11. вала̄хакасам̣йуттаван̣н̣ана̄

550-606. вала̄хакасам̣йутте вала̄хакака̄йика̄ти вала̄хакана̄маке девака̄йе уппанна̄ а̄ка̄сача̄рикадева̄. сӣтавала̄хака̄ти сӣтакаран̣авала̄хака̄. сесападесупи есева найо. четопан̣идхиманва̄йа̄ти читтат̣т̣хапанам̣ а̄гамма. сӣтам̣ хотӣти йам̣ васса̄не ва̄ хеманте ва̄ сӣтам̣ хоти, там̣ утусамут̣т̣ха̄намева. йам̣ пана сӣтепи атисӣтам̣, гимхе ча уппаннам̣ сӣтам̣, там̣ девата̄нубха̄вена ниббаттам̣ сӣтам̣ на̄ма. ун̣хам̣ хотӣти йам̣ гимха̄не ун̣хам̣, там̣ утусамут̣т̣ха̄никам̣ па̄катикамева. йам̣ пана ун̣хепи атиун̣хам̣, сӣтака̄ле ча уппаннам̣ ун̣хам̣, там̣ девата̄нубха̄вена ниббаттам̣ ун̣хам̣ на̄ма. аббхам̣ хотӣти аббхаман̣д̣апо хоти. идха̄пи йам̣ васса̄не ча сисире ча аббхам̣ уппаджджати, там̣ утусамут̣т̣ха̄никам̣ па̄катикамева. йам̣ пана аббхейева атиаббхам̣, саттасатта̄хампи чандасӯрийе чха̄детва̄ екандхака̄рам̣ кароти, йан̃ча читтавеса̄кхама̄сесу аббхам̣, там̣ девата̄нубха̄вена уппаннам̣ аббхам̣ на̄ма. ва̄то хотӣти йо тасмим̣ тасмим̣ утумхи уттарадаккхин̣а̄дипакатива̄то хоти, айам̣ утусамут̣т̣ха̄нова. йопи пана руккхаккхандха̄дипада̄лано атива̄то на̄ма аттхи, айан̃чева, йо ча ан̃н̃опи ака̄лава̄то, айам̣ девата̄нубха̄ваниббатто на̄ма. дево вассатӣти йам̣ вассике чатта̄ро ма̄се вассам̣, там̣ утусамут̣т̣ха̄намева. йам̣ пана вассейева ативассам̣, йан̃ча читтавеса̄кхама̄сесу вассам̣, там̣ девата̄нубха̄ваниббаттам̣ на̄ма.

татридам̣ ваттху – еко кира вассавала̄хакадевапутто талакӯт̣акава̄си кхӣн̣а̄саваттхерасса сантикам̣ гантва̄ вандитва̄ ат̣т̣ха̄си. тхеро ‘‘коси тва’’нти пуччхи. ‘‘ахам̣, бханте, вассавала̄хакадевапутто’’ти. ‘‘тумха̄кам̣ кира читтена дево вассатӣ’’ти? ‘‘а̄ма, бханте’’ти. ‘‘пасситука̄ма̄ майа’’нти. ‘‘темиссатха, бханте’’ти. ‘‘мегхасӣсам̣ ва̄ гаджджитам̣ ва̄ на пан̃н̃а̄йати, катхам̣ темисса̄ма̄’’ти? ‘‘бханте, амха̄кам̣читтена дево вассати, тумхе пан̣н̣аса̄лам̣ пависатха̄’’ти. ‘‘са̄дху девапутта̄’’ти со па̄де дховитва̄ пан̣н̣аса̄лам̣ па̄виси. девапутто тасмим̣ пависантейева екам̣ гӣтам̣ га̄йитва̄ хаттхам̣ уккхипи. саманта̄ тийоджанат̣т̣ха̄нам̣ екамегхам̣ ахоси. тхеро аддхатинто пан̣н̣аса̄лам̣ павит̣т̣хоти. апича дево на̄меса ат̣т̣хахи ка̄ран̣ехи вассати на̄га̄нубха̄вена супан̣н̣а̄нубха̄вена девата̄нубха̄вена саччакирийа̄йа утусамут̣т̣ха̄нена ма̄ра̄ват̣т̣анена иддхибалена вина̄самегхена̄ти.

вала̄хакасам̣йуттаван̣н̣ана̄ нит̣т̣хита̄.