16. сол̣асамавагго

(156) 1. ниггахакатха̄

743. паро парасса читтам̣ нигган̣ха̄тӣти? а̄манта̄. паро парасса читтам̣ ‘‘ма̄ раджджи’’, ‘‘ма̄ дусси’’, ‘‘ма̄ муйхи’’, ‘‘ма̄ килиссӣ’’ти нигган̣ха̄тӣти? на хевам̣ ваттаббе…пе… паро парасса читтам̣ нигган̣ха̄тӣти? а̄манта̄. паро парасса уппанно пхассо ‘‘ма̄ нируджджхӣ’’ти нигган̣ха̄тӣти? на хевам̣ ваттаббе…пе… паро парасса уппанна̄ ведана̄…пе… уппанна̄ сан̃н̃а̄… уппанна̄ четана̄… уппаннам̣ читтам̣… уппанна̄ саддха̄… уппаннам̣ вӣрийам̣ … уппанна̄ сати… уппанно сама̄дхи…пе… уппанна̄ пан̃н̃а̄ ‘‘ма̄ нируджджхӣ’’ти нигган̣ха̄тӣти? на хевам̣ ваттаббе…пе….

паро парасса читтам̣ нигган̣ха̄тӣти? а̄манта̄. паро парасса аттха̄йа ра̄гам̣ паджахати… досам̣ паджахати…пе… аноттаппам̣ паджахатӣти? на хевам̣ ваттаббе…пе….

паро парасса читтам̣ нигган̣ха̄тӣти? а̄манта̄. паро парасса аттха̄йа маггам̣ бха̄вети… сатипат̣т̣ха̄нам̣ бха̄вети…пе… боджджхан̇гам̣ бха̄ветӣти? на хевам̣ ваттаббе…пе….

паро парасса читтам̣ нигган̣ха̄тӣти? а̄манта̄. паро парасса аттха̄йа дуккхам̣ париджа̄на̄ти, самудайам̣ паджахати, ниродхам̣ саччхикароти, маггам̣ бха̄ветӣти? на хевам̣ ваттаббе…пе….

паро парасса читтам̣ нигган̣ха̄тӣти? а̄манта̄. ан̃н̃о ан̃н̃асса ка̄рако, паран̇катам̣ сукхам̣ дуккхам̣ ан̃н̃о кароти ан̃н̃о пат̣исам̣ведетӣти? на хевам̣ ваттаббе…пе….

паро парасса читтам̣ нигган̣ха̄тӣти? а̄манта̄. нану вуттам̣ бхагавата̄ –

‘‘аттана̄ва катам̣ па̄пам̣, аттана̄ сам̣килиссати;

аттана̄ акатам̣ па̄пам̣, аттана̄ва висуджджхати;

суддхи асуддхи паччаттам̣, на̄н̃н̃о ан̃н̃ам̣ висодхайе’’ти [дха. па. 165].

аттхева суттантоти? а̄манта̄. тена хи на ваттаббам̣ – ‘‘паро парасса читтам̣ нигган̣ха̄тӣ’’ти.

744. на ваттаббам̣ – ‘‘паро парасса читтам̣ нигган̣ха̄тӣ’’ти? а̄манта̄. нану аттхи балаппатта̄, аттхи васӣбхӯта̄ти? а̄манта̄. хан̃чи аттхи балаппатта̄, аттхи васӣбхӯта̄, тена вата ре ваттаббе – ‘‘паро парасса читтам̣ нигган̣ха̄тӣ’’ти.

ниггахакатха̄ нит̣т̣хита̄.

16. сол̣асамавагго

(157) 2. паггахакатха̄

745. паро парасса читтам̣ пагган̣ха̄тӣти? а̄манта̄. паро парасса читтам̣ ‘‘ма̄ раджджи,’’‘‘ма̄ дусси,’’‘‘ма̄ муйхи,’’‘‘ма̄ килиссӣ’’ти пагган̣ха̄тӣти? на хевам̣ ваттаббе…пе… паро парасса читтам̣ пагган̣ха̄тӣти? а̄манта̄. паро парасса алобхам̣ кусаламӯлам̣ джанети… адосам̣ кусаламӯлам̣ джанети… амохам̣ кусаламӯлам̣ джанети… саддхам̣ джанети… вӣрийам̣ джанети… сатим̣ джанети… сама̄дхим̣ джанети… пан̃н̃ам̣ джанетӣти? на хевам̣ ваттаббе…пе… паро парасса читтам̣ пагган̣ха̄тӣти? а̄манта̄. паро парасса уппанно пхассо ‘‘ма̄ нируджджхӣ’’ти пагган̣ха̄тӣти? на хевам̣ ваттаббе…пе… паро парасса уппанна̄ ведана̄…пе… уппанна̄ пан̃н̃а̄ ‘‘ма̄ нируджджхӣ’’ти пагган̣ха̄тӣти? на хевам̣ ваттаббе…пе….

