пан̃н̃а̄сатима париччхеда

двира̄джакона̄ма

1. тато радждже патит̣т̣ха̄йа, кассапо даккхин̣ам̣ дисам̣;

ада̄ кассапана̄масса, йувара̄джасса дхӣмато.

2. агга̄бхисекам̣ да̄песи, йувара̄джасса дхӣтуйа̄;

ра̄джакан̃н̃а̄йа тисса̄йа, бхарийа̄йе’ва аттано.

3. йа̄чака̄нан̃ча сиппӣнам̣, а̄гата̄нам̣ тато тато;

да̄нам̣ дан̣д̣иссарам̣ на̄ма, сада̄ да̄песи бхӯпати.

4. а̄дипа̄до махиндо со,

васанто рохан̣е тада̄;

гахетум̣ ра̄джинорат̣т̣ха-

ма̄да̄йа балама̄гато.

5. там̣ сутва̄ купито ра̄джа̄, балам̣ песеси аттано;

йуджджхитва̄ там̣ пара̄джеси, махиндо со маха̄бхат̣о.

6. тато ра̄джа̄ ниваттетум̣, питарам̣ тасса песайи;

кассапам̣ йувара̄джам̣ там̣, со гантва̄ путтасантикам̣.

7. на̄на̄дхаммакатхопетам̣, ватва̄ йуттиманекадха̄;

сан̇гха̄мато ниваттетва̄, путтам̣ со пунара̄гами.

8. а̄дипа̄до ту со паччха̄, гха̄тетва̄ ман̣д̣ала̄дхипе;

куддхеджанападе дисва̄, агама̄си пурантикам̣.

9. бхиккхусан̇гхо тама̄нетва̄, дассеси васудха̄дхипам̣;

датва̄ со дхӣтарам̣ тасса̄, песеси пуна рохан̣ам̣.

10. нӣхаритва̄на дуссӣле, ника̄йаттайава̄сӣсу;

га̄ха̄песи наве бхиккхӯ, а̄ва̄се таттха таттха со.

11. двайа̄бхисекаджа̄тена, а̄дипа̄дена сунуна̄;

маха̄виха̄ре бодхимхи, пам̣сум̣ вад̣д̣хеси пӯджайам̣.

12. ака̄си ча ника̄йесу, тӣсу бимбе сила̄майе;

сован̣н̣айе рам̣сиджа̄ле, чхаттам̣ чӯл̣а̄ман̣им̣ татха̄.

13. абхайагиривиха̄рамхи, па̄са̄дам̣ сакана̄макам̣;

катва̄ таттха нива̄сетва̄, бхиккху га̄мамада̄пайи.

14. махийан̇ган̣авиха̄расмим̣, га̄мам̣ со четийасса’да̄;

саваттхам̣ пат̣има̄бхаттам̣, саббабхиккхӯна да̄пайи.

15. тхале джале ча сатта̄нам̣, ада̄си абхайам̣ тада̄;

ча̄риттапуббара̄джӯнам̣, парипа̄леси саббада̄.

16. тасса сена̄пати сено, илан̇гора̄джавам̣саджо;

тхерийа̄нам̣ ака̄’ва̄сам̣; тхӯпа̄ра̄масса паччхато.

17. дхамма̄ручикабхиккхӯнам̣, дхамма̄ра̄мамака̄райи;

татха̄ са̄галика̄нан̃ча, кассапасенана̄макам̣.

18. хадайун̣ха̄бхидха̄нам̣ со, катва̄ четийапаббате;

паривен̣ам̣ ада̄дхамма-ручика̄нан̃ча бхиккхӯнам̣.

19. а̄ра̄мика̄нам̣ бхиккхӯнам̣, а̄ра̄месу тахим̣ тахим̣;

екамекам̣ кут̣им̣ катва̄, да̄песи ча чамӯпати.

20. раттама̄лагирисмим̣ со, катва̄ раммам̣ тарам̣ субхам̣;

кучим̣ ада̄ са̄санасса, са̄мика̄нам̣ тапассинам̣.

21. маха̄виха̄ре ка̄ретва̄, павивен̣ам̣ варам̣ ада̄;

пам̣сукӯликабхиккхӯнам̣, самуддагирина̄макам̣.

22. ва̄сам̣ аран̃н̃е ка̄ретва̄, аттано вам̣сана̄макам̣;

маха̄виха̄ре бхиккхӯнам̣, ване нива̄сатам̣ ада̄.

23. виха̄ресӯ ча джин̣н̣есу, навакаммамака̄райи;

да̄песи аггалам̣ сабба-бхиккхӯнам̣ джин̣н̣ачӣваре.

24. тисса̄ра̄мам̣ каритва̄на, бхиккхӯнӣнамупассайам̣;

маричават̣т̣имаха̄бодхи, париха̄ре нивесайи.

