7. паттаникуджджанасуттам̣

87. [чӯл̣ава. 265] ‘‘ат̣т̣хахи, бхиккхаве, ан̇гехи саманна̄гатасса упа̄сакасса а̄кан̇кхама̄но сан̇гхо паттам̣ никкуджджеййа [никуджджеййа (ка.)]. катамехи ат̣т̣хахи? бхиккхӯнам̣ ала̄бха̄йа парисаккати, бхиккхӯнам̣ анаттха̄йа парисаккати, бхиккхӯнам̣ ава̄са̄йа [ана̄ва̄са̄йа (сӣ. сйа̄.)] парисаккати, бхиккхӯ аккосати парибха̄сати, бхиккхӯ бхиккхӯхи бхедети [вибхедети (бахӯсу)], буддхасса аван̣н̣ам̣ бха̄сати, дхаммасса аван̣н̣ам̣ бха̄сати, сан̇гхасса аван̣н̣ам̣ бха̄сати. имехи кхо, бхиккхаве, ат̣т̣хахан̇гехи саманна̄гатасса упа̄сакасса а̄кан̇кхама̄но сан̇гхо паттам̣ никкуджджеййа.

‘‘ат̣т̣хахи, бхиккхаве, ан̇гехи саманна̄гатасса упа̄сакасса а̄кан̇кхама̄но сан̇гхо паттам̣ уккуджджеййа. катамехи ат̣т̣хахи? на бхиккхӯнам̣ ала̄бха̄йа парисаккати, на бхиккхӯнам̣ анаттха̄йа парисаккати, на бхиккхӯнам̣ ава̄са̄йа парисаккати, на бхиккхӯ аккосати парибха̄сати, на бхиккхӯ бхиккхӯхи бхедети, буддхасса ван̣н̣ам̣ бха̄сати, дхаммасса ван̣н̣ам̣ бха̄сати, сан̇гхасса ван̣н̣ам̣ бха̄сати. имехи кхо, бхиккхаве, ат̣т̣хахан̇гехи саманна̄гатасса упа̄сакасса а̄кан̇кхама̄но сан̇гхо паттам̣ уккуджджеййа̄’’ти. саттамам̣.