6. бхесаджджаккхандхака

пуччха̄ – пан̃ча а̄вусо бхесаджджа̄ни пат̣иггахетва̄ ка̄лепи вика̄лепи парибхун̃джитум̣ бхагавата̄ каттха анун̃н̃а̄там̣, кам̣ а̄раббха кисмим̣ ваттхусмим̣ анун̃н̃а̄там̣.

виссаджджана̄ – са̄ваттхийам̣ бханте самбахуле бхиккхӯ а̄раббха анун̃н̃а̄там̣, самбахула̄нам̣ бханте бхиккхӯнам̣ са̄радикена а̄ба̄дхена пут̣т̣ха̄нам̣ йа̄гупи на самма̄ парин̣а̄мам̣ гаччхи, бхаттампи бхуттам̣ на самма̄ парин̣а̄мам̣ гаччхи, те тена киса̄ ахесум̣ лӯкха̄ дуббан̣н̣а̄ уппан̣д̣уппан̣д̣укаджа̄та̄ дхаманисантхатагатта̄, тасмим̣ бханте ваттхусмим̣ анун̃н̃а̄там̣.

пуччха̄ – мӯла̄дибхесаджджа̄ни а̄вусо бхагавата̄ каттха анун̃н̃а̄та̄ни, кам̣ а̄раббха кисмим̣ ваттхусмим̣ анун̃н̃а̄та̄ни.

виссаджджана̄ – са̄ваттхийам̣ бханте самбахуле гила̄не бхиккхӯ а̄раббха анун̃н̃а̄та̄ни, самбахула̄нам̣ гила̄на̄нам̣ бхиккхӯнам̣ мӯлехи бхесаджджехи аттхо ахоси, тасмим̣ бханте ваттхусмим̣ анун̃н̃а̄та̄ни.

пуччха̄ – антовут̣т̣хам̣ва̄ а̄вусо антопаккам̣ ва̄ са̄мам̣паккам̣ ва̄ парибхун̃джантасса дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – ра̄джагахе бханте а̄йасмантам̣ а̄нандам̣ а̄раббха пан̃н̃аттам̣, а̄йасма̄ бханте а̄нандо са̄мам̣ тилампи тан̣д̣улампи муггампи вин̃н̃а̄петва̄ анто ва̄сетва̄ анто са̄мам̣ пачи, тасмим̣ бханте ваттхусмим̣ пан̃н̃аттам̣.

суппийа̄ ваттху

пуччха̄ – мануссамам̣сам̣ а̄вусо парибхун̃джантасса тхуллаччайан̃ча аппат̣ивеккхитва̄ мам̣сам̣ парибхун̃джантасса дуккат̣ан̃ча бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – ба̄ра̄н̣асийам̣ бханте ан̃н̃атарам̣ бхиккхум̣ а̄раббха пан̃н̃аттам̣, ан̃н̃атаро бханте бхиккху аппат̣ивеккхитва̄ мануссамам̣сам̣ бхун̃джи, тасмим̣ бханте ваттхусмим̣ пан̃н̃аттам̣.

на бхиккхаве мануссамам̣сам̣ парибхун̃джитаббам̣, йо парибхун̃джеййа, а̄патти тхуллаччайасса, на ча бхиккхаве аппат̣ивеккхитва̄ мам̣сам̣ парибхун̃джитаббам̣, йо парибхун̃джеййа а̄патти дуккат̣асса.

пуччха̄ – хаттхимам̣сам̣ ва̄ а̄вусо ассамам̣сам̣ ва̄ парибхун̃джантасса дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – ба̄ра̄н̣асийам̣ бханте самбахуле бхиккхӯ а̄раббха пан̃н̃аттам̣, самбахула̄ бханте бхиккхӯ хаттхимам̣сампи ассамам̣сампи парибхун̃джим̣су, тасмим̣ бханте ваттхусмим̣ пан̃н̃аттам̣.

пуччха̄ – сунаккхамам̣сам̣ ва̄ а̄вусо ахимам̣сам̣ ва̄ бхун̃джантасса дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – ба̄ра̄н̣асийам̣ бханте самбахуле бхиккхӯ а̄раббха пан̃н̃аттам̣, самбахула̄ бханте бхиккхӯ сунаккхамам̣сампи ахимам̣сампи парибхун̃джим̣су, тасмим̣ бханте ваттхусмим̣ пан̃н̃аттам̣.

