8. а̄дӣнаван̃а̄н̣аниддесо

53. катхам̣ бхайатупат̣т̣ха̄не пан̃н̃а̄ а̄дӣнаве н̃а̄н̣ам̣? уппа̄до бхайанти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣. паваттам̣ бхайанти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣. нимиттам̣ бхайанти…пе… а̄йӯхана̄ бхайанти…пе… пат̣исандхи бхайанти… гати бхайанти… ниббатти бхайанти… упапатти бхайанти… джа̄ти бхайанти… джара̄ бхайанти… бйа̄дхи бхайанти … маран̣ам̣ бхайанти… соко бхайанти… паридево бхайанти… упа̄йа̄со бхайанти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣.

ануппа̄до кхеманти – сантипаде н̃а̄н̣ам̣. аппаваттам̣ кхеманти – сантипаде н̃а̄н̣ам̣…пе… анупа̄йа̄со кхеманти – сантипаде н̃а̄н̣ам̣.

уппа̄до бхайам̣, ануппа̄до кхеманти – сантипаде н̃а̄н̣ам̣. паваттам̣ бхайам̣, аппаваттам̣ кхеманти – сантипаде н̃а̄н̣ам̣…пе… упа̄йа̄со бхайам̣, анупа̄йа̄со кхеманти – сантипаде н̃а̄н̣ам̣.

уппа̄до дуккханти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣. паваттам̣ дуккханти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣…пе… упа̄йа̄со дуккханти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣.

ануппа̄до сукханти – сантипаде н̃а̄н̣ам̣. аппаваттам̣ сукханти – сантипаде н̃а̄н̣ам̣…пе… анупа̄йа̄со сукханти – сантипаде н̃а̄н̣ам̣.

уппа̄до дуккхам̣, ануппа̄до сукханти – сантипаде н̃а̄н̣ам̣. паваттам̣ дуккхам̣, аппаваттам̣ сукханти – сантипаде н̃а̄н̣ам̣…пе… упа̄йа̄со дуккхам̣, анупа̄йа̄со сукханти – сантипаде н̃а̄н̣ам̣.

уппа̄до са̄мисанти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣. паваттам̣ са̄мисанти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣…пе… упа̄йа̄со са̄мисанти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣.

ануппа̄до нира̄мисанти – сантипаде н̃а̄н̣ам̣. аппаваттам̣ нира̄мисанти – сантипаде н̃а̄н̣ам̣…пе… анупа̄йа̄со нира̄мисанти – сантипаде н̃а̄н̣ам̣.

уппа̄до са̄мисам̣, ануппа̄до нира̄мисанти – сантипаде н̃а̄н̣ам̣. паваттам̣ са̄мисам̣, аппаваттам̣ нира̄мисанти – сантипаде н̃а̄н̣ам̣…пе… упа̄йа̄со са̄мисам̣, анупа̄йа̄со нира̄мисанти – сантипаде н̃а̄н̣ам̣.

уппа̄до сан̇кха̄ра̄ти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣. паваттам̣ сан̇кха̄ра̄ти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣…пе… упа̄йа̄со сан̇кха̄ра̄ти – бхайатупат̣т̣ха̄не пан̃н̃а̄ а̄дӣнаве н̃а̄н̣ам̣.

ануппа̄до нибба̄нанти – сантипаде н̃а̄н̣ам̣. аппаваттам̣ нибба̄нанти – сантипаде н̃а̄н̣ам̣…пе… анупа̄йа̄со нибба̄нанти – сантипаде н̃а̄н̣ам̣.

уппа̄до сан̇кха̄ра̄, ануппа̄до нибба̄нанти – сантипаде н̃а̄н̣ам̣. паваттам̣ сан̇кха̄ра̄, аппаваттам̣ нибба̄нанти – сантипаде н̃а̄н̣ам̣…пе… упа̄йа̄со сан̇кха̄ра̄, анупа̄йа̄со нибба̄нанти – сантипаде н̃а̄н̣ам̣.

уппа̄дан̃ча паваттан̃ча, нимиттам̣ дуккханти пассати;

а̄йӯханам̣ пат̣исандхим̣, н̃а̄н̣ам̣ а̄дӣнаве идам̣.

ануппа̄дам̣ аппаваттам̣, анимиттам̣ сукханти ча;

ана̄йӯханам̣ аппат̣исандхим̣, н̃а̄н̣ам̣ сантипаде идам̣.

идам̣ а̄дӣнаве н̃а̄н̣ам̣, пан̃чат̣ха̄несу джа̄йати;

пан̃чат̣ха̄не сантипаде, даса н̃а̄н̣е паджа̄на̄ти;

двиннам̣ н̃а̄н̣а̄нам̣ кусалата̄, на̄на̄дит̣т̣хӣсу на кампатӣти.

там̣ н̃а̄тат̣т̣хена н̃а̄н̣ам̣, паджа̄нанат̣т̣хена пан̃н̃а̄. тена вуччати – ‘‘бхайатупат̣т̣ха̄не пан̃н̃а̄ а̄дӣнаве н̃а̄н̣ам̣’’.

а̄дӣнаван̃а̄н̣аниддесо ат̣т̣хамо.