32. а̄нантарикасама̄дхин̃а̄н̣аниддесо

80. катхам̣ авиккхепапарисуддхатта̄ а̄савасамуччхеде пан̃н̃а̄ а̄нантарикасама̄дхимхи н̃а̄н̣ам̣? неккхаммавасена читтасса екаггата̄ авиккхепо сама̄дхи. тасса сама̄дхисса васена уппаджджати н̃а̄н̣ам̣. тена н̃а̄н̣ена а̄сава̄ кхӣйанти. ити пат̣хамам̣ саматхо, паччха̄ н̃а̄н̣ам̣. тена н̃а̄н̣ена а̄сава̄нам̣ кхайо хоти. тена вуччати – ‘‘авиккхепапарисуддхатта̄ а̄савасамуччхеде пан̃н̃а̄ а̄нантарикасама̄дхимхи н̃а̄н̣ам̣’’.

а̄сава̄ти катаме те а̄сава̄? ка̄ма̄саво, бхава̄саво, дит̣т̣ха̄саво, авиджджа̄саво. каттхете а̄сава̄ кхӣйанти? сота̄паттимаггена анавасесо дит̣т̣ха̄саво кхӣйати, апа̄йагаманӣйо ка̄ма̄саво кхӣйати, апа̄йагаманӣйо бхава̄саво кхӣйати, апа̄йагаманӣйо авиджджа̄саво кхӣйати. еттхете а̄сава̄ кхӣйанти. сакада̄га̄мимаггена ол̣а̄рико ка̄ма̄саво кхӣйати, тадекат̣т̣хо бхава̄саво кхӣйати, тадекат̣т̣хо авиджджа̄саво кхӣйати. еттхете а̄сава̄ кхӣйанти. ана̄га̄мимаггена анавасесо ка̄ма̄саво кхӣйати, тадекат̣т̣хо бхава̄саво кхӣйати, тадекат̣т̣хо авиджджа̄саво кхӣйати. еттхете а̄сава̄ кхӣйанти. арахаттамаггена анавасесо бхава̄саво кхӣйати, анавасесо авиджджа̄саво кхӣйати. еттхете а̄сава̄ кхӣйанти.

абйа̄па̄давасена …пе… а̄локасан̃н̃а̄васена… авиккхепавасена… дхаммававаттха̄навасена… н̃а̄н̣авасена… па̄моджджавасена… пат̣хамаджджха̄навасена… дутийаджджха̄навасена… татийаджджха̄навасена… чатуттхаджджха̄навасена… а̄ка̄са̄нан̃ча̄йатанасама̄паттивасена… вин̃н̃а̄н̣ан̃ча̄йатанасама̄паттивасена… а̄кин̃чан̃н̃а̄йатанасама̄паттивасена… невасан̃н̃а̄на̄сан̃н̃а̄йатанасама̄паттивасена… патхавӣкасин̣авасена… а̄покасин̣авасена … теджокасин̣авасена… ва̄йокасин̣авасена… нӣлакасин̣авасена… пӣтакасин̣авасена… лохитакасин̣авасена… ода̄такасин̣авасена… а̄ка̄сакасин̣авасена… вин̃н̃а̄н̣акасин̣авасена… буддха̄нуссативасена… дхамма̄нуссативасена… сан̇гха̄нуссативасена… сӣла̄нуссативасена… ча̄га̄нуссативасена… девата̄нуссативасена… а̄на̄па̄нассативасена… маран̣ассативасена… ка̄йагата̄сативасена… упасама̄нуссативасена… уддхума̄такасан̃н̃а̄васена… винӣлакасан̃н̃а̄васена… випуббакасан̃н̃а̄васена… виччхиддакасан̃н̃а̄васена… виккха̄йитакасан̃н̃а̄васена… виккхиттакасан̃н̃а̄васена… хатавиккхиттакасан̃н̃а̄васена … лохитакасан̃н̃а̄васена… пул̣авакасан̃н̃а̄васена… ат̣т̣хикасан̃н̃а̄васена.

