12. дхаммакатхикавагго

1-2. авиджджа̄сутта̄диван̣н̣ана̄

113-114. дхаммакатхикаваггасса пат̣хаме етта̄вата̄ ча авиджджа̄гато хотӣти йа̄вата̄ има̄йа чатӯсу саччесу ан̃н̃а̄н̣абхӯта̄йа авиджджа̄йа саманна̄гато, етта̄вата̄ авиджджа̄гато хотӣти аттхо. дутийепи есева найо. пат̣хамадутийа̄ни.

3. дхаммакатхикасуттаван̣н̣ана̄

115. татийе пат̣хамена дхаммакатхико, дутийена секхабхӯми, татийена асекхабхӯмӣти евам̣ дхаммакатхикам̣ пуччхитена висесетва̄ две бхӯмийо катхита̄. татийам̣.

4. дутийадхаммакатхикасуттаван̣н̣ана̄

116. чатуттхе тиссаннампи пуччха̄нам̣ тӣн̣и виссаджджана̄ни катхита̄ни. чатуттхам̣.

5-9. бандханасутта̄диван̣н̣ана̄

117-121. пан̃чаме атӣрадассӣти тӣрам̣ вуччати ват̣т̣ам̣, там̣ на пассати. апа̄радассӣти па̄рам̣ вуччати нибба̄нам̣, там̣ на пассати. баддхоти килесабандханена баддхо хутва̄ джӣйати ча мӣйати ча асма̄ лока̄ парам̣ локам̣ гаччхатӣти. имасмим̣ сутте ват̣т̣адуккхам̣ катхитанти. чхат̣т̣ха̄дӣни утта̄наттха̄нева. пан̃чама̄дӣни.

10. сӣлавантасуттаван̣н̣ана̄

122. дасаме аниччатотиа̄дӣсу хутва̄ абха̄ва̄ка̄рена аниччато, пат̣ипӣл̣ана̄ка̄рена дуккхато, а̄ба̄дхат̣т̣хена рогато, антодосат̣т̣хена ган̣д̣ато, тесам̣ тесам̣ ган̣д̣а̄нам̣ паччайабха̄вена ва̄ кхан̣анат̣т̣хена ва̄ саллато дуккхат̣т̣хена агхато, висабха̄гамаха̄бхӯтасамут̣т̣ха̄наа̄ба̄дхапаччайат̣т̣хена а̄ба̄дхато, асакат̣т̣хена парато, палуджджанат̣т̣хена палокато, саттасун̃н̃атат̣т̣хена сун̃н̃ато, атта̄бха̄вена анаттато. еваметтха ‘‘аниччато палокато’’ти двӣхи падехи аниччаманасика̄ро, ‘‘сун̃н̃ато анаттато’’ти двӣхи анаттаманасика̄ро, сесехи дуккхаманасика̄ро вуттоти ведитаббо. сесаметтха утта̄намева. дасамам̣.

11. сутавантасуттаван̣н̣ана̄

123. татха̄ ека̄дасаме. дасамасмин̃хи ‘‘сӣлавата̄’’ти чатупа̄рисуддхисӣлам̣ вуттам̣, идха сутавата̄ти каммат̣т̣ха̄насутам̣ идамева на̄на̄каран̣ам̣. ека̄дасамам̣.

12-13. каппасутта̄диван̣н̣ана̄

124-125. два̄дасаматерасама̄ни ра̄хулова̄дасадиса̄нева̄ти. два̄дасаматерасама̄ни.

дхаммакатхикавагго два̄дасамо.