6. уппа̄дакакаммаа̄йуппама̄н̣ава̄ро
1. уппа̄дакакаммам̣
1021. дева̄ти. тайо дева̄ – саммутидева̄ [самматидева̄ (сйа̄.)], упапаттидева̄, висуддхидева̄.
саммутидева̄ на̄ма – ра̄джа̄но, девийо, кума̄ра̄.
упапаттидева̄ на̄ма – ча̄тумаха̄ра̄джике [ча̄туммаха̄ра̄джике (сӣ. сйа̄.)] деве упа̄да̄йа тадупари дева̄.
висуддхидева̄ на̄ма – араханто вуччанти.
да̄нам̣ датва̄, сӣлам̣ сама̄дийитва̄, упосатхакаммам̣ катва̄ каттха упападжджанти? да̄нам̣ датва̄, сӣлам̣ сама̄дийитва̄, упосатхакаммам̣ катва̄ аппекачче кхаттийамаха̄са̄ла̄нам̣ сахабйатам̣ упападжджанти, аппекачче бра̄хман̣амаха̄са̄ла̄нам̣ сахабйатам̣ упападжджанти, аппекачче гахапатимаха̄са̄ла̄нам̣ сахабйатам̣ упападжджанти, аппекачче ча̄тумаха̄ра̄джика̄нам̣ дева̄нам̣ сахабйатам̣ упападжджанти, аппекачче та̄ватим̣са̄нам̣ дева̄нам̣ сахабйатам̣ упападжджанти, аппекачче йа̄ма̄нам̣ дева̄нам̣ сахабйатам̣ упападжджанти, аппекачче тусита̄нам̣ дева̄нам̣ сахабйатам̣ упападжджанти, аппекачче нимма̄наратӣнам̣ дева̄нам̣ сахабйатам̣ упападжджанти, аппекачче параниммитавасаваттӣнам̣ дева̄нам̣ сахабйатам̣ упападжджанти.
2. а̄йуппама̄н̣ам̣
1022. манусса̄нам̣ киттакам̣ а̄йуппама̄н̣ам̣? вассасатам̣, аппам̣ ва̄ бхиййо [аппам̣ ва̄ бхиййо ва̄ (сйа̄. ка.) дӣ. ни. 2.7].
1023. ча̄тумаха̄ра̄джика̄нам̣ дева̄нам̣ киттакам̣ а̄йуппама̄н̣ам̣? йа̄ни ма̄нусака̄ни пан̃н̃а̄са васса̄ни, ча̄туммаха̄ра̄джика̄нам̣ дева̄нам̣ есо еко раттиндиво [раттидиво (ка.) а. ни. 3.71]. та̄йа раттийа̄ тим̣са раттийо ма̄со. тена ма̄сена два̄дасама̄сийо сам̣ваччхаро. тена сам̣ваччхарена дибба̄ни пан̃ча вассасата̄ни ча̄туммаха̄ра̄джика̄нам̣ дева̄нам̣ а̄йуппама̄н̣ам̣. манусса̄нам̣ ган̣ана̄йа киттакам̣ хоти? навути вассасатасахасса̄ни.
та̄ватим̣са̄нам̣ дева̄нам̣ киттакам̣ а̄йуппама̄н̣ам̣? йам̣ ма̄нусакам̣ вассасатам̣, та̄ватим̣са̄нам̣ дева̄нам̣ есо еко раттиндиво. та̄йа раттийа̄ тим̣са раттийо ма̄со. тена ма̄сена два̄дасама̄сийо сам̣ваччхаро. тена сам̣ваччхарена диббам̣ вассасахассам̣ та̄ватим̣са̄нам̣ дева̄нам̣ а̄йуппама̄н̣ам̣. манусса̄нам̣ ган̣ана̄йа киттакам̣ хоти? тиссо ча вассакот̣ийо сат̣т̣хи ча вассасатасахасса̄ни.
йа̄ма̄нам̣ дева̄нам̣ киттакам̣ а̄йуппама̄н̣ам̣? йа̄ни ма̄нусака̄ни две вассасата̄ни, йа̄ма̄нам̣ дева̄нам̣ есо еко раттиндиво. та̄йа раттийа̄ тим̣сараттийо ма̄со. тена ма̄сена два̄дасама̄сийо сам̣ваччхаро. тена сам̣ваччхарена дибба̄ни две вассасахасса̄ни йа̄ма̄нам̣ дева̄нам̣ а̄йуппама̄н̣ам̣. манусса̄нам̣ ган̣ана̄йа киттакам̣ хоти? чуддасан̃ча вассакот̣ийо чатта̄рӣсан̃ча вассасатасахасса̄ни.
