9. пат̣иса̄ран̣ӣйасуттам̣

89. [чӯл̣ава. 39 тхокам̣ висадисам̣] ‘‘ат̣т̣хахи, бхиккхаве, дхаммехи саманна̄гатасса бхиккхуно а̄кан̇кхама̄но сан̇гхо пат̣иса̄ран̣ӣйакаммам̣ кареййа. катамехи ат̣т̣хахи? гихӣнам̣ ала̄бха̄йа парисаккати, гихӣнам̣ анаттха̄йа парисаккати, гихӣ аккосати парибха̄сати, гихӣ гихӣхи бхедети, буддхасса аван̣н̣ам̣ бха̄сати, дхаммасса аван̣н̣ам̣ бха̄сати, сан̇гхасса аван̣н̣ам̣ бха̄сати, дхаммикан̃ча гихипат̣иссавам̣ на сачча̄пети. имехи кхо, бхиккхаве, ат̣т̣хахи дхаммехи саманна̄гатасса бхиккхуно а̄кан̇кхама̄но сан̇гхо пат̣иса̄ран̣ӣйам̣ каммам̣ кареййа.

‘‘ат̣т̣хахи, бхиккхаве, дхаммехи саманна̄гатасса бхиккхуно а̄кан̇кхама̄но сан̇гхо пат̣иса̄ран̣ӣйакаммам̣ пат̣иппассамбхеййа. катамехи ат̣т̣хахи? на гихӣнам̣ ала̄бха̄йа парисаккати, на гихӣнам̣ анаттха̄йа парисаккати, на гихӣ аккосати парибха̄сати, на гихӣ гихӣхи бхедети, буддхасса ван̣н̣ам̣ бха̄сати, дхаммасса ван̣н̣ам̣ бха̄сати, сан̇гхасса ван̣н̣ам̣ бха̄сати, дхаммикан̃ча гихипат̣иссавам̣ сачча̄пети. имехи кхо, бхиккхаве, ат̣т̣хахи дхаммехи саманна̄гатасса бхиккхуно а̄кан̇кхама̄но сан̇гхо пат̣иса̄ран̣ӣйакаммам̣ пат̣иппассамбхеййа̄’’ти. навамам̣.