4. пава̄ран̣а̄ккхандхака

пуччха̄ – вассам̣ вут̣т̣ха̄нам̣ а̄вусо бхиккхӯнам̣ тӣхи т̣ха̄нехи пава̄ритум̣ бхагавата̄ каттха пан̃н̃аттам̣, кам̣ а̄раббха кисмим̣ ваттхусмим̣ пан̃н̃аттам̣.

виссаджджана̄ – са̄ваттхийам̣ бханте самбахуле бхиккхӯ а̄раббха анун̃н̃а̄там̣, самбахула̄ бханте бхиккхӯ сандит̣т̣ха̄ самбхатта̄ антовассам̣ нева а̄лапим̣су на саллапим̣су, тасмим̣ бханте ваттхусмим̣ анун̃н̃а̄там̣.

ануджа̄на̄ми бхиккхаве вассам̣ вут̣т̣ха̄нам̣ бхиккхӯнам̣ тӣхи т̣ха̄нехи пава̄ретум̣, дит̣т̣хева ва̄ сутена ва̄ парисан̇ка̄йа ва̄.

пуччха̄ – кати а̄вусо пава̄ран̣а̄ дивасавасена ча пуггалавасена ча ка̄табба̄ка̄равасена ча.

виссаджджана̄ – дивасавасена бханте тиссо пава̄ран̣а̄, татха̄ пуггалавасена ка̄табба̄ка̄равасенача.

пуччха̄ – катӣнам̣ а̄вусо сан̇гхе пава̄ретум̣ бхагавата̄ анун̃н̃а̄там̣, катӣнам̣ пана̄вусо ан̃н̃аман̃н̃ам̣ пава̄ретум̣ бхагавата̄ анун̃н̃а̄там̣.

виссаджджана̄ – пан̃чаннам̣ бханте бхиккхӯнам̣ сан̇гхе пава̄ретум̣ бхагавата̄ анун̃н̃а̄там̣, чатуннам̣ ва̄ бханте тин̣н̣ам̣ ва̄ двиннам̣ ва̄ ан̃н̃аман̃н̃ам̣ пава̄ретум̣ анун̃н̃а̄там̣.

пуччха̄ – екена пана̄вусо вассам̣вут̣т̣хена бхиккхуна̄ катхам̣ пат̣ипаджджитаббанти бхагавата̄ анун̃н̃а̄там̣.

виссаджджана̄ – екена пана бханте бхиккхуна̄ ‘‘аджджа ме пава̄ран̣а̄’’ти адхит̣т̣ха̄таббанти бхагавата̄ анун̃н̃а̄там̣.

пуччха̄ – пава̄ран̣ам̣ пуччхиссам̣, санида̄нам̣ саниддесам̣. самуккат̣т̣хапада̄нам̣ а̄вусо кати а̄паттийо.

виссаджджана̄ – пава̄ран̣ам̣ виссаджджиссам̣, санида̄нам̣ саниддесам̣. самуккат̣т̣хапада̄нам̣ бханте тиссо а̄паттийо.