(169) 4. индрийабаддхакатха̄

786. индрийабаддхан̃н̃ева дуккханти? а̄манта̄. индрийабаддхан̃н̃ева аниччам̣ сан̇кхатам̣ пат̣иччасамуппаннам̣ кхайадхаммам̣ вайадхаммам̣ вира̄гадхаммам̣ ниродхадхаммам̣ випарин̣а̄мадхамманти? на хевам̣ ваттаббе…пе… нану аниндрийабаддхам̣ аниччам̣ сан̇кхатам̣ пат̣иччасамуппаннам̣ кхайадхаммам̣ вайадхаммам̣ вира̄гадхаммам̣ ниродхадхаммам̣ випарин̣а̄мадхамманти? а̄манта̄. хан̃чи аниндрийабаддхам̣ аниччам̣ сан̇кхатам̣ пат̣иччасамуппаннам̣ кхайадхаммам̣ вайадхаммам̣ вира̄гадхаммам̣ ниродхадхаммам̣ випарин̣а̄мадхаммам̣, но ча вата ре ваттаббе – ‘‘индрийабаддхан̃н̃ева дуккха’’нти.

аниндрийабаддхам̣ аниччам̣ сан̇кхатам̣ пат̣иччасамуппаннам̣…пе… випарин̣а̄мадхаммам̣, тан̃ча на дуккханти? а̄манта̄. индрийабаддхам̣ аниччам̣ сан̇кхатам̣…пе… випарин̣а̄мадхаммам̣, тан̃ча на дуккханти? на хевам̣ ваттаббе…пе….

индрийабаддхам̣ аниччам̣ сан̇кхатам̣…пе… випарин̣а̄мадхаммам̣, тан̃ча дуккханти [идам̣-пуччха̄двайена пуримапуччха̄двайасса пурато бхавитаббам̣]? а̄манта̄. аниндрийабаддхам̣ аниччам̣ сан̇кхатам̣…пе… випарин̣а̄мадхаммам̣, тан̃ча дуккханти [идам̣-пуччха̄двайена пуримапуччха̄двайасса пурато бхавитаббам̣]? на хевам̣ ваттаббе…пе….

787. индрийабаддхан̃н̃ева дуккханти? а̄манта̄. нану йаданиччам̣ там̣ дуккхам̣ [сам̣. ни. 3.15] вуттам̣ бхагавата̄ – ‘‘аниндрийабаддхам̣ аничча’’нти? а̄манта̄. хан̃чи йаданиччам̣ там̣ дуккхам̣ [сам̣. ни. 3.15] вуттам̣ бхагавата̄ – аниндрийабаддхам̣ аниччам̣, но ча вата ре ваттаббе – ‘‘индрийабаддхан̃н̃ева дуккха’’нти.

788. на ваттаббам̣ – ‘‘индрийабаддхан̃н̃ева дуккха’’нти? а̄манта̄. йатха̄ индрийабаддхасса дуккхасса парин̃н̃а̄йа бхагавати брахмачарийам̣ вуссати, евамевам̣ аниндрийабаддхасса дуккхасса парин̃н̃а̄йа бхагавати брахмачарийам̣ вуссатӣти? на хевам̣ ваттаббе…пе… йатха̄ индрийабаддхам̣ дуккхам̣ парин̃н̃а̄там̣ на пуна уппаджджати, евамевам̣ аниндрийабаддхам̣ дуккхам̣ парин̃н̃а̄там̣ на пуна уппаджджатӣти? на хевам̣ ваттаббе. тена хи индрийабаддхан̃н̃ева дуккханти.

индрийабаддхакатха̄ нит̣т̣хита̄.