18. чатта̄лӣсанипа̄то

1. маха̄кассапаттхерага̄тха̄

1054. ‘‘на ган̣ена пураккхато чаре, вимано хоти сама̄дхи дуллабхо;

на̄на̄джанасан̇гахо дукхо, ити дисва̄на ган̣ам̣ на рочайе.

1055. ‘‘на кула̄ни упаббадже муни, вимано хоти сама̄дхи дуллабхо;

со уссукко раса̄нугиддхо, аттхам̣ рин̃чати йо сукха̄вахо.

1056. ‘‘пан̇коти хи нам̣ аведайум̣, йа̄йам̣ ванданапӯджана̄ кулесу;

сукхумам̣ салла дуруббахам̣, сакка̄ро ка̄пурисена дуджджахо.

1057. ‘‘сена̄санамха̄ оруйха, нагарам̣ пин̣д̣а̄йа па̄висим̣;

бхун̃джантам̣ пурисам̣ кут̣т̣хим̣, саккаччам̣ там̣ упат̣т̣хахим̣.

1058. ‘‘со ме [там̣ (сӣ. ка.)] паккена хаттхена, а̄лопам̣ упана̄майи;

а̄лопам̣ паккхипантасса, ан̇гули четтха [петтха (сӣ. ка.)] чхиджджатха.

1059. ‘‘кут̣т̣амӯлан̃ча [куд̣д̣амӯлан̃ча (сӣ. сйа̄.)] нисса̄йа, а̄лопам̣ там̣ абхун̃джисам̣;

бхун̃джама̄не ва̄ бхутте ва̄, джегуччхам̣ ме на виджджати.

1060. ‘‘уттит̣т̣хапин̣д̣о а̄ха̄ро, пӯтимуттан̃ча осадхам̣;

сена̄санам̣ руккхамӯлам̣, пам̣сукӯлан̃ча чӣварам̣;

йассете абхисамбхутва̄ [абхибхун̃джати (?)], са ве ча̄туддисо наро.

1061. ‘‘йаттха еке вихан̃н̃анти, а̄руханта̄ силуччайам̣;

тасса буддхасса да̄йа̄до, сампаджа̄но патиссато;

иддхибаленупаттхаддхо, кассапо абхирӯхати.

1062. ‘‘пин̣д̣апа̄тапат̣икканто, селама̄руйха кассапо;

джха̄йати анупа̄да̄но, пахӣнабхайабхераво.

1063. ‘‘пин̣д̣апа̄тапат̣икканто, селама̄руйха кассапо;

джха̄йати анупа̄да̄но, д̣айхама̄несу ниббуто.

1064. ‘‘пин̣д̣апа̄тапат̣икканто, селама̄руйха кассапо;

джха̄йати анупа̄да̄но, катакиччо ана̄саво.

1065. ‘‘карерима̄ла̄витата̄, бхӯмибха̄га̄ манорама̄;

кун̃джара̄бхируда̄ рамма̄, те села̄ рамайанти мам̣.

1066. ‘‘нӣлаббхаван̣н̣а̄ ручира̄, ва̄рисӣта̄ сучиндхара̄;

индагопакасан̃чханна̄, те села̄ рамайанти мам̣.

1067. ‘‘нӣлаббхакӯт̣асадиса̄, кӯт̣а̄га̄раварӯпама̄;

ва̄ран̣а̄бхируда̄ рамма̄, те села̄ рамайанти мам̣.

1068. ‘‘абхивут̣т̣ха̄ рамматала̄, нага̄ исибхи севита̄;

аббхуннадита̄ сикхӣхи, те села̄ рамайанти мам̣.

1069. ‘‘алам̣ джха̄йитука̄масса, пахитаттасса ме сато;

алам̣ ме аттхака̄масса [аттака̄масса (?)], пахитаттасса бхиккхуно.

1070. ‘‘алам̣ ме пха̄сука̄масса, пахитаттасса бхиккхуно;

алам̣ ме йогака̄масса, пахитаттасса та̄дино.

1071. ‘‘ума̄пуппхена сама̄на̄, гагана̄ваббхачха̄дита̄;

на̄на̄диджаган̣а̄кин̣н̣а̄, те села̄ рамайанти мам̣.

1072. ‘‘ана̄кин̣н̣а̄ гахат̣т̣хехи, мигасан̇гханисевита̄;

на̄на̄диджаган̣а̄кин̣н̣а̄, те села̄ рамайанти мам̣.

