10. кусӣта̄рамбхаваттхусуттам̣

80. [ди. ни. 3.334, 358] ‘‘ат̣т̣хима̄ни, бхиккхаве, кусӣтаваттхӯни. катама̄ни ат̣т̣ха? идха, бхиккхаве, бхиккхуна̄ каммам̣ каттаббам̣ хоти. тасса евам̣ хоти – ‘каммам̣ кхо ме каттаббам̣ бхависсати. каммам̣ кхо пана ме каронтасса ка̄йо киламиссати. ханда̄хам̣ нипаджджа̄мӣ’ти. со нипаджджати, на вӣрийам̣ а̄рабхати аппаттасса паттийа̄ анадхигатасса адхигама̄йа асаччхикатасса саччхикирийа̄йа. идам̣, бхиккхаве, пат̣хамам̣ кусӣтаваттху.

‘‘пуна чапарам̣, бхиккхаве, бхиккхуна̄ каммам̣ катам̣ хоти. тасса евам̣ хоти – ‘ахам̣ кхо каммам̣ ака̄сим̣. каммам̣ кхо пана ме каронтасса ка̄йо киланто. ханда̄хам̣ нипаджджа̄мӣ’ти. со нипаджджати, на вӣрийам̣ а̄рабхати аппаттасса паттийа̄ анадхигатасса адхигама̄йа асаччхикатасса саччхикирийа̄йа. идам̣, бхиккхаве, дутийам̣ кусӣтаваттху.

‘‘пуна чапарам̣, бхиккхаве, бхиккхуна̄ магго гантаббо хоти. тасса евам̣ хоти – ‘магго ме гантаббо бхависсати. маггам̣ кхо пана ме гаччхантасса ка̄йо киламиссати. ханда̄хам̣ нипаджджа̄мӣ’ти. со нипаджджати, на вӣрийам̣ а̄рабхати аппаттасса паттийа̄ анадхигатасса адхигама̄йа асаччхикатасса саччхикирийа̄йа. идам̣, бхиккхаве, татийам̣ кусӣтаваттху.

‘‘пуна чапарам̣, бхиккхаве, бхиккхуна̄ магго гато хоти. тасса евам̣ хоти – ‘ахам̣ кхо маггам̣ агама̄сим̣. маггам̣ кхо пана ме гаччхантасса ка̄йо киланто. ханда̄хам̣ нипаджджа̄мӣ’ти. со нипаджджати, на вӣрийам̣ а̄рабхати аппаттасса паттийа̄ анадхигатасса адхигама̄йа асаччхикатасса саччхикирийа̄йа. идам̣ бхиккхаве, чатуттхам̣ кусӣтаваттху.

‘‘пуна чапарам̣, бхиккхаве, бхиккху га̄мам̣ ва̄ нигамам̣ ва̄ пин̣д̣а̄йа чаранто на лабхати лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса евам̣ хоти – ‘ахам̣ кхо га̄мам̣ ва̄ нигамам̣ ва̄ пин̣д̣а̄йа чаранто на̄латтхам̣ лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса ме ка̄йо киланто акамман̃н̃о. ханда̄хам̣ нипаджджа̄мӣ’ти. со нипаджджати, на вӣрийам̣ а̄рабхати…пе… идам̣, бхиккхаве, пан̃чамам̣ кусӣтаваттху.

‘‘пуна чапарам̣, бхиккхаве, бхиккху га̄мам̣ ва̄ нигамам̣ ва̄ пин̣д̣а̄йа чаранто лабхати лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса евам̣ хоти – ‘ахам̣ кхо га̄мам̣ ва̄ нигамам̣ ва̄ пин̣д̣а̄йа чаранто алаттхам̣ лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса ме ка̄йо гаруко акамман̃н̃о ма̄са̄читам̣ ман̃н̃е. ханда̄хам̣ нипаджджа̄мӣ’ти. со нипаджджати, на вӣрийам̣ а̄рабхати…пе… идам̣, бхиккхаве, чхат̣т̣хам̣ кусӣтаваттху.

‘‘пуна чапарам̣, бхиккхаве, бхиккхуно уппанно хоти аппаматтако а̄ба̄дхо. тасса евам̣ хоти – ‘уппанно кхо ме айам̣ аппаматтако а̄ба̄дхо аттхи каппо нипаджджитум̣. ханда̄хам̣ нипаджджа̄мӣ’ти. со нипаджджати, на вӣрийам̣ а̄рабхати…пе… идам̣, бхиккхаве, саттамам̣ кусӣтаваттху.

‘‘пуна чапарам̣, бхиккхаве, бхиккху гила̄на̄ вут̣т̣хито [а. ни. 6.16 суттаван̣н̣ана̄ т̣ӣка̄ олокетабба̄] хоти ачиравут̣т̣хито гелан̃н̃а̄. тасса евам̣ хоти – ‘ахам̣ кхо гила̄на̄ вут̣т̣хито ачиравут̣т̣хито гелан̃н̃а̄. тасса ме ка̄йо дуббало акамман̃н̃о. ханда̄хам̣ нипаджджа̄мӣ’ти. со нипаджджати, на вӣрийам̣ а̄рабхати аппаттасса паттийа̄ анадхигатасса адхигама̄йа асаччхикатасса саччхикирийа̄йа. идам̣, бхиккхаве, ат̣т̣хамам̣ кусӣтаваттху. има̄ни кхо, бхиккхаве, ат̣т̣ха кусӣтаваттхӯни.

