(68) 6. итодиннакатха̄

488. ито диннена таттха йа̄пентӣти? а̄манта̄. ито чӣварам̣ денти там̣ чӣварам̣ таттха парибхун̃джантӣти? на хевам̣ ваттаббе…пе… ито пин̣д̣апа̄там̣ денти, ито сена̄санам̣ денти, ито гила̄напаччайабхесаджджапариккха̄рам̣ денти, ито кха̄данӣйам̣ денти, ито бходжанӣйам̣ денти, ито па̄нӣйам̣ денти; там̣ па̄нӣйам̣ таттха парибхун̃джантӣти? на хевам̣ ваттаббе…пе….

ито диннена таттха йа̄пентӣти? а̄манта̄. ан̃н̃о ан̃н̃асса ка̄рако паракатам̣ сукхадуккхам̣ ан̃н̃о кароти, ан̃н̃о пат̣исам̣ведетӣти? на хевам̣ ваттаббе…пе….

489. на ваттаббам̣ – ‘‘ито диннена таттха йа̄пентӣ’’ти? а̄манта̄. нану пета̄ аттано аттха̄йа да̄нам̣ дентам̣ анумоденти, читтам̣ паса̄денти, пӣтим̣ уппа̄денти, соманассам̣ пат̣илабхантӣти? а̄манта̄. хан̃чи пета̄ аттано аттха̄йа да̄нам̣ дентам̣ анумоденти, читтам̣ паса̄денти, пӣтим̣ уппа̄денти, соманассам̣ пат̣илабханти; тена вата ре ваттаббе – ‘‘ито диннена таттха йа̄пентӣ’’ти.

490. на ваттаббам̣ – ‘‘ито диннена таттха йа̄пентӣ’’ти? а̄манта̄. нану вуттам̣ бхагавата̄ –

‘‘уннаме удакам̣ вут̣т̣хам̣, йатха̄ниннам̣ паваттати;

евамева ито диннам̣, пета̄нам̣ упакаппати.

‘‘йатха̄ ва̄риваха̄ пӯра̄, парипӯренти са̄гарам̣;

евамева ито диннам̣, пета̄нам̣ упакаппати.

‘‘на хи таттха касӣ аттхи, гораккхеттха на виджджати;

ван̣иджджа̄ та̄дисӣ наттхи, хиран̃н̃ена кайа̄кайам̣ [кайаккайам̣ (сӣ. пӣ.)];

ито диннена йа̄пенти, пета̄ ка̄лан̇ката̄ тахи’’нти [кху. па̄. 7.6; пе. ва. 19].

аттхева суттантоти? а̄манта̄. тена хи ито диннена таттха йа̄пентӣти.

491. на ваттаббам̣ – ‘‘ито диннена таттха йа̄пентӣ’’ти? а̄манта̄. нану вуттам̣ бхагавата̄ – ‘‘пан̃чима̄ни, бхиккхаве, т̣ха̄на̄ни сампассанта̄ ма̄та̄питаро путтам̣ иччханти куле джа̄йама̄нам̣! катама̄ни пан̃ча? бхат̣о ва̄ но бхариссати, киччам̣ ва̄ но кариссати, кулавам̣со чирам̣ т̣хассати, да̄йаджджам̣ пат̣ипаджджиссати, атха ва̄ пана пета̄нам̣ ка̄лан̇ката̄нам̣ даккхин̣ам̣ ануппадассати – има̄ни кхо, бхиккхаве, пан̃ча т̣ха̄на̄ни сампассанта̄ ма̄та̄питаро путтам̣ иччханти куле джа̄йама̄на’’нти.

‘‘пан̃ча т̣ха̄на̄ни сампассам̣, путтам̣ иччханти пан̣д̣ита̄;

бхат̣о ва̄ но бхариссати, киччам̣ ва̄ но кариссати.

‘‘кулавам̣со чирам̣ тит̣т̣хе, да̄йаджджам̣ пат̣ипаджджати;

атха ва̄ пана пета̄нам̣, даккхин̣ам̣ ануппадассати.

‘‘т̣ха̄на̄нета̄ни сампассам̣, путтам̣ иччханти пан̣д̣ита̄;

тасма̄ санто саппуриса̄, катан̃н̃ӯ катаведино.

‘‘бхаранти ма̄та̄питаро, пуббе катамануссарам̣;

каронти тесам̣ кичча̄ни, йатха̄ там̣ пуббака̄ринам̣.

‘‘ова̄дака̄рӣ бхат̣апосӣ, кулавам̣сам̣ аха̄пайам̣;

саддхо сӣлена сампанно, путто хоти пасам̣сийо’’ти [а. ни. 5.31].

аттхева суттантоти? а̄манта̄. тена хи ито диннена таттха йа̄пентӣти.

ито диннакатха̄ нит̣т̣хита̄.