тусита̄нам̣ дева̄нам̣ киттакам̣ а̄йуппама̄н̣ам̣? йа̄ни ма̄нусака̄ни чатта̄ри вассасата̄ни, тусита̄нам̣ дева̄нам̣ есо еко раттиндиво. та̄йа раттийа̄ тим̣сараттийо ма̄со. тена ма̄сена два̄дасама̄сийо сам̣ваччхаро. тена сам̣ваччхарена дибба̄ни чатта̄ри вассасахасса̄ни тусита̄нам̣ дева̄нам̣ а̄йуппама̄н̣ам̣. манусса̄нам̣ ган̣ана̄йа киттакам̣ хоти? саттапан̃н̃а̄са вассакот̣ийо сат̣т̣хи ча вассасатасахасса̄ни.
нимма̄наратӣнам̣ дева̄нам̣ киттакам̣ а̄йуппама̄н̣ам̣? йа̄ни ма̄нусака̄ни ат̣т̣ха вассасата̄ни, нимма̄наратӣнам̣ дева̄нам̣ есо еко раттиндиво. та̄йа раттийа̄ тим̣сараттийо ма̄со. тена ма̄сена два̄дасама̄сийо сам̣ваччхаро. тена сам̣ваччхарена дибба̄ни ат̣т̣ха вассасахасса̄ни нимма̄наратӣнам̣ дева̄нам̣ а̄йуппама̄н̣ам̣. манусса̄нам̣ ган̣ана̄йа киттакам̣ хоти? две вассакот̣исата̄ни тим̣сан̃ча вассакот̣ийо чатта̄рӣсан̃ча вассасатасахасса̄ни.
параниммитавасаваттӣнам̣ дева̄нам̣ киттакам̣ а̄йуппама̄н̣ам̣? йа̄ни ма̄нусака̄ни сол̣аса вассасата̄ни, параниммитавасаваттӣнам̣ дева̄нам̣ есо еко раттиндиво. та̄йа раттийа̄ тим̣сараттийо ма̄со. тена ма̄сена два̄дасама̄сийо сам̣ваччхаро. тена сам̣ваччхарена дибба̄ни сол̣аса вассасахасса̄ни параниммитавасаваттӣнам̣ дева̄нам̣ а̄йуппама̄н̣ам̣. манусса̄нам̣ ган̣ана̄йа киттакам̣ хоти? нава ча вассакот̣исата̄ни екавӣсан̃ча вассакот̣ийо сат̣т̣хи ча вассасатасахасса̄нӣти.
чха ете [чхапи те (сйа̄.)] ка̄ма̄вачара̄, саббака̄масамиддхино;
саббесам̣ екасан̇кха̄то, а̄йу бхавати киттако.
два̄даса кот̣исатам̣ тесам̣, ат̣т̣хавӣсан̃ча кот̣ийо;
пан̃н̃а̄са сатасахасса̄ни, вассаггена пака̄сита̄ти.
1024. пат̣хамам̣ джха̄нам̣ париттам̣ бха̄ветва̄ каттха упападжджанти? пат̣хамам̣ джха̄нам̣ париттам̣ бха̄ветва̄ брахмапа̄рисаджджа̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? каппасса татийо бха̄го.
пат̣хамам̣ джха̄нам̣ маджджхимам̣ бха̄ветва̄ каттха упападжджанти? пат̣хамам̣ джха̄нам̣ маджджхимам̣ бха̄ветва̄ брахмапурохита̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? упад̣д̣хакаппо.
пат̣хамам̣ джха̄нам̣ пан̣ӣтам̣ бха̄ветва̄ каттха упападжджанти? пат̣хамам̣ джха̄нам̣ пан̣ӣтам̣ бха̄ветва̄ маха̄брахма̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? каппо [еко каппо (сйа̄.)].
1025. дутийам̣ джха̄нам̣ париттам̣ бха̄ветва̄ каттха упападжджанти? дутийам̣ джха̄нам̣ париттам̣ бха̄ветва̄ паритта̄бха̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? две каппа̄.
дутийам̣ джха̄нам̣ маджджхимам̣ бха̄ветва̄ каттха упападжджанти? дутийам̣ джха̄нам̣ маджджхимам̣ бха̄ветва̄ аппама̄н̣а̄бха̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? чатта̄ро каппа̄.
дутийам̣ джха̄нам̣ пан̣ӣтам̣ бха̄ветва̄ каттха упападжджанти? дутийам̣ джха̄нам̣ пан̣ӣтам̣ бха̄ветва̄ а̄бхассара̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? ат̣т̣ха каппа̄.
1026. татийам̣ джха̄нам̣ париттам̣ бха̄ветва̄ каттха упападжджанти? татийам̣ джха̄нам̣ париттам̣ бха̄ветва̄ париттасубха̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? сол̣аса каппа̄.
татийам̣ джха̄нам̣ маджджхимам̣ бха̄ветва̄ каттха упападжджанти? татийам̣ джха̄нам̣ маджджхимам̣ бха̄ветва̄ аппама̄н̣асубха̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? ба̄ттим̣са каппа̄.
