екӯначатта̄лӣсатима париччхеда

ра̄джадвайадӣпано

1. тато кассапана̄мо со, па̄пако нарапа̄лако;

асса го пан̃часӯдан̃ча, песайитва̄на бха̄тикам̣.

2. ма̄ра̄петум̣ асакконто, бхӣто сӣхагирим̣ гато;

дура̄рохам̣ мануссехи, содха̄петва̄ самантато.

3. па̄ка̄рена париккхиппа, сӣха̄ка̄рена ка̄райи;

таттха ниссен̣и геха̄ни, тена там̣ на̄мако ахӯ.

4. сам̣харитва̄ дханам̣ таттха, нидахитва̄ сугопитам̣;

аттано нихита̄нам̣ со, раккхам̣ датва̄ тахим̣ тахим̣.

5. катва̄ ра̄джагхарам̣ таттха, дассанеййам̣ манорамам̣;

дутийа̄лакамандам̣ва, куверова тахим̣ васи.

6. мига̄ро на̄ма ка̄реси, сена̄пати сана̄макам̣;

паривен̣ам̣ татха̄геха-мабхисекаджинисса ча.

7. тасса̄бхисекам̣ йа̄читва̄, сила̄самбуддхато’дхирам̣;

аладдха̄са̄ми но радждже, джа̄нисса̄мӣти сан̣т̣хахи.

8. хутва̄ виппат̣иса̄рӣ со, аттана̄ катакаммана̄;

муччисса̄ми катам̣ ну’ти, пун̃н̃ам̣ ка̄си анаппакам̣.

9. маха̄ ваттхуни ка̄реси, два̄ресу нагарасса со;

амбуййа̄не ча ка̄реси, дӣпе йоджана йоджане.

10. иссарасаман̣а̄ра̄мам̣, ка̄ретва̄ пуббаваттхуто;

адхикам̣ бхогага̄ме ча, адхикам̣ тасса да̄пайи.

11. бодхи уппалаван̣н̣а̄ ча, тасса̄сум̣ дхӣтаро дуве;

виха̄расса’сса ка̄реси, на̄мам̣ та̄сан̃ча аттано.

12. денте тасмим̣ на иччхим̣су, саман̣а̄ тхерава̄дино;

‘‘питугха̄тисса камма’’нти, локага̄райха бхӣруно.

13. да̄тука̄моса тесам̣’ва, самбуддха пат̣има̄йа’да̄;

бхиккхаве адхива̄сесум̣, бхого но саттхуно ити.

14. катха̄ ниййанти уййа̄не, самӣпе паббатасса со;

ка̄ра̄песи виха̄рам̣ со, тесам̣ на̄мо тато аху.

15. ада̄ дхаммаручинам̣ там̣, сампатта чатупаччайам̣;

виха̄ран̃чева уййа̄нам̣, диса̄бха̄гамхи уттаре.

16. бхаттам̣ санӣрапаккам̣ со, бхун̃джитва̄ диннамиттхийа̄;

саппийуттам̣ манун̃н̃ехи, сӯпехи абхисан̇кхатам̣.

17. манун̃н̃амидамаййа̄нам̣, дассамеванти та̄дисам̣;

бхаттам̣ па̄да̄си бхиккхӯнам̣, саббесан̃ча сачӣварам̣.

18. упосатхамадхит̣т̣ха̄си, аппаман̃н̃ан̃ча бха̄вайи,

сама̄дийи дхутан̇ге ча, ликха̄песи ча поттхаке.

19. пат̣има̄да̄на са̄ла̄дим̣, ка̄ра̄песи анаппакам̣;

бхито со паралокамха̄, моггалла̄на̄ ча ваттати.

20. тато ат̣т̣ха̄расе вассе, моггалла̄но маха̄бхат̣о;

а̄десена ниган̣т̣ха̄нам̣, два̄дасаггасаха̄йа ва̄.

