1. пит̣акаттайапариччхедо

намассетва̄на самбуддхам̣, аггавам̣саварам̣варам̣;

натва̄на дхаммам̣ буддхаджам̣, сан̇гхан̃ча̄пиниран̇ган̣ам̣.

гантхавам̣сампи нисса̄йа, гантхавам̣сам̣ пакатхиссам̣;

типет̣акасама̄ха̄рам̣, са̄дхунам̣ джан̇гхада̄сакам̣.

виматиноданама̄рамбхам̣, там̣ ме сун̣а̄тха са̄дхаво;

саббампи буддхавачанам̣, вимутти ча сахетукам̣.

хоти екавидхам̣йева, тивидхам̣ пит̣акена ча;

тан̃ча саббампи кевалам̣, пан̃чавидхам̣ ника̄йато.

ан̇гато ча нававидхам̣, дхаммаккхандхаган̣анато;

чатура̄сӣти сахасса, дхаммаккхандхапабхедананти.

катхам̣ пит̣акато пит̣акан̃хи тивидхам̣ хоти?

винайапит̣акам̣, абхидхаммапит̣акам̣ суттантапит̣аканти. таттха катамам̣ винайа пит̣акам̣? па̄ра̄джикакан̣д̣ам̣, па̄читтийакан̣д̣ам̣, маха̄ваггакан̣д̣ам̣, чуллаваггакан̣д̣ам̣, парива̄ракан̣д̣анти. има̄ни кан̣д̣а̄ни винайапит̣акам̣ на̄ма.

катамам̣ абхидхаммапит̣акам̣? дхаммасан̇ган̣ӣ-пакаран̣ам̣, вибхан̇га-пакаран̣ам̣, дха̄тукатха̄-пакаран̣ам̣, пуггалапан̃н̃атти-пакаран̣ам̣, катха̄ваттху-пакаран̣ам̣, йамака-пакаран̣ам̣, пат̣т̣ха̄на-пакаран̣анти. има̄ни сатта пакаран̣а̄ни абхидхаммапит̣акам̣ на̄ма. катамам̣ суттантапит̣акам̣? сӣлаккхандхавагга̄дикам̣, авасесам̣ буддхавачанам̣ суттантапит̣акам̣ на̄ма.

катхам̣ ника̄йато? ника̄йа̄ пан̃ча видха̄ хонти. дӣгханика̄йо, маджджхиманика̄йо, сам̣йуттаника̄йо, ан̇гуттараника̄йо, кхуддаканика̄йоти.

таттха катамо дӣгха-ника̄йо? сӣлаккхандхавагго, маха̄вагго, па̄тхикавагготи, име тайо вагга̄ дӣгханика̄йо на̄ма. имесу тӣсу ваггесу, чатутим̣са вагга̄ни ча хонти. [чатутим̣сева суттанта̄, сӣлаккхандхавагга̄дика̄, йасса бхаванти со йева дӣгханика̄йа на̄ма хоти.]

катамо маджджхиманика̄йо? мӯлапан̣н̣а̄со, маджджхимапан̣н̣а̄со, упарипан̣н̣а̄соти, име тайо пан̣н̣а̄са̄ маджджхиманика̄йо на̄ма. имесу тӣсу пан̣н̣а̄сесу двепан̃н̃а̄са̄дхика-сутта-сата̄ни хонти [дийад̣д̣хасатасуттанта̄, дви суттам̣ йасса сантисо, маджджхиманика̄йо на̄мо мӯлапан̣н̣а̄сама̄ди хоти.]

катамо сам̣йуттаника̄йо? сага̄тха̄вагго, нида̄навагго, кхандхакавагго, сал̣а̄йатанавагго, маха̄вагготи, име пан̃ча вагга̄ сам̣йуттаника̄йо на̄ма. имесу пан̃часу ваггесу два̄сат̣т̣хисуттасаттасата̄дхикасатта-суттасахасса̄ни хонти. [два̄сат̣т̣хи-сатта-сата̄ни, саттасахассака̄ни ча.] сутта̄ни йасса хонти со, сага̄тха̄дикаваггако, сам̣йуттаника̄йо на̄мо ведитаббо ча вин̃н̃ӯна̄ти.

катамо ан̇гуттараника̄йо? екканипа̄то, дукканипа̄то, тикканипа̄то, чатукканипа̄то, пан̃чаканипа̄то, чхакканипа̄то, саттаканипа̄то, ат̣т̣хаканипа̄то, наваканипа̄то, дасаканипа̄то, ека̄дасанипа̄тоти, име ека̄даса нипа̄та̄ ан̇гуттараника̄йо на̄ма. имесу ека̄даса нипа̄тесу сатта-пан̃н̃а̄са-пан̃ча-сата̄дхиканава-сутта-сахасса̄ни хонти. [навасуттасахасса̄ни, пан̃часатаматта̄ни ча, саттапан̃н̃а̄са̄дхика̄ни, сутта̄ни йасса хонти со, ан̇гуттараника̄йоти, екканипа̄така̄дикоти.]

катамо кхуддаканика̄йо? кхуддакапа̄т̣хо, дхаммападам̣, уда̄нам̣, итивуттакам̣, суттанипа̄то, вима̄наваттху, петаваттху, тхеракатха̄, тхерӣкатха̄, джа̄такам̣, маха̄ниддесо, пат̣исамбхида̄магго, апада̄нам̣, буддхавам̣со, чарийа̄пит̣акам̣, винайапит̣акам̣, абхидхаммапит̣аканти. имесу саттарасасу гантхесу анека̄ни сутта-сахасса̄ни хонти. [анека̄ни сутта-сахасса̄ни, ниддит̣т̣ха̄ни махесина̄, ника̄йе пан̃чаме име, кхуддаке ити висутети.]

