3. татийавагго

(24) 4. вимуччама̄накатха̄

366. вимуттам̣ вимуччама̄нанти? а̄манта̄. екадесам̣ вимуттам̣, екадесам̣ авимуттанти? на хевам̣ ваттаббе…пе….

екадесам̣ вимуттам̣, екадесам̣ авимуттанти? а̄манта̄. екадесам̣ сота̄панно, екадесам̣ на сота̄панно, екадесам̣ сота̄паттипхалаппатто пат̣иладдхо адхигато саччхикато упасампаджджа вихарати, ка̄йена пхуситва̄ вихарати, екадесам̣ на ка̄йена пхуситва̄ вихарати, екадесам̣ саттаккхаттупарамо колан̇коло екабӣджӣ буддхе авеччаппаса̄дена саманна̄гато дхамме…пе… сан̇гхе…пе… арийакантехи сӣлехи саманна̄гато, екадесам̣ арийакантехи сӣлехи на саманна̄гатоти? на хевам̣ ваттаббе…пе….

екадесам̣ вимуттам̣, екадесам̣ авимуттанти? а̄манта̄. екадесам̣ сакада̄га̄мӣ, екадесам̣ на сакада̄га̄мӣ, екадесам̣ сакада̄га̄мипхалаппатто пат̣иладдхо адхигато саччхикато упасампаджджа вихарати, ка̄йена пхуситва̄ вихарати, екадесам̣ на ка̄йена пхуситва̄ вихаратӣти? на хевам̣ ваттаббе…пе….

екадесам̣ вимуттам̣, екадесам̣ авимуттанти? а̄манта̄. екадесам̣ ана̄га̄мӣ, екадесам̣ на ана̄га̄мӣ, екадесам̣ ана̄га̄мипхалаппатто пат̣иладдхо адхигато саччхикато упасампаджджа вихарати, ка̄йена пхуситва̄ вихарати, екадесам̣ на ка̄йена пхуситва̄ вихарати, екадесам̣ антара̄паринибба̄йӣ, упахаччапаринибба̄йӣ, асан̇кха̄рапаринибба̄йӣ, сасан̇кха̄рапаринибба̄йӣ, уддхам̣сотоаканит̣т̣хага̄мӣ, екадесам̣ на уддхам̣сотоаканит̣т̣хага̄мӣти? на хевам̣ ваттаббе…пе….

екадесам̣ вимуттам̣, екадесам̣ авимуттанти? а̄манта̄. екадесам̣ араха̄ екадесам̣ на араха̄, екадесам̣ арахаттаппатто пат̣иладдхо адхигато саччхикато упасампаджджа вихарати, ка̄йена пхуситва̄ вихарати, екадесам̣ на ка̄йена пхуситва̄ вихарати, екадесам̣ вӣтара̄го вӣтадосо вӣтамохо…пе… екадесам̣ саччхика̄таббам̣ саччхикатам̣, екадесам̣ саччхика̄таббам̣ на саччхикатанти? на хевам̣ ваттаббе…пе….

вимуттам̣ вимуччама̄нанти? а̄манта̄. уппа̄даккхан̣е вимуттам̣, бхан̇гаккхан̣е вимуччама̄нанти? на хевам̣ ваттаббе…пе….

367. на ваттаббам̣ – ‘‘вимуттам̣ вимуччама̄на’’нти? а̄манта̄. нану вуттам̣ бхагавата̄ – ‘‘тасса евам̣ джа̄нато евам̣ пассато ка̄ма̄сава̄пи читтам̣ вимуччати, бхава̄сава̄пи читтам̣ вимуччати, авиджджа̄сава̄пи читтам̣ вимуччатӣ’’ти [дӣ. ни. 1.248 а̄дайо]! аттхева суттантоти? а̄манта̄. тена хи ваттаббам̣ [тена хи (сӣ. сйа̄. кам̣.), тена хи на ваттаббам̣ (ка.)] – ‘‘вимуттам̣ вимуччама̄на’’нти.

вимуттам̣ вимуччама̄нанти? а̄манта̄. нану вуттам̣ бхагавата̄ – ‘‘со евам̣ сама̄хите читте парисуддхе парийода̄те анан̇ган̣е вигатӯпаккилесе мудубхӯте камманийе т̣хите а̄нен̃джаппатте а̄сава̄нам̣ кхайан̃а̄н̣а̄йа читтам̣ абхининна̄метӣ’’ти! аттхева суттантоти? а̄манта̄. тена хи на ваттаббам̣ – ‘‘вимуттам̣ вимуччама̄на’’нти.

аттхи читтам̣ вимуччама̄нанти? а̄манта̄. аттхи читтам̣ раджджама̄нам̣ дуссама̄нам̣ муйхама̄нам̣ килиссама̄нанти? на хевам̣ ваттаббе…пе… нану раттан̃чева араттан̃ча, дут̣т̣хан̃чева адут̣т̣хан̃ча, мӯл̣хан̃чева амӯл̣хан̃ча, чхиннан̃чева ачхиннан̃ча, бхиннан̃чева абхиннан̃ча, катан̃чева акатан̃ча̄ти? а̄манта̄. хан̃чи раттан̃чева араттан̃ча, дут̣т̣хан̃чева адут̣т̣хан̃ча, мӯл̣хан̃чева амӯл̣хан̃ча, чхиннан̃чева ачхиннан̃ча, бхиннан̃чева абхиннан̃ча, катан̃чева акатан̃ча, но ча вата ре ваттаббе – ‘‘аттхи читтам̣ вимуччама̄на’’нти.

вимуччама̄накатха̄ нит̣т̣хита̄.