25. анура̄дхапуре чева, пулаттхинагарепи ча;

упасаггарогана̄са̄йа, веджджаса̄ла̄пи ка̄райи.

26. аттана̄ катава̄санам̣, бхогага̄ме ча да̄пайи;

татха̄ра̄микага̄ме ча, пат̣има̄бхаран̣ан̃ча со.

27. бхесаджджагехам̣ ка̄реси, нагаре таттха таттха со;

пам̣сукӯликабхиккхӯнам̣, бхаттам̣ ваттхан̃ча да̄пайи.

28. кхандхӣкате амочеси, тираччха̄нагате бахӯ;

капан̣а̄нан̃ча да̄песи, маха̄да̄нам̣ чамӯпати.

29. вичиттам̣ бйан̃джанам̣ бхаттам̣, йа̄гум̣ вивидхакхаджджакам̣;

катва̄ сӯкарарӯпан̃ча, гул̣ам̣ бхиккхӯнам̣ да̄пайи.

30. ева̄ма̄дӣни пун̃н̃а̄ни, катва̄ сена̄йа на̄йако;

сено киттиндупа̄дехи, сабба̄ обха̄сайӣ диса̄.

31. тассева н̃а̄тако катва̄, на̄йако раккхасавхайо;

сава̄ракамхи га̄мамхи, виха̄рам̣ суманохарам̣.

32. маха̄виха̄рава̄сӣнам̣, са̄ра̄нам̣ пат̣ипаттийа̄;

бхиккхӯнам̣ со ада̄ са̄дху, т̣хапетва̄ ваттамуттамам̣.

33. сено на̄ма маха̄лекхо, маха̄лекхакапаббатам̣;

маха̄виха̄ре ка̄реси, бхиккхӯнам̣ ва̄самуттамам̣.

34. чол̣ара̄джа̄бхидха̄но, ча, амаччо тасса ра̄джино;

паривен̣ам̣ ака̄раммам̣, нат̣т̣хам̣ там̣ суппатит̣т̣хитам̣.

35. ра̄джа̄ тӣсу ника̄йесу, рӯпакаммаманорамам̣;

ман̣д̣апа̄ни вичитта̄ни, веджайанто пама̄ни ча.

36. ка̄ретва̄ дха̄тупӯджа̄йо, катва̄ джанаманохара̄;

йатха̄ каммам̣ гато т̣хатва̄, васса̄ни дасасатта ча.

37. двайа̄бхисекасан̃джа̄то, йувара̄джа̄тха кассапо;

а̄си ладдха̄бхисеко со, лам̣ка̄раджджекама̄гате.

38. саддхо а̄гатамаггова, са̄бхин̃н̃о вийа пан̃н̃ава̄;

ватта̄ со марамантива, ча̄гава̄ дханадо вийа.

39. бахуссуто дхаммакатхӣ, саббасиппависа̄радо;

йутта̄йуттавича̄ра̄йа, нипун̣о найаковидо.

40. ачало индалӣло’ва, т̣хито сугатаса̄сане;

параппава̄дива̄техи, саббехи’пи акампийо.

41. ма̄йа̄са̄т̣хеййама̄на̄ди, па̄па̄нан̃ча агочаро;

гун̣а̄нам̣ а̄каро сабба-ратана̄нам̣ васа̄гаро.

42. бхӯмичандо нариндо со, вам̣се джа̄тасса аттано;

даппул̣асса̄дӣпа̄дасса, йувара̄джападам̣ ада̄.

43. раджджам̣ дасахи дхаммехи, чатусан̇гахаваттхӯхи;

каронто парипа̄леси, локам̣ неттам̣ва аттано.

44. со дхетва̄ са̄санам̣ саббам̣, дхаммакаммена саттхуно;

гахетва̄ наваке бхиккхӯ, ака̄са̄’ва̄сапӯран̣ам̣.

45. дут̣т̣хага̄ман̣ира̄джена, катам̣ маричават̣т̣икам̣;

нат̣т̣хам̣ виха̄рам̣ ка̄ретва̄, на̄на̄а̄ва̄са бхӯситам̣.

46. тхеравам̣саджабхиккхӯнам̣, ада̄ катва̄ маха̄махам̣;

тесам̣ пан̃часата̄нан̃ча, бхогага̄ме ча да̄пайи.

47. таттха со тусите рамме, девасан̇гхапураккхатам̣;

меттеййам̣ локана̄тхам̣ там̣, десентам̣ дхаммамуттамам̣.

48. дассенто вийа локасса, виха̄ре саббасаджджите;

нисинно ман̣д̣апе рамме, на̄на̄ратанабхӯсите.

49. нагарехи ча саббехи, бхиккхӯхи парива̄рито;

буддхалила̄йа лам̣киндо, абхидхамма мабха̄сайи.

