9. маха̄рат̣т̣хаса̄санавам̣сакатха̄магго

9. ито парам̣ маха̄рат̣т̣хаса̄санавам̣сакатха̄маггам̣ катхайисса̄ми йатха̄вуттама̄тика̄васена.

татийасан̇гӣта̄васа̄не хи маха̄моггалипуттатиссаттхеро маха̄дхаммараккхиттхерам̣ маха̄рат̣т̣хам̣ песеси,-твам̣ етам̣ рат̣т̣хам̣ гантва̄ еттха са̄санам̣ патит̣т̣ха̄песӣти.

маха̄дхаммараккхитаттхероча аттапан̃чамо хутва̄ маха̄рат̣т̣хам̣ гантва̄ маха̄на̄радакассападжа̄такакатха̄йа маха̄рат̣т̣хаке паса̄детва̄ чатура̄сӣтипа̄н̣асахасса̄ни маггапхалесу патит̣т̣ха̄песи. терасасахасса̄ни паббаджим̣су. евам̣ со таттха са̄санам̣ патит̣т̣ха̄песи.

маха̄рат̣т̣хам̣ иси гантва̄, со маха̄ дхаммараккхито;

джа̄такам̣ катхайитва̄на, паса̄деси маха̄джананти.

таттха кира манусса̄ пуббе аггихута̄димиччха̄каммам̣ йебхуййена акам̣су. тенева тхеро маха̄на̄радакассападжа̄такакатхам̣ десеси. тато пат̣т̣ха̄йа таттха манусса̄ джа̄така катхам̣ йебхуййена сотум̣ ативийа иччханти. бхиккхӯча йебхуййена гахат̣т̣ха̄нам̣ джа̄такакатхам̣йева десенти. висесато пана вассантараджа̄такакатхам̣ те манусса̄ бахӯхи да̄таббаваттхӯхи пӯджетва̄ сун̣анти.

тан̃ча маха̄рат̣т̣хам̣ на̄ма сйа̄марат̣т̣хасамӣпе т̣хитам̣, тенева сйа̄марат̣т̣хава̄синопи бхиккхӯ гахат̣т̣ха̄ча йебхуййена сотум̣ иччхантӣти. маха̄дхаммараккхитаттхеропи маха̄рат̣т̣хава̄сӣхи саддхим̣ сакаласйа̄марат̣т̣хава̄сӣнам̣ дхаммам̣ десеси, аматарасам̣ па̄йеси, йатха̄ йонакадхаммараккхитаттхеро апарантарат̣т̣хам̣ гантва̄ сакаламараммарат̣т̣хава̄сӣнанти.

йам̣ пана йонакарат̣т̣хаса̄санавам̣сакатха̄йам̣ вуттам̣, тампи саббам̣ еттха̄пи дат̣т̣хаббам̣йева, техи тасса екасадисаттена т̣хитатта̄ти. татха̄ хи на̄гасенаттхеропи йонакарат̣т̣хе васитва̄ сйа̄марат̣т̣ха̄дӣсупи са̄санам̣ патит̣т̣ха̄песи. йонакарат̣т̣хава̄сино маха̄дхаммагамбхӣраттхерамаха̄медхан̇караттхера̄ча саддхим̣ бахӯхи бхиккхӯхи сӣхал̣адӣпам̣ гантва̄ тато пуна̄гантва̄ сйа̄марат̣т̣хе соккатайанагарам̣ патва̄ таттха нисӣдитва̄ са̄санам̣ пагган̣хитва̄ паччха̄ лакуннанагаре нисӣдитва̄ са̄санам̣ пагган̣хи. евам̣ йонакарат̣т̣хе са̄санам̣ т̣хитам̣ сйа̄ма̄дӣсупи т̣хитам̣йева̄ти дат̣т̣хаббам̣.

буддхасса бхагавато паринибба̄нато двисата̄дхика̄нам̣ двиннам̣ вассасахасса̄нам̣ упари навутиме васса сӣхал̣адӣпе раджджам̣ паттасса киттиссирира̄джасӣхамаха̄ра̄джасса абхисекато татийе вассе тенева киттиссирира̄джасӣхамаха̄ран̃н̃а̄ пахитапан̣н̣а̄ка̄раса̄санам̣ а̄гамма сара̄ма̄дхипатидхаммикамаха̄ра̄джа̄дхира̄джена̄н̣аттехи лан̇ка̄дӣпам̣ а̄гатехи упа̄литтхе ра̄дӣхи патит̣т̣ха̄пито вам̣со упа̄ливам̣соти па̄кат̣о. соча дувидхо пубба̄ра̄мавиха̄рава̄сӣабхайагиривиха̄рава̄сӣвасена̄ти. евам̣ маха̄нагарайонакалйа̄марат̣т̣хесу са̄санам̣ тхирам̣ хутва̄ тит̣т̣хатӣти ведитаббанти.

ити са̄санавам̣се маха̄рат̣т̣хаса̄санавам̣сакатха̄магго на̄ма

навамо париччхедо.