паро парасса читтам̣ пагган̣ха̄тӣти? а̄манта̄. паро парасса аттха̄йа ра̄гам̣ паджахати… досам̣ паджахати… мохам̣ паджахати…пе… аноттаппам̣ паджахатӣти? на хевам̣ ваттаббе…пе….

паро парасса читтам̣ пагган̣ха̄тӣти? а̄манта̄. паро парасса аттха̄йа маггам̣ бха̄вети… сатипат̣т̣ха̄нам̣ бха̄вети…пе… боджджхан̇гам̣ бха̄ветӣти? на хевам̣ ваттаббе…пе….

паро парасса читтам̣ пагган̣ха̄тӣти? а̄манта̄. паро парасса аттха̄йа дуккхам̣ париджа̄на̄ти…пе… маггам̣ бха̄ветӣти? на хевам̣ ваттаббе…пе….

паро парасса читтам̣ пагган̣ха̄тӣти? а̄манта̄. ан̃н̃о ан̃н̃асса ка̄рако, паран̇катам̣ сукхам̣ дуккхам̣ ан̃н̃о кароти ан̃н̃о пат̣исам̣ведетӣти? на хевам̣ ваттаббе…пе….

паро парасса читтам̣ пагган̣ха̄тӣти? а̄манта̄. нану вуттам̣ бхагавата̄ – ‘‘аттана̄ва катам̣ па̄пам̣…пе… на̄н̃н̃о ан̃н̃ам̣ висодхайе’’ти. аттхева суттантоти? а̄манта̄. тена хи на ваттаббам̣ – ‘‘паро парасса читтам̣ пагган̣ха̄тӣ’’ти.

746. на ваттаббам̣ – ‘‘паро парасса читтам̣ пагган̣ха̄тӣ’’ти? а̄манта̄. нану аттхи балаппатта̄, аттхи васӣбхӯта̄ти? а̄манта̄. хан̃чи аттхи балаппатта̄, аттхи васӣбхӯта̄, тена вата ре ваттаббе – ‘‘паро парасса читтам̣ пагган̣ха̄тӣ’’ти.

паггахакатха̄ нит̣т̣хита̄.

16. сол̣асамавагго

(158) 3. сукха̄нуппада̄накатха̄

747. паро парасса сукхам̣ ануппадетӣти? а̄манта̄. паро парасса дуккхам̣ ануппадетӣти? на хевам̣ ваттаббе…пе… паро парасса дуккхам̣ на ануппадетӣти? а̄манта̄. паро парасса сукхам̣ на ануппадетӣти? на хевам̣ ваттаббе…пе… паро парасса сукхам̣ ануппадетӣти? а̄манта̄. паро парасса аттано сукхам̣ ануппадети, ан̃н̃есам̣ сукхам̣ ануппадети, тасса сукхам̣ ануппадетӣти? на хевам̣ ваттаббе…пе… паро парасса неваттано, на ан̃н̃есам̣, на тасса сукхам̣ ануппадетӣти? а̄манта̄. хан̃чи паро парасса неваттано, на ан̃н̃есам̣, на тасса сукхам̣ ануппадети, но ча вата ре ваттаббе – ‘‘паро парасса сукхам̣ ануппадетӣ’’ти.

паро парасса сукхам̣ ануппадетӣти? а̄манта̄. ан̃н̃о ан̃н̃асса ка̄рако, паран̇катам̣ сукхам̣ дуккхам̣ ан̃н̃о кароти ан̃н̃о пат̣исам̣ведетӣти? на хевам̣ ваттаббе…пе….

748. на ваттаббам̣ – ‘‘паро парасса сукхам̣ ануппадетӣ’’ти? а̄манта̄. нану а̄йасма̄ уда̄йӣ етадавоча – ‘‘бахӯнам̣ вата но бхагава̄ дуккхадхамма̄нам̣ апахатта̄, бахӯнам̣ вата но бхагава̄ сукхадхамма̄нам̣ упахатта̄, бахӯнам̣ вата но бхагава̄ акусала̄нам̣ дхамма̄нам̣ апахатта̄, бахӯнам̣ вата но бхагава̄ кусала̄нам̣ дхамма̄нам̣ упахатта̄’’ти [ма. ни. 2.148 лат̣укикопаме]! аттхева суттантоти? а̄манта̄. тена хи паро парасса сукхам̣ ануппадетӣти.

