1. индакасуттаван̣н̣ана̄

235. йаккхасам̣йуттасса пат̣хаме индакасса̄ти индакӯт̣анива̄сино йаккхасса. йаккхато хи кӯт̣ена, кӯт̣ато ча йаккхена на̄мам̣ ладдхам̣. рӯпам̣ на джӣванти вадантӣти йади буддха̄ рӯпам̣ джӣванти на ваданти, йади рӯпам̣ сатто пуггалоти евам̣ на вадантӣти аттхо. катхам̣ нвайанти катхам̣ ну айам̣? кутасса ат̣т̣хӣйакапин̣д̣аметӣти асса саттасса ат̣т̣хийакапин̣д̣ан̃ча куто а̄гаччхати? еттха ча ат̣т̣хиггахан̣ена тӣн̣и ат̣т̣хисата̄ни, йакапин̣д̣аггахан̣ена нава мам̣сапесисата̄ни гахита̄ни. йади рӯпам̣ на джӣво, атхасса има̄ни ча ат̣т̣хӣни има̄ ча мам̣сапесийо куто а̄гаччхантӣти пуччхати. катхам̣ нвайам̣ саджджати габбхарасминти кена ну ка̄ран̣ена айам̣ сатто ма̄тукуччхисмим̣ саджджати лаггати, тит̣т̣хатӣти? пуггалава̄дӣ киреса йаккхо, ‘‘екаппаха̄ренева сатто ма̄тукуччхисмим̣ ниббаттатӣ’’ти гахетва̄ габбхасеййакасаттасса ма̄та̄ маччхамам̣са̄дӣни кха̄дати, сабба̄ни екараттива̄сена пачитва̄ пхен̣ам̣ вийа вилӣйанти. йади рӯпам̣ сатто на бхавеййа, евамева вилӣйеййа̄ти ладдхийа̄ евама̄ха. атхасса бхагава̄ – ‘‘на ма̄тукуччхисмим̣ екаппаха̄ренева ниббаттати, анупуббена пана вад̣д̣хатӣ’’ти дассенто пат̣хамам̣ калалам̣ хотӣтиа̄дима̄ха. таттха пат̣хаманти пат̣хамена пат̣исандхивин̃н̃а̄н̣ена саддхим̣ тиссоти ва̄ пхуссоти ва̄ на̄мам̣ наттхи, атха кхо тӣхи джа̄тиун̣н̣ам̣сӯхи катасуттагге сан̣т̣хитателабиндуппама̄н̣ам̣ калалам̣ хоти, йам̣ сандха̄йа вуттам̣ –

‘‘тилателасса йатха̄ бинду, саппиман̣д̣о ана̄вило;

евам̣ ван̣н̣аппат̣ибха̄гам̣, калалам̣ сампавуччатӣ’’ти.

калала̄ хоти аббуданти тасма̄ калала̄ сатта̄хаччайена мам̣садхованаудакаван̣н̣ам̣ аббудам̣ на̄ма хоти, калаланти на̄мам̣ антарадха̄йати. вуттампи четам̣ –

‘‘сатта̄хам̣ калалам̣ хоти, парипаккам̣ самӯхатам̣;

виват̣т̣ама̄нам̣ таббха̄вам̣, аббудам̣ на̄ма джа̄йатӣ’’ти.

аббуда̄ джа̄йате песӣти тасма̄пи аббуда̄ сатта̄хаччайена вилӣнатипусадиса̄ песи на̄ма сан̃джа̄йати. са̄ маричапха̄н̣итена дӣпетабба̄. га̄мада̄рика̄ хи супакка̄ни марича̄ни гахетва̄ са̄т̣аканте бхан̣д̣икам̣ катва̄ пӣл̣етва̄ ман̣д̣ам̣ а̄да̄йа капа̄ле паккхипитва̄ а̄тапе т̣хапенти, там̣ суккхама̄нам̣ саббабха̄гехи муччати. еварӯпа̄ песи хоти, аббуданти на̄мам̣ антарадха̄йати. вуттампи четам̣ –

‘‘сатта̄хам̣ аббудам̣ хоти, парипаккам̣ самӯхатам̣;

виват̣т̣ама̄нам̣ таббха̄вам̣, песи на̄ма паджа̄йатӣ’’ти.

песи ниббаттатӣ гханоти тато песито сатта̄хаччайена куккут̣ан̣д̣асан̣т̣ха̄но гхано на̄ма мам̣сапин̣д̣о ниббаттати, песӣти на̄мам̣ антарадха̄йати. вуттампи четам̣ –

‘‘сатта̄хам̣ песи бхавати, парипаккам̣ самӯхатам̣;

виват̣т̣ама̄нам̣ таббха̄вам̣, гханоти на̄ма джа̄йати.

‘‘йатха̄ куккут̣ийа̄ ан̣д̣ам̣, саманта̄ париман̣д̣алам̣;

евам̣ гханасса сан̣т̣ха̄нам̣, ниббаттам̣ каммапаччайа̄’’ти.

гхана̄ паса̄кха̄ джа̄йантӣти пан̃чаме сатта̄хе двиннам̣ хаттхапа̄да̄нам̣ сӣсасса чаттха̄йа пан̃ча пӣл̣ака̄ джа̄йанти, йам̣ сандха̄йетам̣ вуттам̣ ‘‘пан̃чаме, бхиккхаве, сатта̄хе пан̃ча пӣл̣ака̄ сан̣т̣хаханти каммато’’ти.

ито парам̣ чхат̣т̣хасаттама̄дӣни сатта̄ха̄ни атиккамма десанам̣ сан̇кхипитва̄ два̄чатта̄лӣсе сатта̄хе парин̣атака̄лам̣ гахетва̄ дассенто кеса̄тиа̄дима̄ха. таттха кеса̄ лома̄ накха̄пи ча̄ти два̄чатта̄лӣсе сатта̄хе ета̄ни джа̄йанти.

тена со таттха йа̄петӣти тасса хи на̄бхито ут̣т̣хито на̄л̣о ма̄ту ударапат̣алена ека̄баддхо хоти, со уппаладан̣д̣ако вийа чхиддо, тена а̄ха̄рарасо сам̣саритва̄ а̄ха̄расамут̣т̣ха̄нарӯпам̣ самут̣т̣ха̄пети. евам̣ со даса ма̄се йа̄пети. ма̄тукуччхигато нароти ма̄туйа̄ тирокуччхигато, куччхийа̄ аббхантарагатоти аттхо. ити бхагава̄ ‘‘евам̣ кхо, йаккха, айам̣ сатто анупуббена ма̄тукуччхийам̣ вад̣д̣хати, на екаппаха̄ренева ниббаттатӣ’’ти дассети. пат̣хамам̣.