татийам̣ джха̄нам̣ пан̣ӣтам̣ бха̄ветва̄ каттха упападжджанти? татийам̣ джха̄нам̣ пан̣ӣтам̣ бха̄ветва̄ субхакин̣ха̄нам̣ дева̄нам̣ сахабйатам̣ упападжджанти. тесам̣ киттакам̣ а̄йуппама̄н̣ам̣? чатусат̣т̣хи каппа̄.
1027. чатуттхам̣ джха̄нам̣ бха̄ветва̄ а̄рамман̣ана̄наттата̄ манасика̄рана̄наттата̄ чхандана̄наттата̄ пан̣идхина̄наттата̄ адхимоккхана̄наттата̄ абхинӣха̄рана̄наттата̄ пан̃н̃а̄на̄наттата̄ аппекачче асан̃н̃асатта̄нам̣ дева̄нам̣ сахабйатам̣ упападжджанти, аппекачче вехаппхала̄нам̣ дева̄нам̣ сахабйатам̣ упападжджанти, аппекачче авиха̄нам̣ дева̄нам̣ сахабйатам̣ упападжджанти, аппекачче атаппа̄нам̣ дева̄нам̣ сахабйатам̣ упападжджанти, аппекачче судасса̄нам̣ дева̄нам̣ сахабйатам̣ упападжджанти, аппекачче судассӣнам̣ дева̄нам̣ сахабйатам̣ упападжджанти, аппекачче аканит̣т̣ха̄нам̣ дева̄нам̣ сахабйатам̣ упападжджанти, аппекачче а̄ка̄са̄нан̃ча̄йатанӯпага̄нам̣ дева̄нам̣ сахабйатам̣ упападжджанти, аппекачче вин̃н̃а̄н̣ан̃ча̄йатанӯпага̄нам̣ дева̄нам̣ сахабйатам̣ упападжджанти, аппекачче а̄кин̃чан̃н̃а̄йатанӯпага̄нам̣ дева̄нам̣ сахабйатам̣ упападжджанти, аппекачче невасан̃н̃а̄на̄сан̃н̃а̄йатанӯпага̄нам̣ дева̄нам̣ сахабйатам̣ упападжджанти.
асан̃н̃асатта̄нан̃ча вехаппхала̄нан̃ча дева̄нам̣ киттакам̣ а̄йуппама̄н̣ам̣? пан̃чакаппасата̄ни.
авиха̄нам̣ дева̄нам̣ киттакам̣ а̄йуппама̄н̣ам̣? каппасахассам̣.
атаппа̄нам̣ дева̄нам̣ киттакам̣ а̄йуппама̄н̣ам̣? две каппасахасса̄ни.
судасса̄нам̣ дева̄нам̣ киттакам̣ а̄йуппама̄н̣ам̣? чатта̄ри каппасахасса̄ни.
судассӣнам̣ дева̄нам̣ киттакам̣ а̄йуппама̄н̣ам̣? ат̣т̣ха каппасахасса̄ни.
аканит̣т̣ха̄нам̣ дева̄нам̣ киттакам̣ а̄йуппама̄н̣ам̣? сол̣аса каппасахасса̄ни.
1028. а̄ка̄са̄нан̃ча̄йатанӯпага̄нам̣ дева̄нам̣ киттакам̣ а̄йуппама̄н̣ам̣? вӣсати каппасахасса̄ни.
вин̃н̃а̄н̣ан̃ча̄йатанӯпага̄нам̣ дева̄нам̣ киттакам̣ а̄йуппама̄н̣ам̣? чатта̄рӣса каппасахасса̄ни.
а̄кин̃чан̃н̃а̄йатанӯпага̄нам̣ дева̄нам̣ киттакам̣ а̄йуппама̄н̣ам̣? сат̣т̣хи каппасахасса̄ни.
невасан̃н̃а̄на̄сан̃н̃а̄йатанӯпага̄нам̣ дева̄нам̣ киттакам̣ а̄йуппама̄н̣ам̣? чатура̄сӣти каппасахасса̄нӣти.
1029. уккхитта̄ пун̃н̃атеджена, ка̄марӯпагатим̣ гата̄.
бхаваггатампи [бхаваггам̣ ва̄пи (сйа̄.)] сампатта̄, пуна̄гаччханти [пуна гаччханти (сйа̄.)] дуггатим̣.
та̄ва дӣгха̄йука̄ сатта̄, чаванти а̄йусан̇кхайа̄;
наттхи кочи бхаво ниччо, ити вуттам̣ махесина̄.
тасма̄ хи дхӣра̄ нипака̄, нипун̣а̄ аттхачинтака̄;
джара̄маран̣амоккха̄йа, бха̄венти маггамуттамам̣.
бха̄вайитва̄ сучим̣ маггам̣, нибба̄ногадхага̄минам̣;
сабба̄саве парин̃н̃а̄йа, париниббанти ана̄сава̄ти.