сукха̄нуппада̄накатха̄ нит̣т̣хита̄.

16. сол̣асамавагго

(159) 4. адхигайхаманасика̄ракатха̄

749. адхигайха манаси каротӣти? а̄манта̄. тена читтена там̣ читтам̣ паджа̄на̄тӣти? на хевам̣ ваттаббе…пе… тена читтена там̣ читтам̣ паджа̄на̄тӣти? а̄манта̄. тена читтена там̣ читтам̣ ‘‘читта’’нти паджа̄на̄тӣти? на хевам̣ ваттаббе…пе… тена читтена там̣ читтам̣ ‘‘читта’’нти паджа̄на̄тӣти? а̄манта̄. там̣ читтам̣ тасса читтасса а̄рамман̣анти? на хевам̣ ваттаббе…пе….

там̣ читтам̣ тасса читтасса а̄рамман̣анти? а̄манта̄. тена пхассена там̣ пхассам̣ пхусати, та̄йа ведана̄йа…пе… та̄йа сан̃н̃а̄йа… та̄йа четана̄йа… тена читтена… тена витаккена… тена вича̄рена… та̄йа пӣтийа̄… та̄йа сатийа̄… та̄йа пан̃н̃а̄йа там̣ пан̃н̃ам̣ паджа̄на̄тӣти? на хевам̣ ваттаббе…пе….

750. атӣтам̣ ‘‘атӣта’’нти манасикаронто, ана̄гатам̣ ‘‘ана̄гата’’нти манаси каротӣти? на хевам̣ ваттаббе…пе… атӣтам̣ ‘‘атӣта’’нти манасикаронто, ана̄гатам̣ ‘‘ана̄гата’’нти манаси каротӣти? а̄манта̄. двиннам̣ пхасса̄нам̣…пе… двиннам̣ читта̄нам̣ самодха̄нам̣ хотӣти? на хевам̣ ваттаббе…пе….

атӣтам̣ ‘‘атӣта’’нти манасикаронто, паччуппаннам̣ ‘‘паччуппанна’’нти манаси каротӣти? на хевам̣ ваттаббе…пе… атӣтам̣ ‘‘атӣта’’нти манасикаронто, паччуппаннам̣ ‘‘паччуппанна’’нти манаси каротӣти? а̄манта̄. двиннам̣ пхасса̄нам̣…пе… двиннам̣ читта̄нам̣ самодха̄нам̣ хотӣти? на хевам̣ ваттаббе…пе….

атӣтам̣ ‘‘атӣта’’нти манасикаронто, ана̄гатам̣ ‘‘ана̄гата’’нти манаси кароти, паччуппаннам̣ ‘‘паччуппанна’’нти манаси каротӣти? на хевам̣ ваттаббе…пе… атӣтам̣ ‘‘атӣта’’нти манасикаронто, ана̄гатам̣ ‘‘ана̄гата’’нти манаси кароти, паччуппаннам̣ ‘‘паччуппанна’’нти манаси каротӣти? а̄манта̄. тин̣н̣ам̣ пхасса̄нам̣…пе… тин̣н̣ам̣ читта̄нам̣ самодха̄нам̣ хотӣти? на хевам̣ ваттаббе…пе….

751. ана̄гатам̣ ‘‘ана̄гата’’нти манасикаронто, атӣтам̣ ‘‘атӣта’’нти манаси каротӣти? на хевам̣ ваттаббе…пе… ана̄гатам̣ ‘‘ана̄гата’’нти манасикаронто, атӣтам̣ ‘‘атӣта’’нти манаси каротӣти? а̄манта̄. двиннам̣ пхасса̄нам̣…пе… двиннам̣ читта̄нам̣ самодха̄нам̣ хотӣти? на хевам̣ ваттаббе…пе….

ана̄гатам̣ ‘‘ана̄гата’’нти манасикаронто, паччуппаннам̣ ‘‘паччуппанна’’нти манаси каротӣти? на хевам̣ ваттаббе…пе… ана̄гатам̣ ‘‘ана̄гата’’нти манасикаронто, паччуппаннам̣ ‘‘паччуппанна’’нти манаси каротӣти? а̄манта̄. двиннам̣ пхасса̄нам̣…пе… двиннам̣ читта̄нам̣ самодха̄нам̣ хотӣти? на хевам̣ ваттаббе…пе….

