джиначаритайа |о0.0001|

намо тасса бхагавато арахато самма̄самбуддхасса

1. уттамам̣ уттаман̇гена намасситва̄ махесино;

нибба̄н̣амадхудам̣ па̄дапан̇каджам̣ саджджана̄линам̣.

2. маха̄мохатамам̣ локе дхам̣сентам̣ дхаммабха̄карам̣;

па̄тубхӯтам̣ маха̄теджам̣ дхаммара̄джодайа̄чале.

3. джантучиттасаре джа̄там̣ паса̄дакумудам̣ сада̄;

бодхентам̣ сан̇гхавандан̃ча силорукиран̣уджджалам̣.

4. тахим̣, тахим̣ сувиттхин̣н̣ам̣ джинасса чаритам̣ хитам̣;

паваккха̄ми сама̄сена сада̄’нуссаран̣аттхико.

5. пан̣итам̣ там̣ саранта̄нам̣ дуллабхампи сивам̣падам̣;

адуллабхам̣ бхаве бхогапат̣ила̄бхамхи ка̄ катха̄?

6. тасма̄ там̣ бхан̃н̃ама̄нам̣ ме читтавуттападаккамам̣;

сундарам̣ мадхурам̣ суддхам̣ сотусотараса̄йанам̣.

7. сотахаттхапут̣а̄ самма̄ гахетва̄на нирантарам̣;

аджара̄марами’ччханта̄ са̄дхаво парибхун̃джатха.

8. каппасатасахассасса чатуннам̣ ча̄’пи маттхаке;

асан̇кхеййа̄нама̄’ва̄сам̣ саббада̄ пун̃н̃ака̄минам̣.

9. |о0.0002|

на̄на̄ратанасампаннам̣ на̄на̄джанасама̄кулам̣;

вичитта̄пан̣а сам̣кин̣н̣ам̣ торан̣а ггхика бхӯситам̣.

10. йуттам̣ дасахи саддехи девиндапурасаннибхам̣;

пурам̣ амарасан̇кха̄там̣ ахосӣ ручирам̣ варам̣.

11. тахим̣ бра̄хманвайе джа̄то саббалока̄бхипӯджито;

маха̄дайо маха̄пан̃н̃о абхирӯпо манорамо.

12. сумедхо на̄ма на̄мена ведаса̄гарапа̄рагӯ;

кума̄ро’си гарӯнам̣ со аваса̄не джинам̣куро.

13. ра̄сивад̣д̣хакамаччена дасситам̣ амитам̣ дханам̣;

анекасатагаббхесу ничитам̣ там̣ удиккхийа.

14. дханасанничайам̣ катва̄ ахо майхам̣ пита̄дайо;

гата̄ ма̄сакаме’кампи нева̄’да̄йа дивам̣ ити.

15. сам̣вегаму’пайа̄то’вачӣмантесӣ’ти гун̣а̄каро;

дханаса̄рам̣ ихам̣ гайха гантум̣ йуттанти ме пана.

16. рахогато нисӣдитва̄ сундаре ниджамандире;

дехе досо удиккханто оваданто’пи аттано.

17. бхеданам̣ танунодуккхам̣ дуккхо тассо’дайо’пи ча;

джа̄тидхаммо джара̄дхаммо вйа̄дхидхаммо ахам̣ ити.

18. евама̄’дӣхи дехасмим̣ дисва̄ досе анекадха̄;

пуре бхерим̣ чара̄петва̄ а̄рочетва̄на ра̄джино.

19. бхерина̄дасугандхена йа̄чака̄лисама̄гате;

да̄накин̃джаккхаогхена сатта̄хам̣ пӣнайӣ тато.

20. да̄наггахимабиндӯнам̣ нипа̄тена̄’пи дхам̣санам̣;

айа̄там̣ там̣ вилокетва̄ ратанамбуджака̄нанам̣.

21. рудато н̃а̄тисан̇гхасса джалита̄налака̄нана̄;

гаджиндо вийа гехамха̄ никкхамитва̄ манорама̄.

22. |о0.0003|

махантам̣ со маха̄вӣро упаган̃чхи хима̄лайам̣;

харичанданакаппӯра̄гаругандхехи ва̄ситам̣.

23. супхаллачампака̄сокапа̄т̣алӣтилакехи ча;

пӯгапунна̄гана̄га̄дипа̄дапехи ча ман̣д̣итам̣.