21. джамбудӣпа̄ идха̄гамма, десе амбат̣т̣хаколаке;

кул̣а̄рӣ на̄ме бандхиттха, виха̄ре баласан̃чайам̣.

22. ра̄джа̄ сутва̄ гахетва̄ там̣, бхан̃джисса̄мити никкхами;

немиттехи на сакка̄ти, вадантепи маха̄бало.

23. моггалла̄нопи саннаддха бало сӯрасаха̄йа ва̄;

гаччханто сурасан̇га̄мам̣, дево вийа суджампати.

24. ан̃н̃аман̃н̃ам̣ упа̄гамма, бхиннавела̄ва са̄гара̄;

а̄рабхим̣су маха̄йуддхам̣, балака̄йа̄ убхопи те.

25. кассапо пурато дисва̄, махантам̣ каддама̄сайам̣;

гантуман̃н̃ена маггена, париваттеси дантинам̣.

26. дисва̄ там̣ са̄миконо’йам̣, пала̄йати бхан̣е ити;

балака̄йо пабхиджджиттха, ‘‘дит̣т̣хам̣ пит̣ха’’нти гхосайум̣.

27. моггала̄на бала̄ра̄джа̄, чхетва̄ никаран̣ена со;

сӣсам̣ уккхипийа̄’ка̄сам̣, чхурикам̣ косийам̣ кхипи.

28. катва̄’л̣а̄хана киччам̣ со, тасса камме пасӣдийа;

саббам̣со дханама̄да̄йа, а̄ган̃чхи нагарам̣ варам̣.

29. бхиккхӯ сутва̄ паваттим̣ там̣, суниваттха̄ супа̄рута̄;

саммаджджитва̄ виха̄ран̃ча, ат̣т̣хам̣су пат̣ипа̄т̣ийа̄.

30. маха̄мегхаванам̣ патва̄, девара̄джа̄ва нанданам̣;

маха̄сена ниваттетва̄, хаттхипа̄ка̄рато бахи.

31. упасан̇камма вандитва̄, сан̇гхе тасмим̣ пасӣдийа;

чхаттаттена сан̇гхам̣ пӯджеси, сан̇гхо тассева там̣ ада̄.

32. там̣ т̣ха̄нам̣ чхаттавад̣д̣хӣти, вохарим̣су тахим̣ катам̣;

паривен̣ампи там̣ на̄мам̣, ахоси пурама̄гато.

33. виха̄ре двепи гантва̄на, сан̇гхам̣ таттха̄’бхивандийа;

па̄пун̣итва̄ маха̄раджджам̣, локам̣ дхаммена па̄лайи.

34. куддхо нӣхари да̄т̣хам̣со, гха̄такам̣ питуно мама;

ануваттитва̄ мачча̄ти, тена раккхаса на̄ма ва̄.

35. атирекасахассам̣ со, амачча̄нам̣ вина̄сайи;

кан̣н̣ана̄са̄ди чхедеси, пабба̄джеси татха̄ бахӯ.

36. тато сутва̄на саддхамма-мупасанно сума̄насо;

маха̄да̄нам̣ паваттеси, мегхо вийа махӣтале.

37. пхуссапун̣н̣амӣйам̣ да̄на-манувассам̣ паваттайи;

тато пат̣т̣ха̄йа там̣ да̄нам̣, дӣпе аджджа̄пи ваттати.

38. сопи са̄ратхико ла̄джа-да̄йако питура̄джино;

а̄нетва̄ питусанде сам̣, моггалла̄насса дассайи.

39. там̣ дисва̄ паридевитва̄, питуно пема маттанӣ;

ван̣н̣етва̄ тасса па̄да̄си, два̄рана̄йакатам̣ вибхӯ.

40. сена̄пати мига̄рохи, ниведетва̄ йатха̄ видхим̣;

абхисека джинасса̄’ка̄, абхисекам̣ йатха̄ручим̣.