ана̄гатам̣ ‘‘ана̄гата’’нти манасикаронто, атӣтам̣ ‘‘атӣта’’нти манаси кароти, паччуппаннам̣ ‘‘паччуппанна’’нти манаси каротӣти? на хевам̣ ваттаббе…пе… ана̄гатам̣ ‘‘ана̄гата’’нти манасикаронто, атӣтам̣ ‘‘атӣта’’нти манаси кароти, паччуппаннам̣ ‘‘паччуппанна’’нти манаси каротӣти? а̄манта̄. тин̣н̣ам̣ пхасса̄нам̣…пе… тин̣н̣ам̣ читта̄нам̣ самодха̄нам̣ хотӣти? на хевам̣ ваттаббе…пе….

752. паччуппаннам̣ ‘‘паччуппанна’’нти манасикаронто, атӣтам̣ ‘‘атӣта’’нти манаси каротӣти? на хевам̣ ваттаббе…пе… паччуппаннам̣ ‘‘паччуппанна’’нти манасикаронто, атӣтам̣ ‘‘атӣта’’нти манаси каротӣти? а̄манта̄. двиннам̣ пхасса̄нам̣…пе… двиннам̣ читта̄нам̣ самодха̄нам̣ хотӣти? на хевам̣ ваттаббе…пе….

паччуппаннам̣ ‘‘паччуппанна’’нти манасикаронто, ана̄гатам̣ ‘‘ана̄гата’’нти манаси каротӣти? на хевам̣ ваттаббе…пе… паччуппаннам̣ ‘‘паччуппанна’’нти манасикаронто, ана̄гатам̣ ‘‘ана̄гата’’нти манаси каротӣти? а̄манта̄. двиннам̣ пхасса̄нам̣…пе… двиннам̣ читта̄нам̣ самодха̄нам̣ хотӣти? на хевам̣ ваттаббе…пе….

паччуппаннам̣ ‘‘паччуппанна’’нти манасикаронто, атӣтам̣ ‘‘атӣта’’нти манаси кароти, ана̄гатам̣ ‘‘ана̄гата’’нти манаси каротӣти? на хевам̣ ваттаббе…пе… паччуппаннам̣ ‘‘паччуппанна’’нти манасикаронто, атӣтам̣ ‘‘атӣта’’нти манаси кароти, ана̄гатам̣ ‘‘ана̄гата’’нти манаси каротӣти? а̄манта̄. тин̣н̣ам̣ пхасса̄нам̣…пе… тин̣н̣ам̣ читта̄нам̣ самодха̄нам̣ хотӣти? на хевам̣ ваттаббе…пе….

753. на ваттаббам̣ – ‘‘адхигайха манаси каротӣ’’ти? а̄манта̄. нану вуттам̣ бхагавата̄ –

‘‘саббе сан̇кха̄ра̄ аничча̄ти, йада̄ пан̃н̃а̄йа пассати;

атха ниббиндати дуккхе, еса магго висуддхийа̄.

‘‘саббе сан̇кха̄ра̄ дуккха̄ти, йада̄ пан̃н̃а̄йа пассати;

атха ниббиндати дуккхе, еса магго висуддхийа̄.

‘‘саббе дхамма̄ анатта̄ти, йада̄ пан̃н̃а̄йа пассати;

атха ниббиндати дуккхе, еса магго висуддхийа̄’’ти [дха. па. 277-279].

аттхева суттантоти? а̄манта̄. тена хи адхигайха манаси каротӣти.

адхигайхаманасика̄ракатха̄ нит̣т̣хита̄.

16. сол̣асамавагго

(160) 5. рӯпам̣ хетӯтикатха̄

754. рӯпам̣ хетӯти? а̄манта̄. алобхо хетӯти? на хевам̣ ваттаббе…пе… адосо хету…пе… амохо хету… лобхо хету… досо хету… мохо хетӯти? на хевам̣ ваттаббе…пе….

рӯпам̣ хетӯти? а̄манта̄. са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… нану ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. хан̃чи ана̄рамман̣ам̣, наттхи тасса а̄ват̣т̣ана̄…пе… пан̣идхи, но ча вата ре ваттаббе – ‘‘рӯпам̣ хетӯ’’ти.

