(26) 6. упасампада̄вагго

1. упасампа̄детаббасуттам̣

251. [маха̄ва. 84] ‘‘пан̃чахи, бхиккхаве, дхаммехи саманна̄гатена бхиккхуна̄ упасампа̄детаббам̣. катамехи пан̃чахи? идха, бхиккхаве, бхиккху асекхена сӣлаккхандхена саманна̄гато хоти; асекхена сама̄дхиккхандхена саманна̄гато хоти; асекхена пан̃н̃а̄ккхандхена саманна̄гато хоти; асекхена вимуттиккхандхена саманна̄гато хоти; асекхена вимуттин̃а̄н̣адассанаккхандхена саманна̄гато хоти. имехи кхо, бхиккхаве, пан̃чахи дхаммехи саманна̄гатена бхиккхуна̄ упасампа̄детабба’’нти. пат̣хамам̣.

2. ниссайасуттам̣

252. [маха̄ва. 84] ‘‘пан̃чахи, бхиккхаве, дхаммехи саманна̄гатена бхиккхуна̄ ниссайо да̄таббо. катамехи пан̃чахи? идха, бхиккхаве, бхиккху асекхена сӣлаккхандхена саманна̄гато хоти…пе… асекхена вимуттин̃а̄н̣адассанаккхандхена саманна̄гато хоти. имехи…пе… ниссайо да̄таббо’’ти. дутийам̣.

3. са̄ман̣ерасуттам̣

253. [маха̄ва. 84] ‘‘пан̃чахи, бхиккхаве, дхаммехи саманна̄гатена бхиккхуна̄ са̄ман̣еро упат̣т̣ха̄петаббо. катамехи пан̃чахи? идха, бхиккхаве, бхиккху асекхена сӣлаккхандхена саманна̄гато хоти; асекхена сама̄дхиккхандхена… асекхена пан̃н̃а̄ккхандхена… асекхена вимуттиккхандхена… асекхена вимуттин̃а̄н̣адассанаккхандхена саманна̄гато хоти. имехи кхо, бхиккхаве, пан̃чахи дхаммехи саманна̄гатена бхиккхуна̄ са̄ман̣еро упат̣т̣ха̄петаббо’’ти. татийам̣.

4. пан̃чамаччхарийасуттам̣

254. ‘‘пан̃чима̄ни, бхиккхаве, маччхарийа̄ни. катама̄ни пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, дхаммамаччхарийам̣ – има̄ни кхо, бхиккхаве, пан̃ча маччхарийа̄ни. имесам̣ кхо, бхиккхаве, пан̃чаннам̣ маччхарийа̄нам̣ етам̣ пат̣икут̣т̣хам̣ [патикит̣т̣хам̣ (сӣ. пӣ.), пат̣иккит̣т̣хам̣ (сйа̄. кам̣.), пат̣икит̣т̣хам̣ (ка.)], йадидам̣ дхаммамаччхарийа’’нти. чатуттхам̣.

5. маччхарийаппаха̄насуттам̣

255. ‘‘пан̃чаннам̣, бхиккхаве, маччхарийа̄нам̣ паха̄на̄йа самуччхеда̄йа брахмачарийам̣ вуссати. катамесам̣ пан̃чаннам̣? а̄ва̄самаччхарийасса паха̄на̄йа самуччхеда̄йа брахмачарийам̣ вуссати; куламаччхарийасса…пе… ла̄бхамаччхарийасса… ван̣н̣амаччхарийасса… дхаммамаччхарийасса паха̄на̄йа самуччхеда̄йа брахмачарийам̣ вуссати. имесам̣ кхо, бхиккхаве, пан̃чаннам̣ маччхарийа̄нам̣ паха̄на̄йа самуччхеда̄йа брахмачарийам̣ вуссатӣ’’ти. пан̃чамам̣.

6. пат̣хамаджха̄насуттам̣

256. ‘‘пан̃чиме, бхиккхаве, дхамме аппаха̄йа абхаббо пат̣хамам̣ джха̄нам̣ упасампаджджа вихаритум̣. катаме пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, дхаммамаччхарийам̣ – име кхо, бхиккхаве, пан̃ча дхамме аппаха̄йа абхаббо пат̣хамам̣ джха̄нам̣ упасампаджджа вихаритум̣.