пуччха̄ – сӣхамам̣сам̣ ва̄ а̄вусо бйаггхамам̣сам̣ ва̄ дӣпимам̣сам̣ ва̄ аччхамам̣сам̣ ва̄ тараччхамам̣сам̣ ва̄ бхун̃джантасса дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – ба̄ра̄н̣асийам̣йева бханте самбахуле бхиккхӯ а̄раббха пан̃н̃аттам̣, самбахула̄ бханте бхиккхӯ сӣхамам̣сампи бйаггхамам̣сампи дӣпимам̣сампи аччхамам̣сампи тараччхамам̣сампи парибхун̃джим̣су, тасмим̣ бханте ваттхусмим̣ пан̃н̃аттам̣.

пуччха̄ – гила̄насса а̄вусо гул̣ам̣ ва̄ агила̄насса гул̣одакам̣ ва̄ бхагавата̄ каттха анун̃н̃а̄там̣, кам̣ а̄раббха кисмим̣ ваттхусмим̣ анун̃н̃а̄там̣.

виссаджджана̄ – ра̄джагахе бханте самбахуле бхиккхӯ а̄раббха анун̃н̃а̄там̣, самбахула̄ бханте бхиккхӯ гила̄нассева бхагавата̄ гул̣о анун̃н̃а̄то но агила̄насса̄ти куккучча̄йанта̄ гул̣ам̣ на бхун̃джим̣су, тасмим̣ бханте ваттхусмим̣ анун̃н̃а̄там̣.

пуччха̄ – джа̄нам̣ а̄вусо уддисса катам̣ мам̣сам̣ парибхун̃джантасса дуккат̣ам̣ пан̃н̃апетва̄ тикот̣ипарисуддхам̣ мам̣сам̣ бхагавата̄ каттха анун̃н̃а̄там̣.

виссаджджана̄ – веса̄лийам̣ бханте сӣхасса сет̣а̄патино ваттхусмим̣ анун̃н̃а̄там̣.

мен̣д̣ака ваттху

пуччха̄ – па̄тхеййам̣ а̄вусо парийеситун̃ча каппийака̄рака̄нам̣ хаттхе упаниккхиттахиран̃н̃ато ниббаттам̣ каппийапаччайам̣ са̄дитун̃ча бхагавата̄ каттха анун̃н̃а̄там̣, кам̣ а̄раббха кисмим̣ ваттхусмим̣ анун̃н̃а̄там̣.

виссаджджана̄ – антара̄ ча бханте бхаддийам̣ антара̄ ча ан̇гуттара̄пам̣ мен̣д̣акам̣ гахапатим̣ а̄раббха анун̃н̃а̄там̣, мен̣д̣ако бханте гахапати бхагавантам̣ йа̄чи ‘‘санти бханте магга̄ канта̄ра̄ апподака̄ аппабхаккха̄ на сукара̄ апа̄тхеййена гантум̣, са̄дху бханте бхагава̄ бхиккхӯнам̣ па̄тхеййам̣ ануджа̄на̄тӯ’’ти, тасмим̣ бханте ваттхусмим̣ анун̃н̃а̄там̣.

кен̣ийа ваттху

пуччха̄ – ат̣т̣ха а̄вусо па̄на̄ни бхагавата̄ каттха анун̃н̃а̄та̄ни, кам̣ а̄раббха кисмим̣ ваттхусмим̣ анун̃н̃а̄та̄ни.

виссаджджана̄ – а̄пан̣е бханте самбахуле бхиккхӯ а̄раббха анун̃н̃а̄та̄ни, самбахула̄ бханте бхиккхӯ куккучча̄йанта̄ па̄на̄ни на пат̣игган̣хим̣су, тасмим̣ бханте ваттхусмим̣ анун̃н̃а̄та̄ни.