[дӣ. ни. 3.335, 358] ‘‘ат̣т̣хима̄ни, бхиккхаве, а̄рамбхаваттхӯни. катама̄ни ат̣т̣ха? идха, бхиккхаве, бхиккхуна̄ каммам̣ каттаббам̣ хоти. тасса евам̣ хоти – ‘каммам̣ кхо ме каттаббам̣ бхависсати. каммам̣ кхо майа̄ каронтена на сукарам̣ буддха̄нам̣ са̄санам̣ манаси ка̄тум̣. ханда̄хам̣ пат̣икаччева вӣрийам̣ а̄рабха̄ми аппаттасса паттийа̄ анадхигатасса адхигама̄йа асаччхикатасса саччхикирийа̄йа̄’ти. со вӣрийам̣ а̄рабхати аппаттасса паттийа̄ анадхигатасса адхигама̄йа асаччхикатасса саччхикирийа̄йа. идам̣, бхиккхаве, пат̣хамам̣ а̄рамбхаваттху.

‘‘пуна чапарам̣, бхиккхаве, бхиккхуна̄ каммам̣ катам̣ хоти. тасса евам̣ хоти – ‘ахам̣ кхо каммам̣ ака̄сим̣. каммам̣ кхо пана̄хам̣ каронто на̄саккхим̣ буддха̄нам̣ са̄санам̣ манаси ка̄тум̣. ханда̄хам̣ вӣрийам̣ а̄рабха̄ми аппаттасса паттийа̄ анадхигатасса адхигама̄йа асаччхикатасса саччхикирийа̄йа̄’ти. со вӣрийам̣ а̄рабхати. идам̣, бхиккхаве, дутийам̣ а̄рамбхаваттху.

‘‘пуна чапарам̣, бхиккхаве, бхиккхуна̄ магго гантаббо хоти. тасса евам̣ хоти – магго кхо ме гантаббо бхависсати. маггам̣ кхо пана ме гаччхантена на сукарам̣ буддха̄нам̣ са̄санам̣ манаси ка̄тум̣. ханда̄хам̣ вӣрийам̣…пе… идам̣, бхиккхаве, татийам̣ а̄рамбхаваттху.

‘‘пуна чапарам̣, бхиккхаве, бхиккхуна̄ магго гато хоти. тасса евам̣ хоти – ахам̣ кхо маггам̣ агама̄сим̣. маггам̣ кхо пана̄хам̣ гаччханто на̄саккхим̣ буддха̄нам̣ са̄санам̣ манаси ка̄тум̣. ханда̄хам̣ вӣрийам̣ а̄рабха̄ми…пе… идам̣, бхиккхаве, чатуттхам̣ а̄рамбхаваттху.

‘‘пуна чапарам̣, бхиккхаве, бхиккху га̄мам̣ ва̄ нигамам̣ ва̄ пин̣д̣а̄йа чаранто на лабхати лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса евам̣ хоти – ахам̣ кхо га̄мам̣ ва̄ нигамам̣ ва̄ пин̣д̣а̄йа чаранто на̄латтхам̣ лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса ме ка̄йо лахуко камман̃н̃о. ханда̄хам̣ вӣрийам̣ а̄рабха̄ми…пе… идам̣, бхиккхаве, пан̃чамам̣ а̄рамбхаваттху.

‘‘пуна чапарам̣, бхиккхаве, бхиккху га̄мам̣ ва̄ нигамам̣ ва̄ пин̣д̣а̄йа чаранто лабхати лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса евам̣ хоти – ахам̣ кхо га̄мам̣ ва̄ нигамам̣ ва̄ пин̣д̣а̄йа чаранто алаттхам̣ лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. тасса ме ка̄йо балава̄ камман̃н̃о. ханда̄хам̣ вӣрийам̣ а̄рабха̄ми…пе… идам̣, бхиккхаве, чхат̣т̣хам̣ а̄рамбхаваттху.

‘‘пуна чапарам̣, бхиккхаве, бхиккхуно уппанно хоти аппаматтако а̄ба̄дхо. тасса евам̣ хоти – уппанно кхо ме айам̣ аппаматтако а̄ба̄дхо. т̣ха̄нам̣ кхо панетам̣ виджджати йам̣ ме а̄ба̄дхо павад̣д̣хеййа. ханда̄хам̣ пат̣икаччева вӣрийам̣ а̄рабха̄ми…пе… идам̣, бхиккхаве, саттамам̣ а̄рамбхаваттху.

‘‘пуна чапарам̣, бхиккхаве, бхиккху гила̄на̄ вут̣т̣хито хоти ачиравут̣т̣хито гелан̃н̃а̄. тасса евам̣ хоти – ‘ахам̣ кхо гила̄на̄ вут̣т̣хито ачиравут̣т̣хито гелан̃н̃а̄. т̣ха̄нам̣ кхо панетам̣ виджджати йам̣ ме а̄ба̄дхо паччуда̄ваттеййа. ханда̄хам̣ пат̣икаччева вӣрийам̣ а̄рабха̄ми аппаттасса паттийа̄ анадхигатасса адхигама̄йа асаччхикатасса саччхикирийа̄йа̄’ти. со вӣрийам̣ а̄рабхати аппаттасса паттийа̄ анадхигатасса адхигама̄йа асаччхикатасса саччхикирийа̄йа. идам̣, бхиккхаве, ат̣т̣хамам̣ а̄рамбхаваттху. има̄ни кхо, бхиккхаве, ат̣т̣ха а̄рамбхаваттхӯнӣ’’ти. дасамам̣.

йамакавагго татийо.