3. пат̣хамамаран̣ассатисуттам̣

73. екам̣ самайам̣ бхагава̄ на̄тике [на̄дике (сӣ. сйа̄.), на̄т̣ике (пӣ.) а. ни. 6.19] вихарати гин̃джака̄васатхе. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча – ‘‘маран̣ассати, бхиккхаве, бха̄вита̄ бахулӣката̄ махаппхала̄ хоти маха̄нисам̣са̄ аматогадха̄ аматапарийоса̄на̄. бха̄ветха но тумхе, бхиккхаве, маран̣ассати’’нти.

евам̣ вутте ан̃н̃атаро бхиккху бхагавантам̣ етадавоча – ‘‘ахам̣ кхо, бханте, бха̄веми маран̣ассати’’нти. ‘‘йатха̄ катхам̣ пана твам̣, бхиккху, бха̄веси маран̣ассати’’нти? ‘‘идха майхам̣, бханте, евам̣ хоти – ‘ахо вата̄хам̣ раттиндивам̣ джӣвеййам̣, бхагавато са̄санам̣ манаси кареййам̣, баху [бахум̣ (сӣ. пӣ.)] вата ме катам̣ асса̄’ти. евам̣ кхо ахам̣, бханте, бха̄веми маран̣ассати’’нти.

ан̃н̃атаропи кхо бхиккху бхагавантам̣ етадавоча – ‘‘ахампи кхо, бханте, бха̄веми маран̣ассати’’нти. ‘‘йатха̄ катхам̣ пана твам̣, бхиккху, бха̄веси маран̣ассати’’нти? ‘‘идха майхам̣, бханте, евам̣ хоти – ‘ахо вата̄хам̣ дивасам̣ джӣвеййам̣, бхагавато са̄санам̣ манаси кареййам̣, баху вата ме катам̣ асса̄’ти. евам̣ кхо ахам̣, бханте, бха̄веми маран̣ассати’’нти.

ан̃н̃атаропи кхо бхиккху бхагавантам̣ етадавоча – ‘‘ахампи кхо, бханте, бха̄веми маран̣ассати’’нти. ‘‘йатха̄ катхам̣ пана твам̣, бхиккху, бха̄веси маран̣ассати’’нти? ‘‘идха майхам̣, бханте, евам̣ хоти – ‘ахо вата̄хам̣ упад̣д̣хадивасам̣ джӣвеййам̣, бхагавато са̄санам̣ манаси кареййам̣, баху вата ме катам̣ асса̄’ти. евам̣ кхо ахам̣, бханте, бха̄веми маран̣ассати’’нти.

ан̃н̃атаропи кхо бхиккху бхагавантам̣ етадавоча – ‘‘ахампи кхо, бханте, бха̄веми маран̣ассати’’нти. ‘‘йатха̄ катхам̣ пана твам̣, бхиккху, бха̄веси маран̣ассати’’нти? ‘‘идха майхам̣, бханте, евам̣ хоти – ‘ахо вата̄хам̣ тадантарам̣ джӣвеййам̣ йадантарам̣ екапин̣д̣апа̄там̣ бхун̃джа̄ми, бхагавато са̄санам̣ манаси кареййам̣, баху вата ме катам̣ асса̄’ти. евам̣ кхо ахам̣, бханте, бха̄веми маран̣ассати’’нти.

ан̃н̃атаропи кхо бхиккху бхагавантам̣ етадавоча – ‘‘ахампи кхо, бханте, бха̄веми маран̣ассати’’нти. ‘‘йатха̄ катхам̣ пана твам̣, бхиккху, бха̄веси маран̣ассати’’нти? ‘‘идха майхам̣, бханте, евам̣ хоти – ‘ахо вата̄хам̣ тадантарам̣ джӣвеййам̣ йадантарам̣ упад̣д̣хапин̣д̣апа̄там̣ бхун̃джа̄ми, бхагавато са̄санам̣ манаси кареййам̣, баху вата ме катам̣ асса̄’ти. евам̣ кхо ахам̣, бханте, бха̄веми маран̣ассати’’нти.

ан̃н̃атаропи кхо бхиккху бхагавантам̣ етадавоча – ‘‘ахампи кхо, бханте, бха̄веми маран̣ассати’’нти. ‘‘йатха̄ катхам̣ пана твам̣, бхиккху, бха̄веси маран̣ассати’’нти? ‘‘идха майхам̣, бханте, евам̣ хоти – ‘ахо вата̄хам̣ тадантарам̣ джӣвеййам̣ йадантарам̣ чатта̄ро пан̃ча а̄лопе сан̇кха̄дитва̄ [сан̇кхаритва̄ (ка.)] аджджхохара̄ми, бхагавато са̄санам̣ манаси кареййам̣, баху вата ме катам̣ асса̄’ти. евам̣ кхо ахам̣, бханте, бха̄веми маран̣ассати’’нти.

ан̃н̃атаропи кхо бхиккху бхагавантам̣ етадавоча – ‘‘ахампи кхо, бханте, бха̄веми маран̣ассати’’нти. ‘‘йатха̄ катхам̣ пана твам̣, бхиккху, бха̄веси маран̣ассати’’нти? ‘‘идха майхам̣, бханте, евам̣ хоти – ‘ахо вата̄хам̣ тадантарам̣ джӣвеййам̣ йадантарам̣ екам̣ а̄лопам̣ сан̇кха̄дитва̄ [сан̇кхаритва̄ (ка.)] аджджхохара̄ми, бхагавато са̄санам̣ манаси кареййам̣, баху вата ме катам̣ асса̄’ти. евам̣ кхо ахам̣, бханте, бха̄веми маран̣ассати’’нти.

