6. бхиккха̄да̄йакавима̄наван̣н̣ана̄

уччамидам̣ ман̣итхӯн̣ам̣ вима̄нанти бхиккха̄да̄йакавима̄нам̣. тасса ка̄ уппатти? бхагава̄ ра̄джагахе вихарати вел̣уване. тена самайена ан̃н̃атаро бхиккху аддха̄намаггапат̣ипанно ан̃н̃атарам̣ га̄мам̣ пин̣д̣а̄йа павит̣т̣хо екасса гхараддха̄ре ат̣т̣ха̄си. таттха ан̃н̃атаро пурисо дхотахаттхапа̄до ‘‘бхун̃джисса̄мӣ’’ти нисинно бходжанам̣ упанетва̄ па̄тийа̄ паккхитте там̣ бхиккхум̣ дисва̄ па̄тийа̄ бхаттам̣ тасса бхиккхуно патте а̄киранто тена ‘‘екадесамева дехӣ’’ти вуттопи саббамева а̄кири. со бхиккху анумоданам̣ ватва̄ пакка̄ми. со пурисо ‘‘чха̄таджджхаттасса бхиккхуно майа̄ абхун̃джитва̄ бхаттам̣ динна’’нти ануссаранто ул̣а̄рам̣ пӣтисоманассам̣ пат̣илабхи. со апарабха̄ге ка̄лам̣ катва̄ та̄ватим̣сесу два̄дасайоджанике канакавима̄не ниббатти. там̣ а̄йасма̄ маха̄моггалла̄наттхеро девача̄рикам̣ чаранто махатийа̄ девиддхийа̄ вирочама̄нам̣ дисва̄ има̄хи га̄тха̄хи пат̣ипуччхи –

1081. ‘‘уччамидам̣ ман̣итхӯн̣ам̣ вима̄нам̣, самантато два̄даса йоджана̄ни;

кӯт̣а̄га̄ра̄ саттасата̄ ул̣а̄ра̄, вел̣урийатхамбха̄ ручакаттхата̄ субха̄.

1082. ‘‘девиддхипаттоси маха̄нубха̄во…пе…

ван̣н̣о ча те саббадиса̄ пабха̄сатӣ’’ти.

сопи тасса има̄хи га̄тха̄хи бйа̄ка̄си –

1083. ‘‘со девапутто аттамано…пе… йасса каммассидам̣ пхалам̣’’.

1084. ‘‘ахам̣ мануссесу мануссабхӯто, дисва̄на бхиккхум̣ таситам̣ килантам̣;

ека̄хам̣ бхиккхам̣ пат̣ипа̄дайиссам̣, саман̇ги бхаттена тада̄ ака̄сим̣.

1085. ‘‘тена мета̄дисо ван̣н̣о…пе… ван̣н̣о ча ме саббадиса̄ пабха̄сатӣ’’ти.

1084. таттха ека̄хам̣ бхиккханти екам̣ ахам̣ бхиккха̄маттам̣, екам̣ бхаттавад̣д̣хитаканти аттхо. пат̣ипа̄дайиссанти пат̣ипа̄десим̣ ада̄сим̣. саман̇ги бхаттена̄ти бхаттена саман̇гӣбхӯтам̣, ладдхабхиккханти аттхо. евам̣ маха̄тхеро тена девапуттена аттано сучаритакамме пака̄сите сапарива̄расса тасса дхаммам̣ десетва̄ мануссалокама̄гато, там̣ паваттим̣ самма̄самбуддхасса катхеси. саттха̄ там̣ ат̣т̣хуппаттим̣ катва̄ сампаттамаха̄джанасса дхаммам̣ десеси. са̄ десана̄ маха̄джанасса са̄ттхика̄ ахосӣти.

бхиккха̄да̄йакавима̄наван̣н̣ана̄ нит̣т̣хита̄.