24. сӣхавйаггхатараччхехи ибхадӣпикапӣхи ча;

туран̇гама̄динекехи мигехи ча сама̄кулам̣.

25. са̄л̣ика̄равихам̣сехи хам̣сакон̃часувехи ча;

капотакаравӣка̄дисакунтехи ча кӯджитам̣.

26. йаккхараккхасагандхаббадевада̄навакехи ча;

сиддхавиджджа̄дхара̄дӣхи бхӯтехи ча нисевитам̣.

27. маносӣлинданӣлоруча̄рупаббатапантихи;

саджджхухема̄динекехи бхӯдхарехи ча бха̄сурам̣.

28. суван̣н̣аман̣исопа̄нанекатиттхасарехи ча;

собхитам̣ таттха кӣл̣антанекадеван̇гана̄хи ча.

29. сӣтасӣкарасан̃чханнаниджджхара̄нам̣ сатехи ча;

кин̣н̣арорагаран̇гехи раммехи вира̄джитам̣.

30. сикхан̣д̣исан̣д̣аначчехи лата̄нам̣ ман̣д̣апехи ча;

сетава̄лукасан̃чханнама̄лакехи ча ман̣д̣итам̣.

31. суван̣н̣аман̣имутта̄ди анекаратана̄карам̣;

иччханта̄нам̣ джана̄лӣнам̣ пун̃н̃акин̃джаккхама̄’лайам̣.

32. тама’джджхогайха со дхӣро сахассаккхена ма̄пите;

дисва̄ исипариккха̄ре пан̣н̣аса̄лаваре тахим̣.

33. исивесам̣ гахетва̄на вихаранто сама̄хито;

сатта̄ха’ббхантаре пан̃ча абхин̃н̃а’т̣т̣хавидха̄’пи ча.

34. уппа̄детва̄ сама̄паттисукхене’ча таподхано;

набхаса̄ дивасе’касмим̣ гаччханто джанатам̣ иси.

35. |о0.0004|

содхентама’н̃джасам̣ дисва̄ отаритва̄ набха̄ тахим̣;

ити там̣ джанатам̣ пуччхи касма̄ содхетха ан̃джасам̣.

36. сумедха твам̣ наджа̄на̄си дӣпан̇карататха̄гато;

самбодхиму’ттамам̣ патва̄ дхаммачаккама’нуттарам̣.

37. паваттетва̄на локасса каронто дхаммасан̇гахам̣;

раммам̣ раммапурам̣ патва̄ васатӣ’ха судассане.

38. бхиккхусатасахассехи чатӯхи вималехи там̣;

нимантайимха да̄нена майам̣ локекана̄йака.

39. тасса а̄гаманаттха̄йа маггам̣ содхема чаккхума;

ити сотасса со тасса сукхам̣ денто джано’бравим̣.

40. буддхо’ти вачанам̣ сутва̄ пӣтийо’даггама̄насо;

сакабха̄вена сан̣т̣ха̄тум̣ невасаккхи гун̣а̄каро.

41. тена̄’раддхан̃джаса̄ дхӣро йа̄читва̄на падесакам̣;

лабхитва̄ висамам̣ т̣ха̄нам̣ самам̣ ка̄тум̣ сама̄рабхи.

42. на̄’лан̇катейева тахим̣ падесе,

локекана̄тхо санара̄марехи;

сампӯджито локахито махеси,

васӣхи саддхим̣ пат̣ипаджджи маггам̣.

43. чхаббан̣н̣арам̣сиджа̄лехи паджджалантам̣ татха̄гатам̣;

а̄гаччхантам̣ тахи дисва̄ модама̄но вичинтайи.

44. йаннӯни’масса дхӣрасса сетум̣ катва̄на каддаме;

сакатта̄нам̣ нипаджджайе сасан̇гхасса махесино.

45. дӣгхаратта̄ма’лам̣ там̣ ме хита̄йа ча сукха̄йа ча;

ичче’вам̣ чинтайитва̄на нипанно’со джинан̇куро.

46. пабодхетва̄на дисва̄на ча̄рулочанапан̇кадже;

пуна’пе’вам̣ вичинтеси нипанно дхитима̄ тахим̣.

47. |о0.0005|

иччхеййам̣ че’хама’дждже’ва хантва̄’нантаран̣е бхаве;

сан̇гхасса навако хутва̄ пависеййам̣ пурам̣ варам̣.