755. алобхо хету са̄рамман̣о, аттхи тасса а̄ват̣т̣ана̄…пе… пан̣идхӣти? а̄манта̄. рӯпам̣ хету са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… адосо хету… амохо хету… лобхо хету… досо хету… мохо хету са̄рамман̣о, аттхи тасса а̄ват̣т̣ана̄…пе… пан̣идхӣти? а̄манта̄. рӯпам̣ хету са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

рӯпам̣ хету ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. алобхо хету ана̄рамман̣о, наттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… рӯпам̣ хету ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. адосо хету… амохо хету… лобхо хету… досо хету… мохо хету ана̄рамман̣о, наттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

756. на ваттаббам̣ – ‘‘рӯпам̣ хетӯ’’ти? а̄манта̄. нану маха̄бхӯта̄ упа̄да̄йарӯпа̄нам̣ [упа̄да̄рӯпа̄нам̣ (сӣ. пӣ. ка.)] упа̄да̄йахетӯти? а̄манта̄. хан̃чи маха̄бхӯта̄ упа̄да̄йарӯпа̄нам̣ упа̄да̄йахету, тена вата ре ваттаббе – ‘‘рӯпам̣ хетӯ’’ти.

рӯпам̣ хетӯтикатха̄ нит̣т̣хита̄.

16. сол̣асамавагго

(161) 6. рӯпам̣ сахетукантикатха̄

757. рӯпам̣ сахетуканти? а̄манта̄. алобхахетуна̄ти? на хевам̣ ваттаббе…пе… адосахетуна̄ти …пе… амохахетуна̄ти…пе… лобхахетуна̄…пе… досахетуна̄…пе… мохахетуна̄ти? на хевам̣ ваттаббе…пе….

рӯпам̣ сахетуканти? а̄манта̄. са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… нану ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. хан̃чи ана̄рамман̣ам̣, наттхи тасса а̄ват̣т̣ана̄…пе… пан̣идхи, но ча вата ре ваттаббе – ‘‘рӯпам̣ сахетука’’нти.

758. алобхо сахетуко са̄рамман̣о, аттхи тасса а̄ват̣т̣ана̄…пе… пан̣идхӣти? а̄манта̄. рӯпам̣ сахетукам̣ са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… адосо сахетуко…пе… амохо… саддха̄… вӣрийам̣… сати… сама̄дхи… пан̃н̃а̄… лобхо… досо… мохо… ма̄но… дит̣т̣хи… вичикиччха̄… тхинам̣… уддхаччам̣… ахирикам̣… аноттаппам̣ сахетукам̣ са̄рамман̣ам̣, аттхи тасса а̄ват̣т̣ана̄…пе… пан̣идхӣти? а̄манта̄. рӯпам̣ сахетукам̣ са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

рӯпам̣ сахетукам̣ ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. алобхо сахетуко ана̄рамман̣о, наттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… рӯпам̣ сахетукам̣ ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. адосо сахетуко…пе… аноттаппам̣ сахетукам̣ ана̄рамман̣ам̣, наттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

759. на ваттаббам̣ – ‘‘рӯпам̣ сахетука’’нти? а̄манта̄. нану рӯпам̣ саппаччайанти? а̄манта̄. хан̃чи рӯпам̣ саппаччайам̣, тена вата ре ваттаббе – ‘‘рӯпам̣ сахетука’’нти.

рӯпам̣ сахетукантикатха̄ нит̣т̣хита̄.

16. сол̣асамавагго

(162) 7. рӯпам̣ кусала̄кусалантикатха̄

760. рӯпам̣ кусаланти? а̄манта̄. са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… нану ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. хан̃чи ана̄рамман̣ам̣, наттхи тасса а̄ват̣т̣ана̄…пе… пан̣идхи, но ча вата ре ваттаббе – ‘‘рӯпам̣ кусала’’нти.

761. алобхо кусало са̄рамман̣о, аттхи тасса а̄ват̣т̣ана̄…пе… пан̣идхӣти? а̄манта̄. рӯпам̣ кусалам̣ са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

адосо кусало…пе… амохо кусало…пе… саддха̄… вӣрийам̣… сати… сама̄дхи…пе… пан̃н̃а̄ кусала̄ са̄рамман̣а̄, аттхи та̄йа а̄ват̣т̣ана̄…пе… пан̣идхӣти? а̄манта̄. рӯпам̣ кусалам̣ са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

рӯпам̣ кусалам̣ ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. алобхо кусало ана̄рамман̣о, наттхи тасса а̄ват̣т̣ана̄ …пе… пан̣идхӣти? на хевам̣ ваттаббе…пе….

рӯпам̣ кусалам̣ ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. адосо кусало…пе… пан̃н̃а̄ кусала̄ ана̄рамман̣а̄, наттхи та̄йа а̄ват̣т̣ана̄…пе… пан̣идхӣти? на хевам̣ ваттаббе…пе….

