да̄т̣ха̄вам̣со |о0.0001|

намо тасса бхагавато арахато самма̄самбуддхасса

1. виса̄радам̣ ва̄дапатха̄ти ваттинам̣,

тилокападжджотамасайхаса̄хинам̣;

асеса н̃еййа̄варан̣аппаха̄йинам̣,

нама̄ми саттха̄раманантагочарам̣.

2. |о0.0002|

тилока на̄тхаппабхавам̣ бхайа̄пахам̣,

висуддхавиджджа̄чаран̣ехи севитам̣;

папан̃ча сам̣йоджанабандханаччхидам̣,

нама̄ми дхаммам̣ нипун̣ам̣ судуддасам̣.

3. паса̄даматтена’пи йаттха па̄н̣ино,

пхӯсанти дуккхаккхайамаччутам̣ падам̣;

тама̄хун̣еййам̣ сусама̄хитиндрийам̣,

нама̄ми сан̇гхам̣ мунира̄джаса̄вакам̣.

4. вибхусайам̣ ка̄л̣акана̄гаранва йам̣,

параккамо ка̄рун̣ико чамӯпати;

гавесама̄но джинаса̄санасса йо,

вирӯл̣химаттхан̃ча джанасса паттхайам̣.

5. |о0.0003|

судха̄майӯкха̄мала пан̣д̣увам̣саджам̣,

вирӯл̣хасаддхам̣ мунира̄джаса̄сане;

пийам̣ вадам̣ нӣтипатха̄нуваттиним̣,

сада̄ паджа̄нам̣ джаникам̣’ва ма̄тарам̣.

6. пийам̣ параккантибхуджасса ра̄джино,

махеси маччуннатакхуддхисампадам̣;

видха̄йа лӣла̄ватимиччхитаттхадам̣,

асеса лан̇ка̄талараджджалаккхийам̣.

7. кума̄рама̄ра̄дхитаса̄дхумантинам̣,

маха̄дайам̣ пан̣д̣унаринда вам̣саджам̣;

видха̄йа саддхам̣ мадхуриндана̄макам̣,

сусиккхӣтам̣ па̄вачане кала̄су ча.

8. |о0.0004|

нариндасун̃н̃ам̣ сучирам̣ тисӣхал̣ам̣,

итиппатӣтам̣ айасам̣ апа̄нуди;

чирам̣ пан̣ӣтена ча чивара̄дина̄,

сусан̃н̃ате сам̣йамино атаппайи.

9. чират̣т̣хитим̣ па̄вачанасса иччхата̄,

катан̃н̃уна̄ виккама буддиса̄лина̄;

сатӣмата̄ чандима бандхукиттина̄,

сага̄равам̣ тена’бхӣйа̄чито ахам̣.

10. садеса бха̄са̄йа кавӣхи сӣхал̣е,

катампи вам̣сам̣ джинадантадха̄туйа̄;

нируттийа̄ ма̄гадхика̄йа вуддхийа̄,

кароми дӣпантарава̄синам̣ апи.

11. |о0.0005|

джӣно’йамиддхе амаравхайе пуре,

када̄чи хутва̄на сумедхана̄мако;

саведаведан̇гавибха̄гаковидо,

махаддхане виппакуламхи ма̄н̣аво.

12. ахан̃хи джа̄тибйасанена пӣл̣ито,

джара̄бхибхуто маран̣ена оттхат̣о;

сивам̣ падам̣ джа̄тиджара̄диниссат̣ам̣,

гавесайиссам̣’ти рахо вичинтийа.

13. анекасан̇кхам̣ дханадхан̃н̃асампадам̣,

патит̣т̣хапетва̄ капан̣еси дуччаджам̣;

анаппаке пемабхара̄нубандхино,

виха̄йа митте ча сутеча бандхаве.

14. |о0.0006|

паха̄йа ка̄ме никхиле манораме,

гхара̄бхиниккхамма хима̄чалантике;

махӣдхарам̣ дхаммикана̄ма виссутам̣,

упечча на̄на̄тарура̄джибхуситам̣.

15. манонукӯле сурара̄джаниммӣте,

асаммига̄нам̣ агатимхи ассаме;

ниваттачӣро аджинаккхипам̣ вахам̣,

джат̣а̄дхаро та̄паса весамаггахӣ.

16. сусан̃н̃ататтопарива̄ри тиндрийо,

пхала̄пхала̄дӣхи паваттайам̣ танум̣;

гато абхин̃гн̃а̄су ча па̄рамим̣ васӣ,

тахим̣ сама̄патти сукхам̣ авинди со.