‘‘пан̃чиме, бхиккхаве, дхамме паха̄йа бхаббо пат̣хамам̣ джха̄нам̣ упасампаджджа вихаритум̣. катаме пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, дхаммамаччхарийам̣ – име кхо, бхиккхаве, пан̃ча дхамме паха̄йа бхаббо пат̣хамам̣ джха̄нам̣ упасампаджджа вихариту’’нти. чхат̣т̣хам̣.

7-13. дутийаджха̄насутта̄дисаттакам̣

257-263. ‘‘пан̃чиме, бхиккхаве, дхамме аппаха̄йа абхаббо дутийам̣ джха̄нам̣…пе… абхаббо татийам̣ джха̄нам̣… абхаббо чатуттхам̣ джха̄нам̣… абхаббо сота̄паттипхалам̣… абхаббо сакада̄га̄мипхалам̣… абхаббо ана̄га̄мипхалам̣… абхаббо арахаттам̣ [арахаттапхалам̣ (сӣ.)] саччхика̄тум̣. катаме пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, дхаммамаччхарийам̣ – име кхо, бхиккхаве, пан̃ча дхамме аппаха̄йа абхаббо арахаттам̣ саччхика̄тум̣.

‘‘пан̃чиме, бхиккхаве, дхамме паха̄йа бхаббо дутийам̣ джха̄нам̣…пе… бхаббо татийам̣ джха̄нам̣… бхаббо чатуттхам̣ джха̄нам̣… бхаббо сота̄паттипхалам̣… бхаббо сакада̄га̄мипхалам̣… бхаббо ана̄га̄мипхалам̣… бхаббо арахаттам̣ саччхика̄тум̣. катаме пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, дхаммамаччхарийам̣ – име кхо, бхиккхаве, пан̃ча дхамме паха̄йа бхаббо арахаттам̣ саччхика̄ту’’нти. терасамам̣.

14. апарапат̣хамаджха̄насуттам̣

264. ‘‘пан̃чиме, бхиккхаве, дхамме аппаха̄йа абхаббо пат̣хамам̣ джха̄нам̣ упасампаджджа вихаритум̣. катаме пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, акатан̃н̃утам̣ акатаведитам̣ – име кхо, бхиккхаве, пан̃ча дхамме аппаха̄йа абхаббо пат̣хамам̣ джха̄нам̣ упасампаджджа вихаритум̣.

‘‘пан̃чиме, бхиккхаве, дхамме паха̄йа бхаббо пат̣хамам̣ джха̄нам̣ упасампаджджа вихаритум̣. катаме пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, акатан̃н̃утам̣ акатаведитам̣ – име кхо, бхиккхаве, пан̃ча дхамме паха̄йа бхаббо пат̣хамам̣ джха̄нам̣ упасампаджджа вихариту’’нти. чуддасамам̣.

15-21. апарадутийаджха̄насутта̄дисаттакам̣

265-271. ‘‘пан̃чиме, бхиккхаве, дхамме аппаха̄йа абхаббо дутийам̣ джха̄нам̣…пе… татийам̣ джха̄нам̣… чатуттхам̣ джха̄нам̣… сота̄паттипхалам̣… сакада̄га̄мипхалам̣… ана̄га̄мипхалам̣… арахаттам̣ саччхика̄тум̣. катаме пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, акатан̃н̃утам̣ акатаведитам̣ – име кхо, бхиккхаве, пан̃ча дхамме аппаха̄йа абхаббо арахаттам̣ саччхика̄тум̣.

‘‘пан̃чиме, бхиккхаве, дхамме паха̄йа бхаббо дутийам̣ джха̄нам̣…пе… татийам̣ джха̄нам̣… чатуттхам̣ джха̄нам̣… сота̄паттипхалам̣… сакада̄га̄мипхалам̣… ана̄га̄мипхалам̣… арахаттам̣ саччхика̄тум̣. катаме пан̃ча? а̄ва̄самаччхарийам̣, куламаччхарийам̣, ла̄бхамаччхарийам̣, ван̣н̣амаччхарийам̣, акатан̃н̃утам̣ акатаведитам̣ – име кхо, бхиккхаве, пан̃ча дхамме паха̄йа бхаббо арахаттам̣ саччхика̄ту’’нти. екавӣсатимам̣.

упасампада̄вагго чхат̣т̣хо.