762. рӯпам̣ акусаланти? а̄манта̄. са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… нану ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. хан̃чи ана̄рамман̣ам̣, наттхи тасса а̄ват̣т̣ана̄…пе… пан̣идхи, но ча вата ре ваттаббе – ‘‘рӯпам̣ акусала’’нти…пе….

763. лобхо акусало са̄рамман̣о, аттхи тасса а̄ват̣т̣ана̄…пе… пан̣идхӣти? а̄манта̄. рӯпам̣ акусалам̣ са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… досо… мохо… ма̄но…пе… аноттаппам̣ акусалам̣ са̄рамман̣ам̣, аттхи тасса а̄ват̣т̣ана̄…пе… пан̣идхӣти? а̄манта̄. рӯпам̣ акусалам̣ са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

рӯпам̣ акусалам̣ ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. лобхо акусало ана̄рамман̣о, наттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… рӯпам̣ акусалам̣ ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. досо… мохо…пе… аноттаппам̣ акусалам̣ ана̄рамман̣ам̣, наттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

764. на ваттаббам̣ – ‘‘рӯпам̣ кусалампи акусалампӣ’’ти? а̄манта̄. нану ка̄йакаммам̣ вачӣкаммам̣ кусалампи акусалампӣти? а̄манта̄. хан̃чи ка̄йакаммам̣ вачӣкаммам̣ кусалампи акусалампи, тена вата ре ваттаббе – ‘‘рӯпам̣ кусалампи акусалампӣ’’ти.

рӯпам̣ кусала̄кусалантикатха̄ нит̣т̣хита̄.

16. сол̣асамавагго

(163) 8. рӯпам̣ випа̄котикатха̄

765. рӯпам̣ випа̄коти? а̄манта̄. рӯпам̣ сукхаведанийам̣ дуккхаведанийам̣ адуккхамасукхаведанийам̣, сукха̄йа ведана̄йа сампайуттам̣, дуккха̄йа ведана̄йа сампайуттам̣, адуккхамасукха̄йа ведана̄йа сампайуттам̣, пхассена сампайуттам̣…пе… читтена сампайуттам̣, са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе… нану на сукхаведанийам̣ на дуккхаведанийам̣…пе… ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. хан̃чи на сукхаведанийам̣ на дуккхаведанийам̣…пе… ана̄рамман̣ам̣, наттхи тасса а̄ват̣т̣ана̄…пе… пан̣идхи, но ча вата ре ваттаббе – ‘‘рӯпам̣ випа̄ко’’ти.

766. пхассо випа̄ко, пхассо сукхаведанийо дуккхаведанийо…пе… са̄рамман̣о, аттхи тасса а̄ват̣т̣ана̄…пе… пан̣идхӣти? а̄манта̄. рӯпам̣ випа̄ко, рӯпам̣ сукхаведанийам̣ дуккхаведанийам̣…пе… са̄рамман̣ам̣, аттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

рӯпам̣ випа̄ко, рӯпам̣ на сукхаведанийам̣ на дуккхаведанийам̣…пе… ана̄рамман̣ам̣, наттхи тасса а̄ват̣т̣ана̄…пе… пан̣идхӣти? а̄манта̄. пхассо випа̄ко, пхассо на сукхаведанийо на дуккхаведанийо…пе… ана̄рамман̣о, наттхи тасса а̄ват̣т̣ана̄…пе… пан̣идхӣти? на хевам̣ ваттаббе…пе….

767. на ваттаббам̣ – ‘‘рӯпам̣ випа̄ко’’ти? а̄манта̄. нану каммасса кататта̄ уппанна̄ читтачетасика̄ дхамма̄ випа̄коти? а̄манта̄. хан̃чи каммасса кататта̄ уппанна̄ читтачетасика̄ дхамма̄ випа̄ко, тена вата ре ваттаббе – ‘‘каммасса кататта̄ уппаннам̣ рӯпам̣ випа̄ко’’ти.

рӯпам̣ випа̄котикатха̄ нит̣т̣хита̄.

