5. пан̃чамавагго

(51) 9. пат̣уппаннакатха̄

441. пат̣уппанне [паччуппанне (сӣ. сйа̄.)] н̃а̄н̣ам̣ аттхӣти? а̄манта̄. тена н̃а̄н̣ена там̣ н̃а̄н̣ам̣ джа̄на̄тӣти? на хевам̣ ваттаббе…пе… тена н̃а̄н̣ена там̣ н̃а̄н̣ам̣ джа̄на̄тӣти? а̄манта̄. тена н̃а̄н̣ена там̣ н̃а̄н̣ам̣ ‘‘н̃а̄н̣а’’нти джа̄на̄тӣти? на хевам̣ ваттаббе…пе… тена н̃а̄н̣ена там̣ н̃а̄н̣ам̣ ‘‘н̃а̄н̣а’’нти джа̄на̄тӣти? а̄манта̄. там̣ н̃а̄н̣ам̣ тасса н̃а̄н̣асса а̄рамман̣анти? на хевам̣ ваттаббе…пе….

там̣ н̃а̄н̣ам̣ тасса н̃а̄н̣асса а̄рамман̣анти? а̄манта̄. тена пхассена там̣ пхассам̣ пхусати, та̄йа ведана̄йа там̣ веданам̣ ведети, та̄йа сан̃н̃а̄йа там̣ сан̃н̃ам̣ сан̃джа̄на̄ти, та̄йа четана̄йа там̣ четанам̣ четети, тена читтена там̣ читтам̣ чинтети, тена витаккена там̣ витаккам̣ витаккети, тена вича̄рена там̣ вича̄рам̣ вича̄рети, та̄йа пӣтийа̄ там̣ пӣтим̣ пийа̄йати, та̄йа сатийа̄ там̣ сатим̣ сарати, та̄йа пан̃н̃а̄йа там̣ пан̃н̃ам̣ паджа̄на̄ти, тена кхаггена там̣ кхаггам̣ чхиндати, тена пхарасуна̄ там̣ пхарасум̣ таччхати, та̄йа кудха̄рийа̄ там̣ кудха̄рим̣ таччхати, та̄йа ва̄сийа̄ там̣ ва̄сим̣ таччхати, та̄йа сӯчийа̄ там̣ сӯчим̣ сиббети, тена ан̇гулаггена там̣ ан̇гулаггам̣ пара̄масати, тена на̄сикаггена там̣ на̄сикаггам̣ пара̄масати, тена маттхакена там̣ маттхакам̣ пара̄масати, тена гӯтхена там̣ гӯтхам̣ дховати, тена муттена там̣ муттам̣ дховати, тена кхел̣ена там̣ кхел̣ам̣ дховати, тена пуббена там̣ пуббам̣ дховати, тена лохитена там̣ лохитам̣ дховатӣти? на хевам̣ ваттаббе …пе….

442. на ваттаббам̣ – ‘‘пат̣уппанне н̃а̄н̣ам̣ аттхӣ’’ти? а̄манта̄. нану саббасан̇кха̄ре аниччато дит̣т̣хе тампи н̃а̄н̣ам̣ аниччато дит̣т̣хам̣ хотӣти? а̄манта̄. хан̃чи саббасан̇кха̄ре аниччато дит̣т̣хе тампи н̃а̄н̣ам̣ аниччато дит̣т̣хам̣ хоти, тена вата ре ваттаббе – ‘‘пат̣уппанне н̃а̄н̣ам̣ аттхӣ’’ти.

пат̣уппаннан̃а̄н̣акатха̄ [паччуппаннакатха̄ (сӣ.)] нит̣т̣хита̄.