суджанакан̣д̣а

176. саддха̄сӣла̄дидхаммехи, саппанно сет̣т̣хама̄нусо;

вутто буддха̄дисантехи, са̄дхусаппурисо ити.

садда̄дханам̣ сӣладханам̣, хирӣоттаппийам̣ дханам̣;

сутадханан̃ча ча̄го ча, пан̃н̃а̄ ве саттамам̣ дханам̣.

йасса ете дхана̄ аттхи, иттхийа̄ пурисасса ва̄;

адалиддоти там̣ а̄ху, амогхам̣ тасса джӣвитам̣.

тасма̄ саддхан̃ча сӣлан̃ча, паса̄дам̣ дхаммадассанам̣;

ануйун̃джетха медха̄вӣ, сарам̣ буддха̄наса̄санам̣.

177. саббхирева сама̄сетха, саббхи куббетха сантхавам̣;

сатам̣ саддхаммаман̃н̃а̄йа, сеййо хоти на па̄пийо.

178. чаджа дуджджанасам̣саггам̣, бхаджа са̄дхусама̄гамам̣;

кара пун̃н̃амахораттам̣, сара ниччаманиччатам̣.

179. йо ве катан̃н̃ӯ катаведӣ дхӣро,

калйа̄н̣амитто дал̣хабхатти ча хоти;

дуккхитасса саккачча кароти киччам̣,

татха̄видхам̣ саппурисам̣ ваданти.

180. ма̄та̄петтибхарам̣ джантум̣, куле джет̣т̣ха̄пача̄йинам̣;

сан̣хам̣ сакхиласамбха̄сам̣, песун̣еййаппаха̄йинам̣.

181. маччхеравинайе йуттам̣, саччам̣ кодха̄бхибхум̣ нарам̣;

там̣ ве дева̄ та̄ватим̣са̄, а̄ху ‘‘саппурисо’’ити.

182. куладжа̄то кулапутто, кулавам̣сасураккхато;

аттана̄ дуккхаппаттопи, хӣнакаммам̣ на ка̄райе.

183. удеййа бха̄н̣у паччхиме, намеййа меруаддипи;

сӣталам̣ йади нарагги, паббатагге ча уппалам̣;

викасе на випарита̄, са̄дхува̄ча̄ куда̄чанам̣.

184. сукха̄ руккхасса чха̄йа̄ва, тато н̃а̄тима̄та̄питу;

тато а̄черасса ран̃н̃о, тато буддхассанекадха̄.

185. бхамара̄ пуппхамиччханти, гун̣амиччханти саджджана̄;

маккхика̄ пӯтимиччханти, досамиччханти дуджджана̄.

186. ма̄тухӣно дуббха̄со хи, питухӣно дуккирийо;

убхо ма̄тупитухӣна̄, дуббха̄са̄ ча дуккирийа̄.

187. ма̄тусет̣т̣хо субха̄со хи, питусет̣т̣хо сукирийо;

убхома̄ту питусет̣т̣ха̄, субха̄са̄ ча сукирийа̄.

188. сунакхо сунакхам̣ дисва̄, дантам̣ дассети хим̣ситум̣;

дуджджано суджанам̣ дисва̄, росайам̣ хим̣самиччхати.

189. на ча вегена кичча̄ни, каттабба̄ни куда̄чанам̣;

сахаса̄ ка̄ритам̣ каммам̣, ба̄ло паччха̄нутаппати.

190. кодхам̣ вадхитва̄ на када̄чи сочати,

маккхаппаха̄нам̣ исайо ван̣н̣айанти;

саббесам̣ вуттам̣ пхарусам̣ кхаметха,

етам̣ кхантим̣ уттамама̄ху санто.

191. дуккхо нива̄со самба̄дхе, т̣ха̄не асучӣсан̇кате;

тато аримхи аппийе, татопи акатан̃н̃уна̄.

192. овадеййа̄’нуса̄сеййа, асаббха̄ ча нива̄райе;

сатан̃хи со пийо хоти, асатам̣ хотиаппийо.

193. уттаматтанива̄тена, каккхал̣ам̣ мудуна̄ джайе;

нӣчам̣ аппакада̄нена, ва̄йа̄мена самам̣ джайе.

194. на висам̣ висамичча̄ха, дханам̣ сан̇гхасса уччате;

висам̣ екам̣ва ханати, ханати сан̇гхасса саббам̣.

195. дханамаппампи са̄дхӯнам̣, кӯпе ва̄рива ниссайо;

бахум̣апи аса̄дхӯнам̣, на ча ва̄рива ан̣н̣аве.

196. апаттхеййам̣ на паттхеййа, ачинтеййам̣ на чинтайе;

дхаммамева сучинтеййа, ка̄лам̣ могхам̣ на иччхайе.

197. ачинтитампи бхавати, чинтитампи винассати;

на хи чинта̄майа̄ бхога̄, иттхийа̄ пурисасса ва̄.

198. асантасса пийо хоти, санте на куруте пийам̣;

асатам̣ дхаммам̣ рочети, там̣ пара̄бхавато мукхам̣.

199. гун̣а̄ куббанти дӯтаттам̣, дӯрепи васатам̣ сатам̣;

кетаке гандхам̣ гха̄йитва̄, гаччханти бхамара̄ сайам̣.

200. пуббаджа̄тикатам̣ каммам̣, там̣ каммамӣти катхйате;

тасма̄ пуриса̄ка̄ренам̣, йатам̣ каре атандито.

201. маттикапин̣д̣ато катта̄, куруте йам̣ йадиччхати;

еваматтакатам̣ каммам̣, ма̄н̣аво пат̣ипаджджате.

202. ут̣т̣ха̄йот̣т̣ха̄йа бодхеййам̣, махаббхайа мупат̣т̣хитам̣;

маран̣абйа̄дхисока̄нам̣, кимаджджа нипатиссати.

203. па̄н̣а̄ йатха̄ттанобхит̣т̣ха̄, бхӯта̄намапи те татха̄;

аттопамена бхӯтесу, дайам̣ куббанти са̄дхаво.

саббе тасанти дан̣д̣асса, саббе бха̄йанти маччуно;

атта̄нам̣ упамам̣ катва̄, на ханеййа на гха̄тайе.

204. ба̄ло ва̄ йади ва̄ вуддхо, йува̄ ва̄ гехама̄гато;

тасса пӯджа̄ видха̄табба̄, саббасса̄бхйа̄гато гару.

205. а̄кин̣н̣опи асантехи, асам̣сат̣т̣хова бхаддако;

бахуна̄ саннаджа̄тена, гаччхена уббаттенидха.