16. сол̣асамавагго

(164) 9. рӯпам̣ рӯпа̄вачара̄рӯпа̄вачарантикатха̄

768. аттхи рӯпам̣ рӯпа̄вачаранти? а̄манта̄. сама̄паттесийам̣ упапаттесийам̣ дит̣т̣хадхаммасукхавиха̄рам̣, сама̄паттесийена читтена упапаттесийена читтена дит̣т̣хадхаммасукхавиха̄рена читтена сахагатам̣ сахаджа̄там̣ сам̣сат̣т̣хам̣ сампайуттам̣ екуппа̄дам̣ еканиродхам̣ екаваттхукам̣ ека̄рамман̣анти? на хевам̣ ваттаббе…пе… нану на сама̄паттесийам̣ на упапаттесийам̣ на дит̣т̣хадхаммасукхавиха̄рам̣, на сама̄паттесийена читтена на упапаттесийена читтена на дит̣т̣хадхаммасукхавиха̄рена читтена сахагатам̣ сахаджа̄там̣ сам̣сат̣т̣хам̣ сампайуттам̣ екуппа̄дам̣ еканиродхам̣ екаваттхукам̣ ека̄рамман̣анти? а̄манта̄. хан̃чи на сама̄паттесийам̣ на упапаттесийам̣ на дит̣т̣хадхаммасукхавиха̄рам̣, на сама̄паттесийена читтена…пе… ека̄рамман̣ам̣, но ча вата ре ваттаббе – ‘‘аттхи рӯпам̣ рӯпа̄вачара’’нти.

769. аттхи рӯпам̣ арӯпа̄вачаранти? а̄манта̄. сама̄паттесийам̣ упапаттесийам̣ дит̣т̣хадхаммасукхавиха̄рам̣, сама̄паттесийена читтена упапаттесийена читтена дит̣т̣хадхаммасукхавиха̄рена читтена сахагатам̣ сахаджа̄там̣ сам̣сат̣т̣хам̣ сампайуттам̣ екуппа̄дам̣ еканиродхам̣ екаваттхукам̣ ека̄рамман̣анти? на хевам̣ ваттаббе…пе… нану на сама̄паттесийам̣ на упапаттесийам̣ на дит̣т̣хадхаммасукхавиха̄рам̣, на сама̄паттесийена читтена …пе… ека̄рамман̣анти? а̄манта̄. хан̃чи на сама̄паттесийам̣ на упапаттесийам̣…пе… екаваттхукам̣ ека̄рамман̣ам̣, но ча вата ре ваттаббе – ‘‘аттхи рӯпам̣ арӯпа̄вачара’’нти.

770. на ваттаббам̣ – ‘‘аттхи рӯпам̣ рӯпа̄вачарам̣, аттхи рӯпам̣ арӯпа̄вачара’’нти? а̄манта̄. нану ка̄ма̄вачаракаммасса кататта̄ рӯпам̣ ка̄ма̄вачаранти? а̄манта̄. хан̃чи ка̄ма̄вачаракаммасса кататта̄ рӯпам̣ ка̄ма̄вачарам̣, тена вата ре ваттаббе – ‘‘рӯпа̄вачаракаммасса кататта̄ рӯпам̣ рӯпа̄вачарам̣, арӯпа̄вачаракаммасса кататта̄ рӯпам̣ арӯпа̄вачара’’нти.

рӯпам̣ рӯпа̄вачара̄рӯпа̄вачарантикатха̄ нит̣т̣хита̄.

16. сол̣асамавагго

(165) 10. рӯпа̄рӯпадха̄тупарийа̄паннакатха̄

771. рӯпара̄го рӯпадха̄тупарийа̄панноти? а̄манта̄. сама̄паттесийо упапаттесийо дит̣т̣хадхаммасукхавиха̄ро, сама̄паттесийена читтена упапаттесийена читтена дит̣т̣хадхаммасукхавиха̄рена читтена сахагато сахаджа̄то сам̣сат̣т̣хо сампайутто екуппа̄до еканиродхо екаваттхуко ека̄рамман̣оти? на хевам̣ ваттаббе…пе… нану на сама̄паттесийо на упапаттесийо на дит̣т̣хадхаммасукхавиха̄ро, на сама̄паттесийена читтена…пе… екаваттхуко ека̄рамман̣оти? а̄манта̄. хан̃чи на сама̄паттесийо на упапаттесийо на дит̣т̣хадхаммасукхавиха̄ро, на сама̄паттесийена читтена…пе… екаваттхуко ека̄рамман̣о, но ча вата ре ваттаббе – ‘‘рӯпара̄го рӯпадха̄тупарийа̄панно’’ти.

772. рӯпара̄го рӯпадха̄тупарийа̄панноти? а̄манта̄. саддара̄го саддадха̄тупарийа̄панноти? на хевам̣ ваттаббе …пе… рӯпара̄го рӯпадха̄тупарийа̄панноти? а̄манта̄. гандхара̄го…пе… расара̄го…пе… пхот̣т̣хаббара̄го пхот̣т̣хаббадха̄тупарийа̄панноти? на хевам̣ ваттаббе…пе….