катхам̣ ан̇гато ан̇гахи нава видхам̣ хоти? суттам̣, геййам̣, веййа̄каран̣ам̣, га̄тха̄, уда̄нам̣, итивуттакам̣, джа̄такам̣, аббхутадхаммам̣, ведалланти, наваппабхедам̣ хоти. таттха убхато вибхан̇ганиддесакхандхакапарива̄ра̄, суттанипа̄те, ман̇галасутта, ратанасутта, туват̣т̣акасутта̄ни. ан̃н̃ампи суттана̄макам̣ татха̄гатавачанам̣, суттанти ведитаббам̣. саббам̣ сага̄тхакам̣ геййанти ведитаббам̣. висесанасам̣йуттаке сакалопи сага̄тхакавагго, сакалам̣ абхидхаммапит̣акам̣ нига̄тхакан̃ча суттайан̃ча ан̃н̃ампи ат̣т̣хахи ан̇гехи асан̇гахитам̣ буддхавачанам̣ там̣ веййа̄каран̣анти ведитаббам̣. дхаммападам̣, тхеракатха̄, тхерӣкатха̄, суттанипа̄те, но суттана̄мика̄ суддхикага̄тха̄, га̄тха̄ти ведитабба̄. соманасса н̃а̄н̣амайикага̄тха̄ пат̣ика-сам̣йутта̄ две асӣтисуттанта̄ уда̄нанти ведитабба̄. вуттан̃хетам̣ бхагавата̄тиа̄динайаппаватта̄ дасуттарасатасуттанта̄, итивуттаканти ведитабба̄. апан̣н̣акаджа̄така̄дӣни пан̃н̃а̄са̄дика̄ни. пан̃чаджа̄такасата̄ни, джа̄таканти ведитаббам̣. чатта̄ро ме бхиккхаве аччхарийа̄ абхӯтадхамма̄, а̄нандетиа̄динайаппаватта̄ саббепи аччхарийа абхӯтадхаммапат̣исам̣йутта̄ суттанта̄ абхӯтадхамманти ведитабба̄. чуллаведалла, маха̄ведалла, самма̄дит̣т̣хи, саккапан̃ха, сан̇кха̄рабха̄джанийа, маха̄пун̣н̣амасуттанта̄дайо саббепи ведан̃ча тут̣т̣хин̃ча ладдха̄ [пуччха] ладдха̄ пуччхитасуттанта̄, ведалланти ведитабба̄. катама̄ни чатура̄сӣти дхаммаккхандхасахасса̄ни дуджа̄на̄ни, чатура̄сӣти дхаммаккхандхасахасса̄ни саче виттха̄рена катхиссам̣ атипапан̃чо бхависсати. тасма̄ найа васена катхисса̄ми. екам̣ ваттху, еко дхаммаккхандхо, екам̣ нида̄нам̣ еко дхаммаккхандхо, екам̣ пан̃ха̄ пуччхантам̣ еко дхаммаккхандхо, екам̣ пан̃ха̄ висаджджанам̣ еко дхаммаккхандхо, чатура̄сӣти дхаммаккхандхасахасса̄ни кена бха̄сита̄ни, каттха бха̄сита̄ни, када̄ бха̄сита̄ни, кама̄раббха бха̄сита̄ни, киматтхам̣ бха̄сита̄ни, кена дха̄рита̄ни, кена̄бхата̄ни, киматтхам̣ парийа̄пун̣итабба̄ни. татра̄йам̣ висаджджана̄, кена бха̄сита̄нӣти? буддха̄ну буддхехи бха̄сита̄ни. каттха бха̄сита̄нӣти? девесу ча ма̄нуссесу ча, бха̄сита̄ни. када̄ бха̄сита̄нӣти? бхагавато дхарама̄нака̄ле чева паччхимака̄ле ча бха̄сита̄ни. катама̄раббха бха̄сита̄нӣти? пан̃чаваггийа̄дике венеййа бандхаве а̄раббха бха̄сита̄нӣти. киматтхам̣ бха̄сита̄нӣти? тиваджджан̃ча аваджджан̃ча н̃атва̄ ваджджам̣ паха̄йа авадждже пат̣ипаттитва̄ нибба̄напарийанте. дит̣т̣ха-дхаммикасампара̄йикаттхе сампа̄пун̣итум̣.

кена дха̄рита̄нӣти? анубуддхехи чева сисса̄нусиссехи ча дха̄рита̄ни. кена̄ бхата̄нӣти? а̄чарийа парам̣парехи а̄бхата̄ни. киматтхам̣ парийа̄пун̣итабба̄нӣти? ваджджан̃ча аваджджан̃ча н̃атва̄ ваджджам̣ паха̄йа авадждже пат̣ипаттитва̄ нибба̄напарийанте дит̣т̣хадхаммикасампара̄йикаттхе, сам̣па̄пун̣итум̣, йадевам̣ та̄йа нибба̄напарийанте дит̣т̣хадхаммикасампара̄йикаттхе са̄дхика̄ни хонти. тева таттха кехи аппаматтена парийа̄пун̣итабба̄ни дха̄ретабба̄ни дха̄ретабба̄ни ва̄четабба̄ни саджджха̄йам̣ ка̄табба̄нӣти [ити чуллагантхавам̣се пит̣акаттайа дӣпако на̄ма пат̣хамо париччхедо.]