1073. ‘‘аччходика̄ путхусила̄, гонан̇гуламига̄йута̄;

амбусева̄ласан̃чханна̄, те села̄ рамайанти мам̣.

1074. ‘‘на пан̃чан̇гикена турийена, рати ме хоти та̄дисӣ;

йатха̄ екаггачиттасса, самма̄ дхаммам̣ випассато.

1075. ‘‘каммам̣ бахукам̣ на ка̄райе, париваджджеййа джанам̣ на уййаме;

уссукко со раса̄нугиддхо, аттхам̣ рин̃чати йо сукха̄вахо.

1076. ‘‘каммам̣ бахукам̣ на ка̄райе, париваджджеййа анаттанеййаметам̣;

киччхати ка̄йо киламати, дуккхито со саматхам̣ на виндати.

1077. ‘‘от̣т̣хаппахатаматтена, атта̄нампи на пассати;

паттхаддхагӣво чарати, ахам̣ сеййоти ман̃н̃ати.

1078. ‘‘асеййо сеййасама̄нам̣, ба̄ло ман̃н̃ати атта̄нам̣;

на там̣ вин̃н̃ӯ пасам̣санти, паттхаддхама̄насам̣ нарам̣.

1079. ‘‘йо ча сеййохамасмӣти, на̄хам̣ сеййоти ва̄ пана;

хӣно там̣садисо [тӣнохам̣ садисо (сйа̄.)] ва̄ти, видха̄су на викампати.

1080. ‘‘пан̃н̃авантам̣ татха̄ та̄дим̣, сӣлесу сусама̄хитам̣;

четосаматхамануттам̣, тан̃че вин̃н̃ӯ пасам̣саре.

1081. ‘‘йасса сабрахмача̄рӣсу, га̄раво нӯпалаббхати;

а̄рака̄ хоти саддхамма̄, набхато путхавӣ йатха̄.

1082. ‘‘йесан̃ча хири оттаппам̣, сада̄ самма̄ упат̣т̣хитам̣;

вирӯл̣хабрахмачарийа̄ те, тесам̣ кхӣн̣а̄ пунаббхава̄.

1083. ‘‘уддхато чапало бхиккху, пам̣сукӯлена па̄руто;

капӣва сӣхачаммена, на со тенупасобхати.

1084. ‘‘ануддхато ачапало, нипако сам̣вутиндрийо;

собхати пам̣сукӯлена, сӣхова гиригаббхаре.

1085. ‘‘ете самбахула̄ дева̄, иддхиманто йасассино;

дасадевасахасса̄ни, саббе те брахмака̄йика̄.

1086. ‘‘дхаммасена̄патим̣ вӣрам̣, маха̄джха̄йим̣ сама̄хитам̣;

са̄рипуттам̣ намассанта̄, тит̣т̣ханти пан̃джалӣката̄.

1087. ‘‘‘намо те пуриса̄джан̃н̃а, намо те пурисуттама;

йасса те на̄бхиджа̄на̄ма, йампи нисса̄йа джха̄йати [джха̄йаси (ка. ат̣т̣ха.)].

1088. ‘‘‘аччхерам̣ вата буддха̄нам̣, гамбхӣро гочаро сако;

йе майам̣ на̄бхиджа̄на̄ма, ва̄лаведхисама̄гата̄’.

1089. ‘‘там̣ татха̄ девака̄йехи, пӯджитам̣ пӯджана̄рахам̣;

са̄рипуттам̣ тада̄ дисва̄, каппинасса ситам̣ аху.

1090. ‘‘йа̄вата̄ буддхакхеттамхи, т̣хапайитва̄ маха̄муним̣;

дхутагун̣е висит̣т̣хохам̣, садисо ме на виджджати.

1091. ‘‘паричин̣н̣о майа̄ саттха̄, катам̣ буддхасса са̄санам̣;

охито гаруко бха̄ро, наттхи да̄ни пунаббхаво.

1092. ‘‘на чӣваре на сайане, бходжане нупалимпати;

готамо анаппамеййо, мул̣а̄лапуппхам̣ вималам̣ва;

амбуна̄ неккхамманинно, тибхава̄бхиниссат̣о.

1093. ‘‘сатипат̣т̣ха̄нагӣво со, саддха̄хаттхо маха̄муни;

пан̃н̃а̄сӣсо маха̄н̃а̄н̣ӣ, сада̄ чарати ниббуто’’ти.

… маха̄кассапо тхеро….

чатта̄лӣсанипа̄то нит̣т̣хито.