8-9. дут̣т̣хадоса сан̇гха̄дисеса сиккха̄пуччха̄

пуччха̄ – йам̣ тена а̄вусо бхагавата̄…пе… самма̄самбуддхена бхиккхум̣ амӯлакена па̄ра̄джикена дхаммена ануддхам̣сентасса ча, бхиккхум̣ ан̃н̃абха̄гийасса адхикаран̣асса кин̃чидесам̣ лесаматтам̣ упа̄да̄йа па̄ра̄джикена дхаммена ануддхам̣сентасса ча сан̇гха̄дисесо каттха пан̃н̃атто.

виссаджджана̄ – ра̄джагахе бханте пан̃н̃атто.

пуччха̄ – кам̣ а̄вусо а̄раббха кисмим̣ ваттхусмим̣ пан̃н̃атто.

виссаджджана̄ – меттийабхӯмаджака̄ бханте бхиккхӯ а̄раббха пан̃н̃атто, меттийабхӯмаджака̄ бханте бхиккхӯ а̄йасмантам̣ даббам̣ маллапуттам̣ амӯлакена па̄ра̄джикена дхаммена ануддхам̣сесум̣, тейева бханте меттийабхӯмаджака̄ бхиккхӯ а̄йасмантам̣ даббам̣ маллапуттам̣ ан̃н̃абха̄гийасса адхикаран̣асса кин̃чидесам̣ лесаматтам̣ упа̄да̄йа па̄ра̄джикена дхаммена ануддхам̣сесум̣, тасмим̣ бханте ваттхусмим̣, пан̃н̃атто.