41. сӣха̄’чале дал̣хана̄мам̣, да̄т̣ха̄ кон̣д̣ан̃н̃акампи ча;

виха̄рам̣ дхаммаручинам̣, са̄галинан̃ча да̄пайи.

42. паббатанту виха̄рам̣со, катва̄ тхерасса да̄пайи;

маха̄на̄масана̄масса, дӣгхасан̣д̣а виха̄раке.

43. ра̄джинина̄макан̃чева, катва̄ бхиккхунупассайам̣;

ада̄ са̄галика̄нам̣ со, бхиккхунӣнам̣ маха̄мати.

44. ламбакан̣н̣акаготтопи, да̄т̣ха̄ пабхути на̄мако;

кассапасса упат̣ха̄не, кочи ниббинна ма̄насо.

45. ганта̄ ме релийам̣ ваггам̣,

ва̄сам̣ таттхева каппайи;

ахоси путто тассеко,

сила̄ка̄ лоти писсуто.

46. сопи кассапато бхӣто, н̃а̄такена саха’ттано;

моггалла̄нена гантва̄на, джамбудӣпаталам̣ ито.

47. бодхипан̣д̣авиха̄рампи, паббаджджам̣ самупа̄гато;

каронто сан̇гхакичча̄ни, са̄даро со супесало.

48. аммам̣ сан̇гхасса па̄да̄си, сан̇гхо тасмим̣ пасӣдийа;

а̄ха’мба са̄ман̣еро’ти, тена там̣ на̄мако аху.

49. со кесадха̄тувам̣самхи, вуттена видхина̄ тато;

кесадха̄тум̣ лабхитва̄на, тасса радждже идха̄’найи.

50. тасса катва̄на сакка̄рам̣, гахетва̄ кеса дха̄туйо;

махаггхе нидахитва̄на, каран̣д̣е пхаликумбхавхе.

51. дӣпан̇карасса на̄тхасса, пат̣има̄йа гхаре варе;

вад̣д̣хетва̄ париха̄рена, маха̄пӯджам̣ паваттайи.

52. ма̄тулам̣ бхарийан̃ча’сса, катва̄ сован̣н̣айам̣ тахим̣;

т̣хапеси пат̣има̄йо ча, асса бимбан̃ча ча̄рукам̣.

53. кесадха̄тукаран̣д̣ан̃ча, чхаттам̣ ратанаман̣д̣апам̣;

са̄вакаггайум̣гам̣ ва̄л̣а-бӣджанин̃ча сака̄райи.

54. париха̄ран̃ча тасса’да̄, ра̄джа̄ адхикаматтано;

сила̄ка̄л̣а масигга̄хам̣, катва̄ раккха̄йа йоджайи.

55. асигга̄хасила̄ка̄л̣о, ити тена̄’си виссуто;

бхагинин̃ча’сса па̄да̄си, саддхим̣ бхогена бхӯмипо.

56. вутто’йамати сан̇кхепо, виттха̄ро пана саббасо;

кесадха̄тукавам̣самха̄, гахетаббо вибха̄вина̄.

57. бандхитва̄ са̄гара̄ раккхам̣, дӣпан̃ча ка̄синиббхайам̣;

дхаммакаммана содхеси, садхаммам̣ джинаса̄санам̣.

58. сена̄патиса на̄мам̣’ка̄, падха̄нагхара муттаро;

катва̄’т̣т̣ха̄расаме вассе, со пун̃н̃а̄ни кхайам̣ гато.

59. кассапато джито атибали пун̃н̃аккхайе сан̇кхате;

джетум̣ но висахиттха маччумупагам̣ со йевада̄совийа;

тасма̄ маччубалам̣ нихачча сукхино хессанти медха̄вино;

нибба̄нам̣ парамаччутам̣ сивападам̣ паттаббаматтан̃н̃уна̄.

суджанаппаса̄да сам̣вегаттха̄йа кате маха̄вам̣се

ра̄джадвайадӣпано на̄ма

екӯначатта̄лӣсатимо париччхедо.