(27) 7. диббачаккхукатха̄

373. мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. мам̣сачаккхум̣ диббачаккхум̣, диббачаккхум̣ мам̣сачаккхунти? на хевам̣ ваттаббе…пе….

мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. йа̄дисам̣ мам̣сачаккхум̣ та̄дисам̣ диббачаккхум̣, йа̄дисам̣ диббачаккхум̣ та̄дисам̣ мам̣сачаккхунти? на хевам̣ ваттаббе…пе….

мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. тан̃н̃ева мам̣сачаккхум̣ там̣ диббачаккхум̣, там̣ диббачаккхум̣ там̣ мам̣сачаккхунти? на хевам̣ ваттаббе…пе….

мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. йа̄дисо мам̣сачаккхусса висайо а̄нубха̄во гочаро та̄дисо диббасса чаккхусса висайо а̄нубха̄во гочароти? на хевам̣ ваттаббе…пе….

мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. упа̄дин̣н̣ам̣ [упа̄диннам̣ (сйа̄. кам̣.)] хутва̄ анупа̄дин̣н̣ам̣ хотӣти? на хевам̣ ваттаббе…пе….

упа̄дин̣н̣ам̣ хутва̄ анупа̄дин̣н̣ам̣ хотӣти? а̄манта̄. ка̄ма̄вачарам̣ хутва̄ рӯпа̄вачарам̣ хотӣти? на хевам̣ ваттаббе…пе….

ка̄ма̄вачарам̣ хутва̄ рӯпа̄вачарам̣ хотӣти? а̄манта̄. рӯпа̄вачарам̣ хутва̄ арӯпа̄вачарам̣ хотӣти? на хевам̣ ваттаббе…пе….

рӯпа̄вачарам̣ хутва̄ арӯпа̄вачарам̣ хотӣти? а̄манта̄. парийа̄паннам̣ хутва̄ апарийа̄паннам̣ хотӣти? на хевам̣ ваттаббе…пе….

374. мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. диббачаккхум̣ дхаммупаттхаддхам̣ мам̣сачаккхум̣ хотӣти? на хевам̣ ваттаббе…пе….

мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. диббачаккхум̣ дхаммупаттхаддхам̣ пан̃н̃а̄чаккхум̣ хотӣти? на хевам̣ ваттаббе…пе….

мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. диббачаккхум̣ дхаммупаттхаддхам̣ мам̣сачаккхум̣ хотӣти? на хевам̣ ваттаббе…пе….

мам̣сачаккхум̣ дхаммупаттхаддхам̣ диббачаккхум̣ хотӣти? а̄манта̄. двева чаккхӯнӣти? на хевам̣ ваттаббе…пе… двева чаккхӯнӣти? а̄манта̄. нану тӣн̣и чаккхӯни вутта̄ни бхагавата̄ – мам̣сачаккхум̣, диббачаккхум̣, пан̃н̃а̄чаккхунти? а̄манта̄. хан̃чи тӣн̣и чаккхӯни вутта̄ни бхагавата̄ – мам̣сачаккхум̣, диббачаккхум̣, пан̃н̃а̄чаккхум̣, но ча вата ре ваттаббе – ‘‘двева чаккхӯнӣ’’ти.

двева чаккхӯнӣти? а̄манта̄. нану вуттам̣ бхагавата̄ – ‘‘тӣн̣има̄ни, бхиккхаве, чаккхӯни! катама̄ни тӣн̣и? мам̣сачаккхум̣, диббачаккхум̣, пан̃н̃а̄чаккхунти – има̄ни кхо, бхиккхаве, тӣн̣и чаккхӯнӣ’’ти.

‘‘мам̣сачаккхум̣ диббачаккхум̣, пан̃н̃а̄чаккхум̣ ануттарам̣;

ета̄ни тӣн̣и чаккхӯни, аккха̄си пурисуттамо.

‘‘мам̣сачаккхусса уппа̄до, магго диббасса чаккхуно;

йада̄ ча н̃а̄н̣ам̣ удапа̄ди, пан̃н̃а̄чаккхум̣ ануттарам̣;

тасса чаккхусса пат̣ила̄бха̄, саббадуккха̄ памуччатӣ’’ти [итиву. 61 итивуттаке].

аттхева суттантоти? а̄манта̄. тена хи на ваттаббам̣ – ‘‘двева чаккхӯнӣ’’ти.

диббачаккхукатха̄ нит̣т̣хита̄.