81. дӣгхам̣ асса̄савасена…пе… дӣгхам̣ пасса̄савасена… рассам̣ асса̄савасена… рассам̣ пасса̄савасена… саббака̄йапат̣исам̣ведӣ асса̄савасена… саббака̄йапат̣исам̣ведӣ пасса̄савасена… пассамбхайам̣ ка̄йасан̇кха̄рам̣ асса̄савасена… пассамбхайам̣ ка̄йасан̇кха̄рам̣ пасса̄савасена… пӣтипат̣исам̣ведӣ асса̄савасена… пӣтипат̣исам̣ведӣ пасса̄савасена… сукхапат̣исам̣ведӣ асса̄савасена… сукхапат̣исам̣ведӣ пасса̄савасена… читтасан̇кха̄рапат̣исам̣ведӣ асса̄савасена… читтасан̇кха̄рапат̣исам̣ведӣ пасса̄савасена… пассамбхайам̣ читтасан̇кха̄рам̣ асса̄савасена… пассамбхайам̣ читтасан̇кха̄рам̣ пасса̄савасена… читтапат̣исам̣ведӣ асса̄савасена… читтапат̣исам̣ведӣ пасса̄савасена… абхиппамодайам̣ читтам̣ асса̄савасена… абхиппамодайам̣ читтам̣ пасса̄савасена… сама̄дахам̣ читтам̣…пе… вимочайам̣ читтам̣… аничча̄нупассӣ … вира̄га̄нупассӣ… ниродха̄нупассӣ… пат̣иниссагга̄нупассӣ асса̄савасена… пат̣иниссагга̄нупассӣ пасса̄савасена читтасса екаггата̄ авиккхепо сама̄дхи. тасса сама̄дхисса васена уппаджджати н̃а̄н̣ам̣, тена н̃а̄н̣ена а̄сава̄ кхӣйанти. ити пат̣хамам̣ саматхо, паччха̄ н̃а̄н̣ам̣. тена н̃а̄н̣ена а̄сава̄нам̣ кхайо хоти. тена вуччати – ‘‘авиккхепапарисуддхатта̄ а̄савасамуччхеде пан̃н̃а̄ а̄нантарикасама̄дхимхи н̃а̄н̣ам̣’’.

а̄сава̄ти катаме те а̄сава̄? ка̄ма̄саво, бхава̄саво, дит̣т̣ха̄саво, авиджджа̄саво. каттхете а̄сава̄ кхӣйанти? сота̄паттимаггена анавасесо дит̣т̣ха̄саво кхӣйати, апа̄йагаманӣйо ка̄ма̄саво кхӣйати, апа̄йагаманӣйо бхава̄саво кхӣйати, апа̄йагаманӣйо авиджджа̄саво кхӣйати. еттхете а̄сава̄ кхӣйанти. сакада̄га̄мимаггена ол̣а̄рико ка̄ма̄саво кхӣйати, тадекат̣т̣хо бхава̄саво кхӣйати, тадекат̣т̣хо авиджджа̄саво кхӣйати. еттхете а̄сава̄ кхӣйанти. ана̄га̄мимаггена анавасесо ка̄ма̄саво кхӣйати, тадекат̣т̣хо бхава̄саво кхӣйати, тадекат̣т̣хо авиджджа̄саво кхӣйати. еттхете а̄сава̄ кхӣйанти. арахаттамаггена анавасесо бхава̄саво кхӣйати, анавасесо авиджджа̄саво кхӣйати. еттхете а̄сава̄ кхӣйанти. там̣ н̃а̄тат̣т̣хена н̃а̄н̣ам̣, паджа̄нанат̣т̣хена пан̃н̃а̄. тена вуччати – ‘‘авиккхепапарисуддхатта̄ а̄савасамуччхеде пан̃н̃а̄ а̄нантарикасама̄дхимхи н̃а̄н̣ам̣’’.

а̄нантарикасама̄дхин̃а̄н̣аниддесо дваттим̣сатимо.