1. сатисампаджан̃н̃асуттам̣

81. ‘‘сатисампаджан̃н̃е, бхиккхаве, асати сатисампаджан̃н̃авипаннасса хатӯпанисам̣ хоти хироттаппам̣. хироттаппе асати хироттаппавипаннасса хатӯпанисо хоти индрийасам̣варо. индрийасам̣варе асати индрийасам̣варавипаннасса хатӯпанисам̣ хоти сӣлам̣. сӣле асати сӣлавипаннасса хатӯпанисо хоти самма̄сама̄дхи. самма̄сама̄дхимхи асати самма̄сама̄дхивипаннасса хатӯпанисам̣ хоти йатха̄бхӯтан̃а̄н̣адассанам̣. йатха̄бхӯтан̃а̄н̣адассане асати йатха̄бхӯтан̃а̄н̣адассанавипаннасса хатӯпанисо хоти ниббида̄вира̄го. ниббида̄вира̄ге асати ниббида̄вира̄гавипаннасса хатӯпанисам̣ хоти вимуттин̃а̄н̣адассанам̣. сеййатха̄пи, бхиккхаве, руккхо са̄кха̄пала̄савипанно. тасса папат̣ика̄пи на па̄рипӯрим̣ гаччхати, тачопи… пхеггупи… са̄ропи на па̄рипӯрим̣ гаччхати. евамевам̣ кхо, бхиккхаве, сатисампаджан̃н̃е асати сатисампаджан̃н̃авипаннасса хатӯпанисам̣ хоти хироттаппам̣; хироттаппе асати хироттаппавипаннасса хатӯпанисо хоти…пе… вимуттин̃а̄н̣адассанам̣.

‘‘сатисампаджан̃н̃е, бхиккхаве, сати сатисампаджан̃н̃асампаннасса упанисасампаннам̣ хоти хироттаппам̣. хироттаппе сати хироттаппасампаннасса упанисасампанно хоти индрийасам̣варо. индрийасам̣варе сати индрийасам̣варасампаннасса упанисасампаннам̣ хоти сӣлам̣. сӣле сати сӣласампаннасса упанисасампанно хоти самма̄сама̄дхи. самма̄сама̄дхимхи сати самма̄сама̄дхисампаннасса упанисасампаннам̣ хоти йатха̄бхӯтан̃а̄н̣адассанам̣. йатха̄бхӯтан̃а̄н̣адассане сати йатха̄бхӯтан̃а̄н̣адассанасампаннасса упанисасампанно хоти ниббида̄вира̄го. ниббида̄вира̄ге сати ниббида̄вира̄гасампаннасса упанисасампаннам̣ хоти вимуттин̃а̄н̣адассанам̣. сеййатха̄пи, бхиккхаве, руккхо са̄кха̄пала̄сасампанно. тасса папат̣ика̄пи па̄рипӯрим̣ гаччхати, тачопи… пхеггупи… са̄ропи па̄рипӯрим̣ гаччхати. евамевам̣ кхо, бхиккхаве, сатисампаджан̃н̃е сати сатисампаджан̃н̃асампаннасса упанисасампаннам̣ хоти хироттаппам̣; хироттаппе сати хироттаппасампаннасса упанисасампанно хоти…пе… вимуттин̃а̄н̣адассана’’нти. пат̣хамам̣.