52. четопарийан̃а̄н̣аниддесо

104. катхам̣ тин̣н̣ам̣ читта̄нам̣ виппха̄ратта̄ индрийа̄нам̣ паса̄давасена на̄наттекаттавин̃н̃а̄н̣ачарийа̄парийога̄хан̣е пан̃н̃а̄ четопарийан̃а̄н̣ам̣? идха бхиккху чхандасама̄дхипадха̄насан̇кха̄расаманна̄гатам̣ иддхипа̄дам̣ бха̄вети, вӣрийасама̄дхи…пе… читтасама̄дхи…пе… вӣмам̣са̄сама̄дхипадха̄насан̇кха̄расаманна̄гатам̣ иддхипа̄дам̣ бха̄вети. со имесу чатӯсу иддхипа̄десу читтам̣ парибха̄вети паридамети, мудум̣ кароти камманийам̣. со имесу чатӯсу иддхипа̄десу читтам̣ парибха̄ветва̄ паридаметва̄, мудум̣ каритва̄ камманийам̣ евам̣ паджа̄на̄ти – ‘‘идам̣ рӯпам̣ соманассиндрийасамут̣т̣хитам̣, идам̣ рӯпам̣ доманассиндрийасамут̣т̣хитам̣, идам̣ рӯпам̣ упеккхиндрийасамут̣т̣хита’’нти. со татха̄бха̄витена читтена парисуддхена парийода̄тена четопарийан̃а̄н̣а̄йа читтам̣ абхинӣхарати абхининна̄мети. со парасатта̄нам̣ парапуггала̄нам̣ четаса̄ чето паричча паджа̄на̄ти – сара̄гам̣ ва̄ читтам̣ ‘‘сара̄гам̣ читта’’нти паджа̄на̄ти, вӣтара̄гам̣ ва̄ читтам̣ ‘‘вӣтара̄гам̣ читта’’нти паджа̄на̄ти, садосам̣ ва̄ читтам̣…пе… вӣтадосам̣ ва̄ читтам̣… самохам̣ ва̄ читтам̣… вӣтамохам̣ ва̄ читтам̣… сам̣кхиттам̣ ва̄ читтам̣… виккхиттам̣ ва̄ читтам̣… махаггатам̣ ва̄ читтам̣… амахаггатам̣ ва̄ читтам̣… сауттарам̣ ва̄ читтам̣… ануттарам̣ ва̄ читтам̣… сама̄хитам̣ ва̄ читтам̣… асама̄хитам̣ ва̄ читтам̣… вимуттам̣ ва̄ читтам̣… авимуттам̣ ва̄ читтам̣ ‘‘авимуттам̣ читтанти паджа̄на̄ти. там̣ н̃а̄тат̣т̣хена н̃а̄н̣ам̣, паджа̄нанат̣т̣хена пан̃н̃а̄. тена вуччати – ‘‘тин̣н̣ам̣ читта̄нам̣ виппха̄ратта̄ индрийа̄нам̣ паса̄давасена на̄наттекаттавин̃н̃а̄н̣ачарийа̄парийога̄хан̣е пан̃н̃а̄ четопарийан̃а̄н̣ам̣’’.

четопарийан̃а̄н̣аниддесо двепан̃н̃а̄само.