄ ул̣а̄ра̄, наккхамбхайанте пат̣исан̇кхайантам̣;

со тха̄мава̄ на̄ма ча хоти пан̣д̣ито, н̃атва̄ ча дхаммесу висеси асса.

372. ‘‘йо ве самуддова т̣хито анеджо, гамбхӣрапан̃н̃о нипун̣аттхадассӣ;

асам̣ха̄рийо на̄ма ча хоти пан̣д̣ито, н̃атва̄ ча дхаммесу висеси асса.

373. ‘‘бахуссуто дхаммадхаро ча хоти, дхаммасса хоти анудхаммача̄рӣ;

со та̄дисо на̄ма ча хоти пан̣д̣ито, н̃атва̄ ча дхаммесу висеси асса.

374. ‘‘аттхан̃ча йо джа̄на̄ти бха̄ситасса, аттхан̃ча н̃атва̄на татха̄ кароти;

аттхантаро на̄ма са хоти пан̣д̣ито, н̃атва̄ ча дхаммесу висеси асса̄’’ти.

… косийо тхеро….

пан̃чаканипа̄то нит̣т̣хито.