17. |о0.0007|

сусаджджите раммапура̄дхива̄сина̄,

маха̄джанена’ттаманена ан̃джасе;

патхаппадесе абхийантаматтано,

анит̣т̣хитейева сумедха та̄пасо.

18. ага̄дхан̃еййодадхӣпа̄радассинам̣,

бхавантагум̣ ниббанатхам̣ вина̄йакам̣;

анекакхӣн̣а̄савалаккхасевитам̣,

када̄ чи дӣпан̇карабуддхамаддаса.

19. тато сасан̇гхасса тилокабхаттуно,

париччаджитва̄на танумпи джӣвитам̣;

паса̄райитва̄на джат̣а̄джина̄дикам̣,

видха̄йа сетум̣ танумева паллале.

20. |о0.0008|

анаккамитва̄ калалам̣ маха̄дайе,

сабхиккхуко гаччату пит̣т̣хийа̄ ити;

адхит̣т̣хахитва̄на нипаннако тахим̣,

ана̄тха метам̣ тибхавам̣ самеккхийа.

21. дайа̄йа сан̃чодитама̄насо джане,

бхаван̣н̣ава̄ уддхаритум̣ дукхаддите;

ака̄си самбодхипадасса паттийа̄,

маха̄бхинӣха̄рамудаггавиккамо.

22. |о0.0009|

атхо видитва̄ васино тама̄сайам̣,

ада̄си со вйа̄каран̣ам̣ маха̄муни;

тато пурам̣ тамхи татха̄гате гате,

сайам̣васӣ саммаси па̄рамигун̣е.

23. тато ча каппа̄намалӣнавиккамо,

асам̣кхийе со чатуро салаккхаке;

тахим̣ тахим̣ джа̄тису бодхипа̄чане,

висуддхасамбха̄рагун̣е апӯрайи;

атха̄бхиджа̄то тусите маха̄йасо,

висуддхасамбодхипадопаладдхийа̄;

удиккхама̄но самайам̣ дайа̄дхано,

чирам̣ вибхутим̣ анубхоси саббасо.

25. |о0.0010|

сахассасан̇кха̄ дасачаккава̄лато,

сама̄гата̄некасура̄дхипа̄дихи;

удаггудаггехи джинаттапаттийа̄,

сага̄равам̣ со абхигамма йа̄чито.

26. тато чавитва̄ капил̣авхайе пуре,

сада̄ сато сакйакулекакетуно;

ахоси суддходанабхумибхаттуно,

маха̄дима̄йа̄йа махесийа̄ суто.

27. |о0.0011|

виджа̄таматто’ва васундхара̄йа со,

патит̣т̣хахитва̄на диса̄ вилокайӣ;

тада̄ ахесум̣ виват̣ан̇гана̄ диса̄,

апӯджайум̣ таттха ча девама̄нуса̄.

28. а̄дха̄райум̣ а̄тапава̄ран̣а̄дикам̣,

адиссама̄на̄ва набхамбхи девата̄;

пада̄ни со сатта ча уттара̄мукхо,

упечча ниччха̄райи ва̄чама̄сабхим̣.

29. йатхаттхасиддхаттакума̄рана̄мако,

махаббало йоббанаха̄ривиггахо;

утуттайа̄нуччхавикесу тӣсу со,

нубхоси па̄са̄даваресу сампадам̣.

30. |о0.0012|

када̄чи уййа̄напатхе джара̄хатам̣,

татха̄турам̣ ка̄лакатан̃ча сам̣йамим̣;

камена дисва̄на вираттама̄насо,

бхавесу со паббаджитум̣ ака̄майи.

31. сапуппхадӣпа̄дӣкарехи раттийам̣,

пураккхато со тидива̄дхива̄сихи;

сачханнако кантакава̄джийа̄нато,

тато маха̄ка̄рун̣ико’бхиниккхами.

32. камена патва̄на аномама̄пагам̣,

судхотамутта̄пхалаха̄рисекате;

патит̣т̣хахитва̄ варамол̣ибандханам̣,

сита̄силӯнам̣ гагане самуккхипӣ.

33. |о0.0013|

пат̣иггахетва̄ тидаса̄намиссаро,

суван̣начан̇гот̣аварена там̣ тада̄;

тийоджанам̣ нӣламан̣ӣхи четийам̣,

ака̄си чӯл̣а̄ман̣иматтано пуре.

34. тато гхат̣ӣка̄расароджайонина̄,

сама̄хат̣ам̣ дха̄райӣ чӣвара̄дикам̣;

атхо сакам̣ ваттхайугам̣ набхаттхале,

пасаттхавесаггахан̣о самуккхипӣ.