50. сон̣н̣апат̣т̣е ликха̄петва̄-бхидхаммапит̣акам̣ тада̄;

дхаммасан̇ган̣икам̣ поттхам̣, на̄на̄ратана бхӯситам̣.

51. катва̄ нагарамаджджхамхи, ка̄ретва̄ хемамуттамам̣;

там̣ таттха т̣хапайитва̄на, париха̄рамада̄пайи.

52. саккасена̄патит̣т̣ха̄нам̣, датва̄ путтасса аттано;

париха̄ре нийоджеси, таттха там̣ дхаммапоттхаке.

53. анусам̣ваччхарам̣ ра̄джа̄, пурам̣ девапурӣ вийа;

вибхӯсита̄йа сена̄йа, саджджетва̄ парива̄рито.

54. девара̄джа̄ва собханто, сабба̄бхаран̣абхӯсито;

хаттхикхан̣д̣е нисӣдитва̄, чаранто пуравӣтхийам̣.

55. махата̄ париха̄рена, нетва̄ там̣ дхаммасан̇гахам̣;

аттана̄ ка̄ритам̣ раммам̣, виха̄рам̣ саббасаджджитам̣.

56. таттха дха̄тугате рамме, на̄на̄ратанабхӯсите;

ман̣д̣апе дха̄тупит̣хасмим̣, патит̣т̣ха̄пийа пӯджайи.

57. гантха̄карапаривен̣ам̣, маха̄мегхаване ака̄;

нагаре ваджджаса̄ла̄ ча, тесам̣ га̄ме ча да̄пайи.

58. бхан̣д̣икапаривен̣ан̃ча, сила̄мегхан̃ча паббатам̣;

катва̄’бхайагирисмим̣ со, тесам̣ га̄мамада̄пайи.

59. джотиванавиха̄расмим̣, ра̄джа̄ лан̇ка̄йа на̄йако;

бхаттаггасса ада̄ га̄мам̣, татха̄’бхайагиримхи ча.

60. даккхин̣агирина̄масса, виха̄расса ча да̄пайи;

га̄мам̣ катан̃н̃убха̄вена, ра̄джа̄ парамадхаммико.

61. саккасена̄пати раммам̣, паривен̣ам̣ сума̄пийа;

ада̄си сахага̄мехи, тхерийа̄нам̣ сана̄микам̣.

62. бхарийа̄ ваджира̄ тасса, тесам̣йева ада̄пайи;

паривен̣ам̣ каритва̄на, сага̄мам̣ сакана̄макам̣.

63. упассайам̣ каритва̄на, са̄ ева падалан̃чхане;

бхиккхӯнӣнам̣ ада̄ тхера-вам̣се саббаттха пӯджите.

64. саккасена̄пати ма̄та̄, дева̄’ран̃н̃ака бхиккхӯнам̣;

тхеравам̣саппадӣпа̄нам̣, ака̄’ва̄сам̣ сана̄макам̣.

65. са̄ ева пат̣ибимбасса, саттху маричават̣т̣ийам̣;

чӯл̣а̄ман̣им̣ па̄даджалам̣, ака̄ чхаттан̃ча чӣварам̣.

66. ра̄джа̄ ра̄джа̄лайейева, ра̄джавам̣сам̣ сана̄макам̣;

ака̄си па̄л̣икам̣ на̄ма, па̄са̄дам̣ сумано харам̣.

67. пӯджеси ра̄джинӣ на̄ма, ра̄джино бхарийа̄’пара̄;

пат̣т̣акан̃чукапӯджа̄йа, хемама̄лика четийам̣.

68. тасса̄ путтоси сиддхаттхо, на̄ма иссарийе т̣хито;

суто малайара̄джа̄ти, рӯпена макараддхаджо.

69. ра̄джа̄ тасмим̣ мате катва̄, са̄лам̣ бхиккхунамуттамам̣;

да̄нават̣т̣ам̣ пат̣т̣хапетва̄, тасса паттимада̄ тада̄.

70. евам̣ дхаммена ка̄ренте, раджджам̣ лан̇ка̄дӣпе тада̄;

чол̣ара̄джена йуджджхитва̄, пан̣д̣ура̄джа̄ пара̄джито.

71. пан̣н̣а̄ка̄ра̄ни нека̄ни, балам̣ сандха̄йа песайи;

ра̄джа̄лам̣киссаро саддхим̣, мантетва̄ сачивехи со.

72. саннайха балака̄йам̣ со, саккасена̄патим̣ сакам̣;

баласса на̄йакам̣ катва̄, маха̄йиттхамупа̄гами.

73. виджайам̣ пуббара̄джӯнам̣, ватва̄ вела̄тат̣е т̣хито;

усса̄хам̣ джанайитва̄на, на̄вам̣ а̄ропайӣ балам̣.