саддара̄го на ваттаббам̣ – ‘‘саддадха̄тупарийа̄панно’’ти? а̄манта̄. рӯпара̄го на ваттаббам̣ – ‘‘рӯпадха̄тупарийа̄панно’’ти? на хевам̣ ваттаббе…пе… гандхара̄го…пе… расара̄го…пе… пхот̣т̣хаббара̄го на ваттаббам̣ – ‘‘пхот̣т̣хаббадха̄тупарийа̄панно’’ти? а̄манта̄. рӯпара̄го на ваттаббам̣ – ‘‘рӯпадха̄тупарийа̄панно’’ти? на хевам̣ ваттаббе…пе….

773. арӯпара̄го арӯпадха̄тупарийа̄панноти? а̄манта̄. арӯпара̄го на ваттаббам̣ – ‘‘арӯпадха̄тупарийа̄панно’’ти? на хевам̣ ваттаббе…пе… арӯпара̄го арӯпадха̄тупарийа̄панноти? а̄манта̄. сама̄паттесийо упапаттесийо дит̣т̣хадхаммасукхавиха̄ро, сама̄паттесийена читтена упапаттесийена читтена дит̣т̣хадхаммасукхавиха̄рена читтена сахагато сахаджа̄то сам̣сат̣т̣хо сампайутто екуппа̄до еканиродхо екаваттхуко ека̄рамман̣оти? на хевам̣ ваттаббе…пе… нану на сама̄паттесийо на упапаттесийо на дит̣т̣хадхаммасукхавиха̄ро, на сама̄паттесийена читтена…пе… екаваттхуко ека̄рамман̣оти? а̄манта̄. хан̃чи на сама̄паттесийо на упапаттесийо на дит̣т̣хадхаммасукхавиха̄ро, на сама̄паттесийена читтена на упапаттесийена читтена на дит̣т̣хадхаммасукхавиха̄рена читтена сахагато сахаджа̄то сам̣сат̣т̣хо сампайутто екуппа̄до еканиродхо екаваттхуко ека̄рамман̣о, но ча вата ре ваттаббе – ‘‘арӯпара̄го арӯпадха̄тупарийа̄панно’’ти.

774. арӯпара̄го арӯпадха̄тупарийа̄панноти? а̄манта̄. саддара̄го саддадха̄тупарийа̄панноти? на хевам̣ ваттаббе…пе… арӯпара̄го арӯпадха̄тупарийа̄панноти? а̄манта̄. гандхара̄го…пе… расара̄го…пе… пхот̣т̣хаббара̄го пхот̣т̣хаббадха̄тупарийа̄панноти? на хевам̣ ваттаббе…пе….

саддара̄го на ваттаббам̣ – ‘‘саддадха̄тупарийа̄панно’’ти? а̄манта̄. арӯпара̄го на ваттаббам̣ – ‘‘арӯпадха̄тупарийа̄панно’’ти? на хевам̣ ваттаббе…пе… гандхара̄го…пе… расара̄го…пе… пхот̣т̣хаббара̄го на ваттаббам̣ – ‘‘пхот̣т̣хаббадха̄тупарийа̄панно’’ти? а̄манта̄. арӯпара̄го на ваттаббам̣ – ‘‘арӯпадха̄тупарийа̄панно’’ти? на хевам̣ ваттаббе…пе….

775. на ваттаббам̣ – ‘‘рӯпара̄го рӯпадха̄тупарийа̄панно, арӯпара̄го арӯпадха̄тупарийа̄панно’’ти? а̄манта̄. нану ка̄мара̄го ка̄мадха̄тупарийа̄панноти? а̄манта̄. хан̃чи ка̄мара̄го ка̄мадха̄тупарийа̄панно, тена вата ре ваттаббе – ‘‘рӯпара̄го рӯпадха̄тупарийа̄панно, арӯпара̄го арӯпадха̄тупарийа̄панно’’ти.

рӯпара̄го рӯпадха̄тупарийа̄панно арӯпара̄го арӯпадха̄тупарийа̄паннотикатха̄ нит̣т̣хита̄.

рӯпа̄рӯпадха̄тупарийа̄паннакатха̄ нит̣т̣хита̄.

сол̣асамавагго.

тассудда̄нам̣ –

читтаниггахо, читтапаггахо, сукха̄нуппада̄нам̣, адхигайха манасика̄ро, рӯпам̣ хету, рӯпам̣ сахетукам̣, рӯпам̣ кусалампи акусалампи, рӯпам̣ випа̄ко, аттхи рӯпам̣ рӯпа̄вачарам̣ аттхи рӯпам̣ арӯпа̄вачарам̣, саббе килеса̄ ка̄мадха̄тупарийа̄панна̄ти.