ан̃н̃атаропи кхо бхиккху бхагавантам̣ етадавоча – ‘‘ахампи кхо, бханте, бха̄веми маран̣ассати’’нти. ‘‘йатха̄ катхам̣ пана твам̣, бхиккху, бха̄веси маран̣ассати’’нти? ‘‘идха майхам̣ бханте, евам̣ хоти – ‘ахо вата̄хам̣ тадантарам̣ джӣвеййам̣ йадантарам̣ ассаситва̄ ва̄ пассаса̄ми, пассаситва̄ ва̄ ассаса̄ми, бхагавато са̄санам̣ манаси кареййам̣, баху вата ме катам̣ асса̄’ти. евам̣ кхо ахам̣, бханте бха̄веми маран̣ассати’’нти.

евам̣ вутте бхагава̄ те бхиккхӯ етадавоча – ‘‘йва̄йам̣ [йо ча̄йам̣ (ка. сӣ.)], бхиккхаве, бхиккху евам̣ маран̣ассатим̣ бха̄вети – ‘ахо вата̄хам̣ раттиндивам̣ джӣвеййам̣, бхагавато са̄санам̣ манаси кареййам̣, баху вата ме катам̣ асса̄’ти. йо ча̄йам̣ [йо па̄йам̣ (ка.) а. ни. 6.19 пасситаббам̣], бхиккхаве, бхиккху евам̣ маран̣ассатим̣ бха̄вети – ‘ахо вата̄хам̣ дивасам̣ джӣвеййам̣, бхагавато са̄санам̣ манаси кареййам̣, баху вата ме катам̣ асса̄’ти; йо ча̄йам̣ [йо па̄йам̣ (ка.) а. ни. 6.19 пасситаббам̣], бхиккхаве, бхиккху евам̣ маран̣ассатим̣ бха̄вети – ‘ахо вата̄хам̣ упад̣д̣хадивасам̣ джӣвеййам̣, бхагавато са̄санам̣ манаси кареййам̣, баху вата ме катам̣ асса̄’ти. йо ча̄йам̣ [йо па̄йам̣ (ка.) а. ни. 6.19 пасситаббам̣], бхиккхаве, бхиккху евам̣ маран̣ассатим̣ бха̄вети – ‘ахо вата̄хам̣ тадантарам̣ джӣвеййам̣ йадантарам̣ екапин̣д̣апа̄там̣ бхун̃джа̄ми, бхагавато са̄санам̣ манаси кареййам̣, баху вата ме катам̣ асса̄’ти; йо ча̄йам̣ [йо па̄йам̣ (ка.) а. ни. 6.19 пасситаббам̣], бхиккхаве, бхиккху евам̣ маран̣ассатим̣ бха̄вети – ‘ахо вата̄хам̣ тадантарам̣ джӣвеййам̣ йадантарам̣ упад̣д̣хапин̣д̣апа̄там̣ бхун̃джа̄ми, бхагавато са̄санам̣ манаси кареййам̣, баху вата ме катам̣ асса̄’ти. йо ча̄йам̣ [йо па̄йам̣ (ка.) а. ни. 6.19 пасситаббам̣], бхиккхаве, бхиккху евам̣ маран̣ассатим̣ бха̄вети – ‘ахо вата̄хам̣ тадантарам̣ джӣвеййам̣ йадантарам̣ чатта̄ро пан̃ча а̄лопе сан̇кха̄дитва̄ аджджхохара̄ми, бхагавато са̄санам̣ манаси кареййам̣, баху вата ме катам̣ асса̄’ти – име вуччанти, бхиккхаве, ‘бхиккхӯ паматта̄ вихаранти, дандхам̣ маран̣ассатим̣ бха̄венти а̄сава̄нам̣ кхайа̄йа’’’.

‘‘йо ча кхва̄йам̣ [йо ча̄йам̣ (сйа̄.), йо ча кхо йам̣ (ка.)], бхиккхаве, бхиккху евам̣ маран̣ассатим̣ бха̄вети – ‘ахо вата̄хам̣ тадантарам̣ джӣвеййам̣ йадантарам̣ екам̣ а̄лопам̣ сан̇кха̄дитва̄ аджджхохара̄ми, бхагавато са̄санам̣ манаси кареййам̣, баху вата ме катам̣ асса̄’ти. йо ча̄йам̣ [йо па̄йам̣ (ка.)], бхиккхаве, бхиккху евам̣ маран̣ассатим̣ бха̄вети – ‘ахо вата̄хам̣ тадантарам̣ джӣвеййам̣ йадантарам̣ ассаситва̄ ва̄ пассаса̄ми, пассаситва̄ ва̄ ассаса̄ми, бхагавато са̄санам̣ манаси кареййам̣, баху вата ме катам̣ асса̄’ти – име вуччанти, бхиккхаве, ‘бхиккхӯ аппаматта̄ вихаранти, тиккхам̣ маран̣ассатим̣ бха̄венти а̄сава̄нам̣ кхайа̄йа’’’.

‘‘тасма̄тиха, бхиккхаве, евам̣ сиккхитаббам̣ – ‘аппаматта̄ вихарисса̄ма, тиккхам̣ маран̣ассатим̣ бха̄вайисса̄ма а̄сава̄нам̣ кхайа̄йа̄’ти. еван̃хи во, бхиккхаве, сиккхитабба’’нти. татийам̣.