роджамалла̄ ваттху

пуччха̄ – саббан̃ча а̄вусо д̣а̄кам̣ саббан̃ча пит̣т̣хакха̄данӣйам̣ бхагавата̄ каттха анун̃н̃а̄там̣, кам̣ а̄раббха кисмим̣ ваттхусмим̣ анун̃н̃а̄там̣.

виссаджджана̄ – кусина̄ра̄йам̣ бханте самбахуле бхиккхӯ а̄раббха анун̃н̃а̄там̣, самбахула̄ бханте бхиккхӯ куккучча̄йанта̄ д̣а̄кан̃ча пит̣т̣хакха̄данӣйан̃ча на пат̣иггахесум̣, тасмим̣ бханте ваттхусмим̣ анун̃н̃а̄там̣.

пуччха̄ – акаппийам̣ а̄вусо сама̄дапентасса дуккат̣ам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – а̄тума̄йам̣ бханте ан̃н̃атарам̣ вуд̣д̣хапаббаджитам̣ а̄раббха пан̃н̃аттам̣, ан̃н̃атаро бханте вуд̣д̣хапаббаджито акаппийе сама̄дапети, тасмим̣ бханте ваттхусмим̣ пан̃н̃аттам̣.

пуччха̄ – сан̇гхика̄ни ва̄ а̄вусо пуггалика̄ни ва̄ бӣджа̄ни пуггалика̄йа ва̄ сан̇гхика̄йа ва̄ бхӯмийа̄ ропита̄ни бха̄гам̣ датва̄ парибхун̃джитум̣ бхагавата̄ каттха анун̃н̃а̄там̣, кисмим̣ ваттхусмим̣ анун̃н̃а̄там̣.

виссаджджана̄ – са̄ваттхийам̣ бханте анун̃н̃а̄там̣, са̄ваттхийам̣ бханте бхагавати вихарати сан̇гхика̄нипи бӣджа̄ни пуггалика̄йа бхӯмийа̄ ропийим̣су, пуггалика̄нипи бӣджа̄ни сан̇гхика̄йа бхӯмийа̄ ропийим̣су, тасмим̣ бханте ваттхусмим̣ анун̃н̃а̄там̣.

пуччха̄ – винайамаха̄падесасан̇кха̄та̄ни а̄вусо чатта̄ри каппийа̄каппийаанулома̄ни бхагавата̄ каттха пан̃н̃атта̄ни, кам̣ а̄раббха кисмим̣ ваттхусмим̣ пан̃н̃атта̄ни.

виссаджджана̄ – са̄ваттхийам̣ бханте самбахуле бхиккхӯ а̄раббха пан̃н̃атта̄ни, самбахула̄нам̣ бханте бхиккхӯнам̣ кисмин̃чи кисмин̃чит̣ха̄не куккуччам̣ уппаджджи, тасмим̣ бханте ваттхусмим̣ пан̃н̃атта̄ни.

пуччха̄ – йа̄вака̄лика̄дӣхи сам̣сат̣т̣ха̄нам̣ а̄вусо йа̄мака̄лика̄дӣнам̣ парибхогака̄ламарийа̄дам̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – са̄ваттхийам̣ бханте самбахуле бхиккхӯ а̄раббха пан̃н̃аттам̣, самбахула̄нам̣ бханте бхиккхӯнам̣ етадахоси ‘‘каппати нукхо йа̄вака̄ликена йа̄мака̄ликам̣ сатта̄хака̄ликам̣ йа̄ваджӣвикам̣, на нукхо каппати. каппатинукхо йа̄мака̄ликена сатта̄хака̄ликам̣ йа̄ваджӣвикам̣, на нукхо каппати. каппати нукхо сатта̄хака̄ликена йа̄ваджӣвикам̣, на нукхо каппатӣ’’ти. тасмим̣ бханте ваттхусмим̣ пан̃н̃аттам̣.

пуччха̄ – бхесаджджакам̣ пуччхиссам̣, санида̄нам̣ саниддесам̣. самуккат̣т̣хапада̄нам̣ а̄вусо кати а̄паттийо.

виссаджджана̄ – бхесаджджакам̣ виссаджджиссам̣ санида̄нам̣ саниддесам̣. самуккат̣т̣хапада̄нам̣ бханте тиссо а̄паттийо.