6. парийаттива̄ро

724. чатассо пат̣исамбхида̄ – аттхапат̣исамбхида̄, дхаммапат̣исамбхида̄, нируттипат̣исамбхида̄, пат̣ибха̄напат̣исамбхида̄.

таттха катама̄ дхаммапат̣исамбхида̄? идха бхиккху дхаммам̣ джа̄на̄ти – суттам̣ геййам̣ веййа̄каран̣ам̣ га̄тхам̣ уда̄нам̣ итивуттакам̣ джа̄такам̣ аббхутадхаммам̣ ведаллам̣. айам̣ вуччати ‘‘дхаммапат̣исамбхида̄’’. со тасса тассева бха̄ситасса аттхам̣ джа̄на̄ти – ‘‘айам̣ имасса бха̄ситасса аттхо, айам̣ имасса бха̄ситасса аттхо’’ти. айам̣ вуччати ‘‘аттхапат̣исамбхида̄’’. татра дхамманирутта̄бхила̄пе н̃а̄н̣ам̣ нируттипат̣исамбхида̄. н̃а̄н̣есу н̃а̄н̣ам̣ пат̣ибха̄напат̣исамбхида̄. айам̣ парийаттива̄ро.

суттантабха̄джанӣйам̣.