8. дутийаапа̄са̄дикасуттам̣

218. ‘‘пан̃чиме, бхиккхаве, а̄дӣнава̄ апа̄са̄дике. катаме пан̃ча? аппасанна̄ наппасӣданти, пасанна̄нан̃ча екачча̄нам̣ ан̃н̃атхаттам̣ хоти, саттхуса̄санам̣ акатам̣ [на катам̣ (сйа̄. кам̣. ка.)] хоти, паччхима̄ джаната̄ дит̣т̣ха̄нугатим̣ а̄паджджати, читтамасса наппасӣдати. име кхо, бхиккхаве, пан̃ча а̄дӣнава̄ апа̄са̄дике.

‘‘пан̃чиме, бхиккхаве, а̄нисам̣са̄ па̄са̄дике. катаме пан̃ча? аппасанна̄ пасӣданти, пасанна̄нан̃ча бхиййобха̄во хоти, саттхуса̄санам̣ катам̣ хоти, паччхима̄ джаната̄ дит̣т̣ха̄нугатим̣ а̄паджджати, читтамасса пасӣдати. име кхо, бхиккхаве, пан̃ча а̄нисам̣са̄ па̄са̄дике’’ти. ат̣т̣хамам̣.