48. кима’н̃н̃а̄такавесена клесанибба̄пан̣ена ме;

айам̣ буддхо’ва’хам̣ буддхо хутва̄ локе ануттаро.

49. джанатам̣ дхаммана̄ва̄йа та̄ретва̄на бхаван̣н̣ава̄ва;

нибба̄н̣апурама̄’нетва̄ сеййам̣ ме париниббутам̣.

50. ичче’вам̣ чинтайитва̄на нипанно каддаме тахим̣;

суван̣н̣акадаликкхандхасаннибхо со’ти собхати.

51. чхаббан̣н̣арам̣сӣхи вира̄джама̄нам̣,

дисва̄ манун̃н̃ам̣ сугататтабха̄вам̣;

сан̃джа̄тапӣтӣхи удаггачитто,

самбодхийа̄ чхандама’ка̄си дхӣро.

52. а̄гантва̄на тахим̣ т̣ха̄нам̣ исим̣ пан̇ке нипаннакам̣;

локасса сетубхӯто’пи сетубхӯтам̣ тама’ттано.

53. дисва̄ уссӣсаке тасса т̣хатва̄ локекасетуно;

локекалочано дхӣро дӣпан̇карататха̄гато.

54. готамо на̄ма на̄мена самбуддхо’йам̣ ана̄гате;

бхависсатӣти вйа̄ка̄си са̄ваке ча пура̄дике.

55. идам̣ ватва̄на катва̄на сасан̇гхо там̣ падаккхин̣ам̣;

пӯджеси ат̣т̣хамут̣т̣хихи кусумехи гун̣аппийо.

56. ити ка̄тӯна па̄йа̄си сасан̇гхо локана̄йакова;

раммакам̣ на̄ма нагарам̣ рамма̄ра̄ма̄лайа̄лайам̣

57. джинасса вачанам̣ сутва̄ ут̣т̣хахитва̄на пан̇като;

мудито девасан̇гхехи кусума̄дӣхи пӯджито.

58. паллан̇кама̄’бхуджитва̄на нисӣди кусума̄сане;

маха̄тапо маха̄пан̃н̃о сумедхо дамитиндрийо.

59. |о0.0006|

дева̄ дасасахассесу чаккава̄л̣есу модита̄;

абхитвавим̣су там̣ дхӣрам̣ нисиннам̣ кусума̄сане.

60. нисинно упадха̄реси дхамме буддхакаре тада̄;

кимуддхам̣ ва̄ адхо ва̄’пи диса̄су видиса̄су ча.

61. ичче’вам̣ вичинанто со сакалам̣ дхаммадха̄тукам̣;

аддаккхи сакасанта̄не пат̣хамам̣ да̄напа̄рамим̣.

62. еваме’вам̣ гавесанто уттарим̣ па̄рамӣ видӯ;

сабба̄ па̄рамийо дисва̄ аттано н̃а̄н̣ачаккхуна̄.

63. сам̣са̄ре сам̣саранто со бахум̣ дуккхам̣ титиккхийа;

гавесанто’матам̣ санто пӯретва̄ да̄напа̄рамим̣.

64. саттанам̣ каппаруккхо’ва чинта̄ман̣и’ва ка̄мадо;

иччхитиччхитаманна̄дим̣ даданто дадатам̣ варо.

65. та̄рака̄хи бахум̣ катва̄ набхе ча̄рувилочане;

уппа̄т̣етва̄ дадам̣ дхӣро йа̄чака̄нам̣ памодито.

66. махийа̄ пам̣суто ча̄’пи самуддодакато’дхикам̣;

дадам̣ сарӣрамам̣сан̃ча лохитампи ча аттано.

67. молина̄’лан̇кате сӣсе’дхикам̣ катва̄ синеруто;

кампайитва̄ махим̣ денто суте ча̄’пи сакан̇гата̄ва.

68. сӣланеккаммапан̃н̃а̄дӣ пӯретва̄ саббапа̄рамӣ;

вессантараттабха̄ве’ вампатва̄ тамбха̄ чуто пана.

69. уппаджджитва̄ сура̄ва̄се сундаре тусите пуре;

васанто сучирам̣ ка̄лам̣ бхутва̄на̄’тантасампадам̣.

70. катан̃джалӣхи девехи йа̄чито дипадуттамо;