3. атинива̄сасуттам̣

223. ‘‘пан̃чиме, бхиккхаве, а̄дӣнава̄ атинива̄се. катаме пан̃ча? бахубхан̣д̣о хоти бахубхан̣д̣асанничайо, бахубхесаджджо хоти бахубхесаджджасанничайо, бахукиччо хоти бахукаран̣ӣйо бйатто ким̣каран̣ӣйесу, сам̣сат̣т̣хо вихарати гахат̣т̣хапаббаджитехи анануломикена гихисам̣саггена, тамха̄ ча а̄ва̄са̄ паккаманто са̄пеккхо паккамати. име кхо, бхиккхаве, пан̃ча а̄дӣнава̄ атинива̄се.

‘‘пан̃чиме, бхиккхаве, а̄нисам̣са̄ самаваттхава̄се. катаме пан̃ча? на бахубхан̣д̣о хоти на бахубхан̣д̣асанничайо, на бахубхесаджджо хоти на бахубхесаджджасанничайо, на бахукиччо хоти на бахукаран̣ӣйо на бйатто ким̣каран̣ӣйесу, асам̣сат̣т̣хо вихарати гахат̣т̣хапаббаджитехи анануломикена гихисам̣саггена, тамха̄ ча а̄ва̄са̄ паккаманто анапеккхо паккамати. име кхо, бхиккхаве, пан̃ча а̄нисам̣са̄ самаваттхава̄се’’ти. татийам̣.