10. сучимукхӣсуттаван̣н̣ана̄

341. дасаме сучимукхӣти евам̣на̄мика̄. упасан̇камӣти тхерам̣ абхирӯпам̣ дассанӣйам̣ суван̣н̣аван̣н̣ам̣ самантапа̄са̄дикам̣ дисва̄ ‘‘имина̄ саддхим̣ париха̄сам̣ карисса̄мӣ’’ти упасан̇ками. атха тхерена тасмим̣ вачане пат̣иккхитте ‘‘ида̄нисса ва̄дам̣ а̄ропесса̄мӣ’’ти ман̃н̃ама̄на̄ тена хи, саман̣а, уббхамукхо бхун̃джасӣти а̄ха. диса̄мукхоти чатуддиса̄мукхо, чатассо диса̄ олокентоти аттхо. видиса̄мукхоти чатассо видиса̄ олокенто.

ваттхувиджджа̄тираччха̄навиджджа̄йа̄ти ваттхувиджджа̄сан̇кха̄та̄йа тираччха̄навиджджа̄йа. ваттхувиджджа̄ на̄ма ла̄буваттху-кумбхан̣д̣аваттху-мӯлакаваттху-а̄дӣнам̣ ваттхӯнам̣ пхаласампаттика̄ран̣ака̄ладжа̄нанупа̄йо. миччха̄джӣвена джӣвикам̣ каппентӣти тенева ваттхувиджджа̄тираччха̄навиджджа̄сан̇кха̄тена миччха̄джӣвена джӣвикам̣ каппенти, тесам̣ ваттхӯнам̣ сампа̄данена пасаннехи мануссехи динне паччайе парибхун̃джанта̄ джӣвантӣти аттхо. адхомукха̄ти ваттхум̣ олокетва̄ бхун̃джама̄навасена адхомукха̄ бхун̃джанти на̄ма. евам̣ саббаттха йоджана̄ ка̄табба̄. апи четтха наккхаттавиджджа̄ти ‘‘аджджа имам̣ наккхаттам̣ имина̄ наккхаттена гантаббам̣, имина̄ идан̃чидан̃ча ка̄табба’’нти евам̣ джа̄нанавиджджа̄. дӯтеййанти дӯтакаммам̣, тесам̣ тесам̣ са̄санам̣ гахетва̄ таттха таттха гаманам̣. пахин̣агамананти екага̄масмим̣йева екакуласса са̄санена ан̃н̃акулам̣ упасан̇каманам̣. ан̇гавиджджа̄ти иттхилаккхан̣апурисалаккхан̣авасена ан̇гасампаттим̣ н̃атва̄ ‘‘та̄йа ан̇гасампаттийа̄ идам̣ на̄ма лаббхатӣ’’ти евам̣ джа̄нанавиджджа̄. видиса̄мукха̄ти ан̇гавиджджа̄ хи там̣ там̣ сарӣракот̣т̣ха̄сам̣ а̄раббха паваттатта̄ видиса̄йа паватта̄ на̄ма, тасма̄ та̄йа виджджа̄йа джӣвикам̣ каппетва̄ бхун̃джанта̄ видиса̄мукха̄ бхун̃джанти на̄ма. евама̄рочесӣти ‘‘дхаммикам̣ саман̣а̄’’тиа̄дӣни вадама̄на̄ са̄санасса ниййа̄никам̣ гун̣ам̣ катхеси. тан̃ча парибба̄джика̄йа катхам̣ сутва̄ пан̃чаматта̄ни куласата̄ни са̄сане отарим̣сӯти.

са̄рипуттасам̣йуттаван̣н̣ана̄ нит̣т̣хита̄.