13. терасамавагго

(130) 5. нивутакатха̄

665. нивуто нӣваран̣ам̣ джахатӣти? а̄манта̄. ратто ра̄гам̣ джахати, дут̣т̣хо досам̣ джахати, мӯл̣хо мохам̣ джахати, килит̣т̣хо килесе джахатӣти? на хевам̣ ваттаббе…пе… ра̄гена ра̄гам̣ джахати, досена досам̣ джахати, мохена мохам̣ джахати, килесехи килесе джахатӣти? на хевам̣ ваттаббе…пе….

ра̄го читтасампайутто, магго читтасампайуттоти? а̄манта̄. двиннам̣ пхасса̄нам̣…пе… двиннам̣ читта̄нам̣ самодха̄нам̣ хотӣти? на хевам̣ ваттаббе…пе… ра̄го акусало, магго кусалоти? а̄манта̄. кусала̄кусала̄ са̄ваджджа̄наваджджа̄ хӣнапан̣ӣта̄ кан̣хасуккасаппат̣ибха̄га̄ дхамма̄ саммукхӣбха̄вам̣ а̄гаччхантӣти? на хевам̣ ваттаббе…пе….

666. кусала̄кусала̄ са̄ваджджа̄наваджджа̄ хӣнапан̣ӣта̄ кан̣хасуккасаппат̣ибха̄га̄ дхамма̄ саммукхӣбха̄вам̣ а̄гаччхантӣти? а̄манта̄. нану вуттам̣ бхагавата̄ – ‘‘чатта̄рима̄ни, бхиккхаве, сувидӯравидӯра̄ни! катама̄ни чатта̄ри? набхан̃ча, бхиккхаве, патхавӣ ча – идам̣ пат̣хамам̣ сувидӯравидӯрам̣…пе… тасма̄ сатам̣ дхаммо асаббхи а̄рака̄’’ти. аттхева суттантоти? а̄манта̄. тена хи на ваттаббам̣ – ‘‘кусала̄кусала̄…пе… саммукхӣбха̄вам̣ а̄гаччхантӣ’’ти.

нивуто нӣваран̣ам̣ джахатӣти? а̄манта̄. нану вуттам̣ бхагавата̄ – ‘‘со евам̣ сама̄хите читте парисуддхе парийода̄те анан̇ган̣е вигатӯпаккилесе мудубхӯте камманийе т̣хите а̄нен̃джаппатте а̄сава̄нам̣ кхайан̃а̄н̣а̄йа читтам̣ абхининна̄метӣ’’ти! аттхева суттантоти? а̄манта̄. тена хи на ваттаббам̣ – ‘‘нивуто нӣваран̣ам̣ джахатӣ’’ти…пе….

667. на ваттаббам̣ – ‘‘нивуто нӣваран̣ам̣ джахатӣ’’ти? а̄манта̄. нану вуттам̣ бхагавата̄ – ‘‘тасса евам̣ джа̄нато евам̣ пассато ка̄ма̄сава̄пи читтам̣ вимуччати…пе… авиджджа̄сава̄пи читтам̣ вимуччатӣ’’ти! аттхева суттантоти? а̄манта̄. тена хи нивуто нӣваран̣ам̣ джахатӣти.

нивутакатха̄ нит̣т̣хита̄.