6. пат̣хамааван̣н̣а̄рахасуттам̣

236. ‘‘пан̃чахи, бхиккхаве, дхаммехи саманна̄гато а̄ва̄сико бхиккху йатха̄бхатам̣ никкхитто евам̣ нирайе. катамехи пан̃чахи? ананувичча апарийога̄хетва̄ аван̣н̣а̄рахасса ван̣н̣ам̣ бха̄сати; ананувичча апарийога̄хетва̄ ван̣н̣а̄рахасса аван̣н̣ам̣ бха̄сати; ананувичча апарийога̄хетва̄ аппаса̄данӣйе т̣ха̄не паса̄дам̣ упадам̣сети; ананувичча апарийога̄хетва̄ паса̄данӣйе т̣ха̄не аппаса̄дам̣ упадам̣сети; саддха̄деййам̣ винипа̄тети. имехи кхо, бхиккхаве, пан̃чахи дхаммехи саманна̄гато а̄ва̄сико бхиккху йатха̄бхатам̣ никкхитто евам̣ нирайе.

‘‘пан̃чахи, бхиккхаве, дхаммехи саманна̄гато а̄ва̄сико бхиккху йатха̄бхатам̣ никкхитто евам̣ сагге. катамехи пан̃чахи? анувичча парийога̄хетва̄ аван̣н̣а̄рахасса аван̣н̣ам̣ бха̄сати; анувичча парийога̄хетва̄ ван̣н̣а̄рахасса ван̣н̣ам̣ бха̄сати; анувичча парийога̄хетва̄ аппаса̄данӣйе т̣ха̄не аппаса̄дам̣ упадам̣сети; анувичча парийога̄хетва̄ паса̄данӣйе т̣ха̄не паса̄дам̣ упадам̣сети; саддха̄деййам̣ на винипа̄тети. имехи кхо, бхиккхаве, пан̃чахи дхаммехи саманна̄гато а̄ва̄сико бхиккху йатха̄бхатам̣ никкхитто евам̣ сагге’’ти. чхат̣т̣хам̣.