1. кхадираванийаревататтхерага̄тха̄

645. ‘‘йада̄ ахам̣ паббаджито, ага̄расма̄нага̄рийам̣;

на̄бхиджа̄на̄ми сан̇каппам̣, анарийам̣ досасам̣хитам̣.

646. ‘‘‘име хан̃н̃анту ваджджханту, дуккхам̣ паппонту па̄н̣ино’;

сан̇каппам̣ на̄бхиджа̄на̄ми, имасмим̣ дӣгхамантаре.

647. ‘‘меттан̃ча абхиджа̄на̄ми, аппама̄н̣ам̣ субха̄витам̣;

анупуббам̣ паричитам̣, йатха̄ буддхена деситам̣.

648. ‘‘саббамитто саббасакхо, саббабхӯта̄нукампако;

меттачиттан̃ча [меттам̣ читтам̣ (сӣ. сйа̄.)] бха̄веми, абйа̄паджджарато [абйа̄паджджхарато (сӣ. сйа̄.)] сада̄.

649. ‘‘асам̣хӣрам̣ асам̣куппам̣, читтам̣ а̄модайа̄махам̣;

брахмавиха̄рам̣ бха̄веми, ака̄пурисасевитам̣.

650. ‘‘авитаккам̣ сама̄панно, самма̄самбуддхаса̄вако;

арийена тун̣хӣбха̄вена, упето хоти та̄ваде.

651. ‘‘йатха̄пи паббато село, ачало суппатит̣т̣хито;

евам̣ мохаккхайа̄ бхиккху, паббатова на ведхати.

652. ‘‘анан̇ган̣асса посасса, ниччам̣ сучигавесино;

ва̄лаггаматтам̣ па̄пасса, аббхаматтам̣ва кха̄йати.

653. ‘‘нагарам̣ йатха̄ паччантам̣, гуттам̣ сантараба̄хирам̣;

евам̣ гопетха атта̄нам̣, кхан̣о во ма̄ упаччага̄.

654. ‘‘на̄бхинанда̄ми маран̣ам̣, на̄бхинанда̄ми джӣвитам̣;

ка̄лан̃ча пат̣икан̇кха̄ми, ниббисам̣ бхатако йатха̄.

655. ‘‘на̄бхинанда̄ми маран̣ам̣…пе… сампаджа̄но патиссато.

656. ‘‘паричин̣н̣о майа̄ саттха̄, катам̣ буддхасса са̄санам̣;

охито гаруко бха̄ро, бхаванетти самӯхата̄.

657. ‘‘йасса чаттха̄йа паббаджито, ага̄расма̄нага̄рийам̣;

со ме аттхо ануппатто, саббасам̣йоджанаккхайо.

658. ‘‘сампа̄детхаппама̄дена, еса̄ ме ануса̄санӣ;

ханда̄хам̣ париниббиссам̣, виппамуттомхи саббадхӣ’’ти.

… кхадираванийаревато тхеро….