12. два̄дасаканипа̄то

1. сӣлаваттхерага̄тха̄

608. ‘‘сӣламевидха сиккхетха, асмим̣ локе сусиккхитам̣;

сӣлам̣ хи саббасампаттим̣, упана̄мети севитам̣.

609. ‘‘сӣлам̣ раккхеййа медха̄вӣ, паттхайа̄но тайо сукхе;

пасам̣сам̣ виттила̄бхан̃ча, печча сагге памоданам̣ [печча сагге ча моданам̣ (сӣ. пӣ.)].

610. ‘‘сӣлава̄ хи бахӯ митте, сан̃н̃амена̄дхигаччхати;

дуссӣло пана миттехи, дхам̣сате па̄пама̄чарам̣.

611. ‘‘аван̣н̣ан̃ча акиттин̃ча, дуссӣло лабхате наро;

ван̣н̣ам̣ киттим̣ пасам̣сан̃ча, сада̄ лабхати сӣлава̄.

612. ‘‘а̄ди сӣлам̣ патит̣т̣ха̄ ча, калйа̄н̣а̄нан̃ча ма̄тукам̣;

памукхам̣ саббадхамма̄нам̣, тасма̄ сӣлам̣ висодхайе.

613. ‘‘вела̄ ча сам̣варам̣ сӣлам̣ [сам̣варо сӣлам̣ (сӣ.), сам̣варасӣлам̣ (сӣ. ат̣т̣ха.)], читтасса абхиха̄санам̣;

титтхан̃ча саббабуддха̄нам̣, тасма̄ сӣлам̣ висодхайе.

614. ‘‘сӣлам̣ балам̣ аппат̣имам̣, сӣлам̣ а̄вудхамуттамам̣;

сӣлама̄бхаран̣ам̣ сет̣т̣хам̣, сӣлам̣ кавачамаббхутам̣.

615. ‘‘сӣлам̣ сету махесаккхо, сӣлам̣ гандхо ануттаро;

сӣлам̣ вилепанам̣ сет̣т̣хам̣, йена ва̄ти дисодисам̣.

616. ‘‘сӣлам̣ самбаламеваггам̣, сӣлам̣ па̄тхеййамуттамам̣;

сӣлам̣ сет̣т̣хо атива̄хо, йена йа̄ти дисодисам̣.

617. ‘‘идхева ниндам̣ лабхати, печча̄па̄йе ча думмано;

саббаттха думмано ба̄ло, сӣлесу асама̄хито.

618. ‘‘идхева киттим̣ лабхати, печча сагге ча суммано;

саббаттха сумано дхӣро, сӣлесу сусама̄хито.

619. ‘‘сӣламева идха аггам̣, пан̃н̃ава̄ пана уттамо;

мануссесу ча девесу, сӣлапан̃н̃а̄н̣ато джайа’’нти.

… сӣлаво тхеро….

2. сунӣтаттхерага̄тха̄

620. ‘‘нӣче куламхи джа̄тохам̣, далиддо аппабходжано;

хӣнакаммам̣ [хӣнам̣ каммам̣ (сйа̄.)] мамам̣ а̄си, ахосим̣ пуппхачхад̣д̣ако.

621. ‘‘джигуччхито манусса̄нам̣, парибхӯто ча вамбхито;

нӣчам̣ манам̣ каритва̄на, вандиссам̣ бахукам̣ джанам̣.

622. ‘‘атхаддаса̄сим̣ самбуддхам̣, бхиккхусан̇гхапураккхатам̣;

пависантам̣ маха̄вӣрам̣, магадха̄нам̣ пуруттамам̣.

623. ‘‘никкхипитва̄на бйа̄бхан̇гим̣, вандитум̣ упасан̇камим̣;

мамева анукампа̄йа, ат̣т̣ха̄си пурисуттамо.

624. ‘‘вандитва̄ саттхуно па̄де, екамантам̣ т̣хито тада̄;

паббаджджам̣ ахама̄йа̄чим̣, саббасатта̄намуттамам̣.

625. ‘‘тато ка̄рун̣ико саттха̄, саббалока̄нукампако;

‘ехи бхиккхӯ’ти мам̣ а̄ха, са̄ ме а̄сӯпасампада̄.

626. ‘‘сохам̣ еко аран̃н̃асмим̣, вихаранто атандито;

ака̄сим̣ саттхувачанам̣, йатха̄ мам̣ овадӣ джино.

627. ‘‘раттийа̄ пат̣хамам̣ йа̄мам̣, пуббаджа̄тимануссарим̣;

раттийа̄ маджджхимам̣ йа̄мам̣, диббачаккхум̣ висодхайим̣ [диббачаккху висодхитам̣ (ка.)];

раттийа̄ паччхиме йа̄ме, тамокхандхам̣ пада̄лайим̣.

628. ‘‘тато ратйа̄ виваса̄не, сӯрийассуггаманам̣ пати;

индо брахма̄ ча а̄гантва̄, мам̣ намассим̣су пан̃джалӣ.

629. ‘‘‘намо те пуриса̄джан̃н̃а, намо те пурисуттама;

йасса те а̄сава̄ кхӣн̣а̄, даккхин̣еййоси ма̄риса’.

630. ‘‘тато дисва̄на мам̣ саттха̄, девасан̇гхапураккхатам̣;

ситам̣ па̄тукаритва̄на, имаматтхам̣ абха̄сатха.

631. [су. ни. 660 суттанипа̄тепи] ‘‘‘тапена брахмачарийена, сам̣йамена дамена ча;

етена бра̄хман̣о хоти, етам̣ бра̄хман̣амуттама’’’нти.

… сунӣто тхеро….

два̄дасаканипа̄то нит̣т̣хито.