3. пат̣хамадхаммавиха̄рӣсуттам̣

73. атха кхо ан̃н̃атаро бхиккху йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со бхиккху бхагавантам̣ етадавоча – ‘‘‘дхаммавиха̄рӣ, дхаммавиха̄рӣ’ти, бханте, вуччати. китта̄вата̄ ну кхо, бханте, бхиккху дхаммавиха̄рӣ хотӣ’’ти?

‘‘идха, бхиккху, бхиккху дхаммам̣ парийа̄пун̣а̄ти – суттам̣, геййам̣, веййа̄каран̣ам̣, га̄тхам̣, уда̄нам̣, итивуттакам̣, джа̄такам̣, аббхутадхаммам̣, ведаллам̣. со та̄йа дхаммапарийаттийа̄ дивасам̣ атина̄мети, рин̃чати пат̣исалла̄нам̣, на̄нуйун̃джати аджджхаттам̣ четосаматхам̣. айам̣ вуччати, бхиккху – ‘бхиккху парийаттибахуло, но дхаммавиха̄рӣ’’’.

‘‘пуна чапарам̣, бхиккху, бхиккху йатха̄сутам̣ йатха̄парийаттам̣ дхаммам̣ виттха̄рена паресам̣ десети. со та̄йа дхаммапан̃н̃аттийа̄ дивасам̣ атина̄мети, рин̃чати пат̣исалла̄нам̣, на̄нуйун̃джати аджджхаттам̣ четосаматхам̣. айам̣ вуччати, бхиккху – ‘бхиккху пан̃н̃аттибахуло, но дхаммавиха̄рӣ’’’.

‘‘пуна чапарам̣, бхиккху, бхиккху йатха̄сутам̣ йатха̄парийаттам̣ дхаммам̣ виттха̄рена саджджха̄йам̣ кароти. со тена саджджха̄йена дивасам̣ атина̄мети, рин̃чати пат̣исалла̄нам̣, на̄нуйун̃джати аджджхаттам̣ четосаматхам̣. айам̣ вуччати, бхиккху – ‘бхиккху саджджха̄йабахуло, но дхаммавиха̄рӣ’’’.

‘‘пуна чапарам̣, бхиккху, бхиккху йатха̄сутам̣ йатха̄парийаттам̣ дхаммам̣ четаса̄ анувитаккети анувича̄рети манаса̄нупеккхати. со техи дхаммавитаккехи дивасам̣ атина̄мети, рин̃чати пат̣исалла̄нам̣, на̄нуйун̃джати аджджхаттам̣ четосаматхам̣. айам̣ вуччати, бхиккху – ‘бхиккху витаккабахуло, но дхаммавиха̄рӣ’’’.

‘‘идха, бхиккху, бхиккху дхаммам̣ парийа̄пун̣а̄ти – суттам̣, геййам̣, веййа̄каран̣ам̣, га̄тхам̣, уда̄нам̣, итивуттакам̣, джа̄такам̣, аббхутадхаммам̣, ведаллам̣. со та̄йа дхаммапарийаттийа̄ на дивасам̣ атина̄мети, на̄пи рин̃чати пат̣исалла̄нам̣, ануйун̃джати аджджхаттам̣ четосаматхам̣. евам̣ кхо, бхиккху, бхиккху дхаммавиха̄рӣ хоти.

‘‘ити кхо, бхиккху, десито майа̄ парийаттибахуло, десито пан̃н̃аттибахуло, десито саджджха̄йабахуло, десито витаккабахуло, десито дхаммавиха̄рӣ. йам̣ кхо, бхиккху [йам̣ бхиккху (сйа̄. кам̣. пӣ.)], саттха̄ра̄ каран̣ӣйам̣ са̄вака̄нам̣ хитесина̄ анукампакена анукампам̣ упа̄да̄йа, катам̣ во там̣ майа̄. ета̄ни, бхиккху, руккхамӯла̄ни, ета̄ни сун̃н̃а̄га̄ра̄ни. джха̄йатха, бхиккху, ма̄ пама̄даттха, ма̄ паччха̄ виппат̣иса̄рино ахуваттха. айам̣ во амха̄кам̣ ануса̄санӣ’’ти. татийам̣.